လွိုင်တောင်းတွင် စခန်းဆောက်ရန် တပ်မှ လူထုအား သစ်၊ ဝါးပို့ခိုင်း

0

သျှမ်းပြည်တောင်ပိုင်း မိုင်းကိုင်မြို့နယ်ရှိ လွိုင်တောင်းတောင်ကြောတွင် တပ်စခန်းဆောက်လုပ်ရန်အတွက် သစ်များဝါးများပို့ပေးရန် အစိုးရ တပ်မတော်မှ ဒေသခံရွာသားများထံ ဆင့်ဆိုထားကြောင်း သတင်းရရှိသည်။

 

Photo by ဒေသခံတဦး

ဖေဖော်ဝါရီ ၂၇ မှ စတင်ကာ သျှမ်းပြည် ပြန်လည်ထူထောင်ရေး ကောင်စီ၊ သျှမ်းပြည်တပ်မတော်( RCSS/SSA) နှင့် အစိုးရ တပ်မတော်တို့မိုင်းကိုင်မြို့နယ် ဟမ်းငိုင်းကျေးရွာ အုပ်စုအတွင်းရှိ RCSS/SSA စခန်းရှိရာလွိုင်တွန်း တောင်ကြောတလျှောက် တိုက်ပွဲဖြစ်ပွါးခဲ့သည်။

ထိုတိုက်ပွဲကြောင့် RCSS/SSA တပ်စခန်းမှ ဆုတ်ခွါပေးခဲ့ရပြီး လက်ရှိ အဆိုပါတပ်စခန်းတွင် အစိုးရ တပ်မတော် မှ စခန်းချနေထိုင်ထားကြောင်းသိရသည်။

ထို လွိုင်တောင်း တပ်စခန်းကို ပြန်လည် ပြုပြင်ရန် အတွက် ဟမ်းငိုင်းကျေးရွာအုပ်စု အတွင်းရှိ ကုန်းညောင် ဖာဆား ကျေးရွာ ဒေသခံများနှင့် ဟိုခဲ ဒေသခံများကို သစ်များ ဝါးများခုတ်ပြီး ပို့ပေးရန် ဆင့်ဆိုညွှန်ကြားထားကြောင်း ဒေသခံများ ပြောပြ ချက်အရသိရသည်။

“ အဲ့တပ်စခန်းက ဟိုခဲ ကျေးရွာနဲ့ နီးတယ်။ သစ်ပင်ခုတ်ပြီး လွိုင်တွန်းတောင်ပေါ်လာပို့ဖို့ ဆင့်လာတယ်။ ဘယ်လောက်ဆိုတာကတော့ကျနော်သေချာမသိဘူး” ဟု ဟမ်းငိုင်းကျေးရွာ မှ ဒေသခံ စိုင်းမု က သျှမ်းသံတော်ဆင့် သို့ ပြောသည်။

သစ်များဝါးများပို့ပေးရန် လွန်ခဲ့သည် ၃ ရက်က ဟိုခဲရွာသားများထံ ဆင့်ဆိုလာကြောင်း စိုင်းမု က ဆိုသည်။

ဆက်လက်ပြီး ကုန်းညောင်ဖာဆားရွာမှ အသက် ၄၀ ကျော် စိုင်းဝမ်း က “ ကျနော်တို့ ရွာကိုလည်း သစ်ပင်ခုတ်ပြီး လာပို့ဖို့ တောင်းတယ်။ ကျနော်တို့ ရွာက အခု အခြေအနေ သိပ်မကောင်းတော့ မပေးနိုင်ဘူးလို့ ပြန်အကြောင်းကြားထားတယ်” ဟု သျှမ်းသံတော်ဆင့် ကို ပြောသည်။

လက်ရှိ အစိုးရ တပ်မတော် အနေဖြင့် လွိုင်တောင်း တောင်ပေါ် စခန်း ပြုလုပ်ရန် သစ်အလုံးပေါင်း ၁ ထောင်ကျော် လိုအပ်နေကြောင်း လွိုင်တွန်းနှင့် နီးသည့် ကျေးရွာများအားလုံး က ခုတ်ပြီး သွားပို့ရမည် ဟု ဆင့်ဆိုခံရကြောင်း စိုင်းဝမ်းက ပြောပြသည်။

RCSS/SSA နှင့် အစိုးရ တပ်မတော်တို့သည် တိုက်ပွဲများ ငြိမ်သက်နေသော်လည်း အစိုးရ တပ်မတော် ၏ စစ်ကြောင်းများသည် ယနေ့ အချိန်ထိ ကျေးရွာထဲတွင် လှုပ်ရှားနေဆဲဟု ဒေသခံများက ပြောသည်။

“ စစ်သားတွေကတော့ ရွာထဲ ဝင်လိုက်၊ထွက်လိုက်ပါပဲ။သိပ်တော့စိတ်မချရသေးဘူး။ နေ့တိုင်း အဲ့တောင်ပေါ်ကနေဆင်းလာတယ်” ဟု စိုင်းဝမ်းက ဆိုသည်။

တိုက်ပွဲကြောင့် နေအိမ်များ လက်နက်ထိမှန်ခြင်း၊ အစိုးရ တပ်မတော် မှ စစ်သားများ ခိုးယူစားသောက်သည့် ပစ္စည်းများ။ အိမ်တွင်းပစ္စည်းများကို သက်ဆိုင်ရာ ပြည်နယ်လွှတ်တော်များက စာရင်းလာကောက်ယူကြကြောင်းသိရသည်။

ထို့အပြင် သက်ဆိုင်ရာ လူမှု ကယ်ဆယ်ရေးနှင့်ပြန်လည်နေရာချထားရေး အဖွဲ့မှလည်း ကျေးရွာအတွင်းတွင် ကျား၊ မဦးရေ စာရင်း၊ ကျောင်းသားဦးရေ စာရင်းများကို လာရောက် ကောက်ယူသေးကြောင်း ဒေသခံများက ပြောသည်။

Leave a Comments

SHARE