သျှမ်းပြည် တောင်ပိုင်း မိုင်းကိုင်မြို့ တပေါင်းပွဲ အပြီး ဘုရားပရဝုဏ်အတွင်း အမှိုက်များစွာ ကျန်ရှိနေကြောင်း ဒေသခံများကပြောသည်။
တပေါင်းလ ရောက်တိုင်း သျှမ်းပြည် အတွင်းရှိ မြတ်စွာဘုရား ဓာတ်တော် မွေတော်အစစ်အမှန်တည်ရှိရာ ဒေသများတွင် ခေတ်အဆက်ဆက် ရိုးရာ တပေါင်းပွဲ ကျင်းပရာ သျှမ်းပြည်တောင်ပိုင်း မိုင်းကိုင်မြို့တပေါင်းပွဲတော်တွင်လည်း ရပ်နီးရပ်ဝေးမှ ပွဲလာသည့်လူထု စည်ကားလျှက်ရှိကြောင်းသိရသည်။
ပွဲတော်ရောက် ပရိသတ်များသည် အမှိုက်ကို စနစ်တကျ စွန့်ပစ်ခြင်းမရှိသဖြင့် ပွဲဈေးတန်းများ၊ ဘုရားရင်ပြင်ပေါ်များတွင် အမှိုက်များဖြင့်ပြည့်နှက်နေကြောင်း ပွဲကျင်းပရေးကော်မတီဝင်များက သျှမ်းသံတော်ဆင့်သို့ပြောသည်။
“ ဒီနှစ် ပွဲလာတဲ့သူ နည်းတယ်။ ဒါပေမယ့် အမှိုက်တွေက အရမ်းများတယ်။ အမှိုက်တွေကို သေချာမပစ်ကြဘူး။ အမှိုက်အိတ်လည်း ထားပေးတယ်။ ပွဲဈေးထဲ စားပြီး ပစ်ကြတယ်” ဟု မိုင်းကိုင်မြို့နယ် အမှတ်(၂) ပြည်နယ် လွှတ်တော် ကိုယ်စားလှယ် အမတ် ဦးစိုင်းလုံ က သျှမ်းသံတော်ဆင့်သို့ပြောသည်။
ပွဲတော်နေ့ ပြီးစီးကာ ပွဲဈေးခင်းသူများ မိမိနေရပ်သို့အသီးသီး ပြန်သွားကြပြီဖြစ်သော်လည်း လက်ရှိအချိန်အထိ ဘုရားပွဲ ကျင်းပသည့်နေရာတွင် အမှိုက်များ ကျန်နေခဲ့ကြောင်း၊ သန့်ရှင်းရေး ပြုလုပ်ဖို့ လူငှားခေါ်ထားရကြောင်း လည်း ဦးစိုင်းလုံ က ပြောသည်။
“ အခု ပွဲကွင်းထဲ သန့်ရှင်းရေးလုပ်မယ့်သူကို ၄သိန်း ၅ သောင်းပေးပြီးခေါ်ခိုင်းထားရတယ်။ ဒီနှစ်က အမှိုက်တွေ ပိုများတယ်။ အမှိုက်အိတ်တွေလည်း ပြည့်လျှံနေတယ်” ဟု ဦးစိုင်းလုံ က ဆိုသည်။
လက်ရှိ ကမ္ဘာတဝှမ်းလုံး Novel Corona Virus (ခိုရိုနာ ဗိုင်းရပ်စ်) ကို စိုးရိမ်ထိတ်လန့်ပြီး လူစုလူဝေးများရှိသည့်နေရာတွင် မသွားလာကြရန် သက်ဆိုင်ရာ ကျန်းမာရေး နှင့် အားကစား ဝန်ကြီးဌာန ကထုတ်ပြန်ထားသည်။
သို့သော် သျှမ်းပြည်အတွင်း ရိုးရာပွဲတချို့ ဆိုင်းငံ့ခြင်း ရပ်ရွှေ့ဆိုင်းခြင်းမပြုဘဲ ကျင်းပနေပါသည်။
Leave a Comments