သျှမ်းပြည် မြောက်ပိုင်း ကွတ်ခိုင်မြို့နယ် လွယ်ခမ်းကျေးရွာ အနီး ကျပ်သိန်း ၁၁၃ ဘီလီယံ ကျော် တန်ဖိုးရှိ မူးယစ်ဆေးဝါးနှင့် ဆက်စပ်ပစ္စည်းများ ထပ်မံ သိမ်းဆည်းရမိကြောင်း သတင်းရရှိသည်။

မတ်လ် ၉ ရက် မနက် ၈ နာရီ ကျော် က ကွတ်ခိုင်မြို့နယ် လွယ်ခမ်းကျေးရွာ အနီး ရှိ ဦးချမ်းဘောမ် ပိုင်ဆိုင်သည့်နေအိမ်ကို ဝင်ရောက်စစ်ဆေးရာ WY စာတန်းပါ စိတ်ကြွဆေးပြားများ၊ အက်ဖီအမှုန့် စုပေါင်း ခန့်မှန်းငွေ ၁၁၀ ဘီလီယံကျော် သိမ်းဆည်းရမိကြောင်း တပ်မတော် ကာကွယ်ရေး ဦးစီးချုပ်ရုံး သတင်းထုတ်ပြန်ချက်အရသိရသည်။

ထိုနည်းတူ နေ့လည် ၁နာရီတွင်လည်း ဦးလျှိုပါ့ ပိုင်ဆိုင်သည့်နေအိမ်ကို ဝင်ရောက်စစ်ဆေးရာ ဘိန်းဖြူများ၊ စိတ်ကြွဆေးပြားများ နှင့် မူးယစ်ဆေးဝါး ချက်လုပ်ရာတွင် အသုံးပြုသည့် ဆိုဒီယမ် ကာဗွန်နိတ်၊ ဆိုဒီယမ်ဟိုက်ဒရောဆိုဒ်၊ ပိုတက်ဆီယမ်ကလိုရိုဒ်အမှုန့်၊ အက်ဆစ်များ၊ ဂက်စ်အိုးအကြီး၊ ဂက်စ်မီးဖိုနှင့် စတီးပေါင်းအိုး တို့တွင် သိမ်းဆည်းရမိသည်။

အဆိုပါ ဦးလျှိုပါ့ နေအိမ်တွင် မူးယစ်ဆေးဝါး ကျပ်ငွေ ၃ ဒသမ ၉ ဘီလီယံကျော် သိမ်းဆည်းရမိပြီး၊ မူးယစ်ဆေးဝါး နှင့်ဆက်စပ်သည့် ပစ္စည်းများ တန်ဖိုးငွေ ၆၉ သိန်း ကျော်တို့ သိမ်းဆည်းရမိကြောင်း ထုတ်ပြန်ချက်တွင်ရေးသားထားသည်။

ထိုနေအိမ် ၂ အိမ်၏ ပိုင်ရှင် နှစ်ဦးမှာ ထွက်ပြေးတိမ်းရှောင်နေကြောင်း သိရသည်။

ကွတ်ခိုင်မြို့နယ် အတွင်း လုံခြုံရေး တပ်ဖွဲ့ဝင်များ၏ ရှာဖွေ ဖော်ထုတ် သိမ်းဆည်းရရှိမှု အနေဖြင့် ဖေဖော်ဝါရီ ၂၈ ရက်မှ မတ် ၉ ရက် အထိ ကျပ်သိန်း ပေါင်း ၂၄၄ ဘီလီယံကျော်ရှိကြောင်း ထုတ်ပြန်ချက်တွင်ဖော်ပြထားသည်။

ကွတ်ခိုင်မြို့ နယ် အတွင်းကျပ်သိန်း ၂၄၄ ဘီလီယံ ကျော် ဖမ်းဆီးရမိသော်လည်း တရားခံ ကို တဦးတယောက်မျှ မဖမ်းဆီးရမိသည့် အပေါ် ပြည်သူများ အနေဖြင့် သံသယ ရှိနေကြသည်။

“ မူးယစ်ဆေးဝါး သေးသေးမွှားမွှားဆိုရင် တရားခံတွေ သယ်ယူသူတွေ ဖမ်းဆီးရမိတယ်။ ဒီလို ဘီလီယံကျော်ရင် တခါမှ တရားခံမမိဘူး။ ထွက်ပြေး လွှတ်မြောက်နေတာပဲ။ သိရက်နဲ့ မဖမ်းတာလား။ လူတွေ မရှိဘဲ မူးယစ်ဆေးတွေက ဘီလီယံ ထုတ်နိုင်တာ ထူးဆန်းတယ်” ဟု ကွတ်ခိုင်မြို့ အသက် ၄၀ကျော် စိုင်းဘ က သျှမ်းသံတော်ဆင့် သို့ ပြောသည်။

ကွတ်ခိုင်မြို့နယ် ကောင်းခါးကျေးရွာ နှင့် လွယ်ခမ်းကျေးရွာ ရှိနေအိမ် အများစုသည် တရုတ်လူမျိုး များဖြစ်ကြပြီး မူးယစ်ဆေးနှင့်ပတ်သက်ဆက်နွယ်နေကြကြောင်းလည်း ကွတ်ခိုင်ဒေသခံများ က ပြောဆိုသည်။

“ အိမ်တိုင်းက မူးယစ်ဆေးတွေရှိနေတယ်။ ထပ်မိအုံးမှာ။ တရားခံ မိဖို့ လိုအပ်တယ်” ဟု လည်း စိုင်းဘ က ဆိုသည်။

အဆိုပါ အဓိက တရားခံ များနှင့် ပါဝင်ပတ်သက်သူများကို ဖမ်းဆီးရမိရေး အတွက် လုပ်ထုံးလုပ်နည်း နှင့် အညီ ဆောင်ရွက်သွားမည်ဖြစ်ကြောင်း လည်း တပ်မတော်ကာကွယ်ရေး ဦးစီးချုပ်ရုံး ထုတ်ပြန်ချက်တွင်ရေးသားထားသည်။

၎င်းနယ်မြေ တဝိုက်အား လုံခြုံရေး တပ်ဖွဲ့ဝင်များက နယ်မြေလုံခြုံရေး လုပ်ငန်းများနှင့် ရှာဖွေ စစ်ဆေးမှုများဆက်လက်ဆောင်ရွက်သွားမည် ဟုလည်း သတင်းရရှိသည်။