သျှမ်းပြည် မြောက်ပိုင်း လားရှိုး -သီပေါ ကားလမ်းပေါ် တွင် အစိုးရတပ်မတော် မှ ခရီးသွားပြည်သူများကို တင်းကြပ်စွာ စစ်ဆေးနေကြောင်း သတင်းရရှိသည်။
တပ်မတော်မှ ခရီးသွားကားများကို တင်းကြပ်စွာ စစ်ဆေးနေသည့်နေရာ
သျှမ်းပြည်တောင်ပိုင်း မိုင်းကိုင်မြို့နယ် ဟမ်းငိုင်းကျေးရွာအုပ်စု အတွင်း သျှမ်းပြည် ပြန်လည်ထူထောင်ရေး၊ သျှမ်းပြည်တပ်မတော် ( RCSS/SSA) နှင့် အစိုးရ တပ်မတော်တို့ ဖေဖော်ဝါရီ ၂၇ ရက်မှ စတင် တိုက်ပွဲဖြစ်ပွားလာပြီးနောက် စစ်ဆေးရေး တင်းကြပ်လာခြင်းဖြစ်သည် ဟု သျှမ်းလူငယ်အဖွဲ့မှ စိုင်းဟန် က သျှမ်းသံတော်ဆင့် သို့ ပြောသည်။
“ ဒီနေ့ လားရှိုး အဝင်မှာ စစ်တယ်။ အရင်က အဲ့နေရာမှာ ရဲနဲ့ မူးယစ်စစ်တာ။ အခု စစ်သားတွေ ပဲ စောင်စစ်တယ်။ ကားတွေ လက်နက်တွေ ပါမှာ စိုးရိမ်လို့ စစ်တာနေမယ်” ဟု စိုင်းဟန် ကပြောသည်။
အစိုးရ တပ်မတော် ၏ စစ်သားများသည် ကားများတွင် လက်နက်များ ပါလာမည်ကို ကြောက်သဖြင့် တင်းကြပ်စွာ စစ်ဆေးခြင်းဖြစ်ကြောင်း၊ ထို စစ်ဆေးမှုသည် ယခင်တွင် မရှိခဲ့ကြောင်း၊ တိုက်ပွဲဖြစ်ပွားပြီးနောက် စစ်ဆေးလာခြင်းဖြစ်ကြောင်း စိုင်းဟန် က ပြောပြသည်။
လားရှိုးသို့ဝင်မည့် ကားတိုင်း စစ်ဆေးခံရကြောင်း သိရသည်။
သီပေါမြို့ သို့ သွားမည် ခရီးသည် အမျိုးသမီး ပြောပြချက် အရ “ စစ်တာတော်တော်စိုးတယ်။ ယောင်္ကျားလေးဆိုရင် ပိုစစ်တယ်။ သျှမ်းဖြစ်ရင် ပိုစစ်တယ်။ ဖုန်းတွေ၊ အိတ်တွေ စစ်တယ်” ဟု သျှမ်းသံတော်ဆင့် သို့ ပြောသည်။
သျှမ်း အမျိုးသားများကို ပိုပြီးစစ်ဆေးနေကြောင်း၊ ထို သျှမ်းမြောက်သွားလာမည့် ပြည်သူများအနေဖြင့် သတိထား ကြရန် နှင့် ဖုန်းထဲလည်း စစ်ဆေးသည့် အတွက် မဖြစ်သင့်သည်ကို မဖြစ်လာရန် အတွက် အထူး သတိပြုကြရန် ယနေ့ စစ်ဆေးခံရသည့် ခရီးသွား အမျိုးသမီးက ပြောသည်။
Leave a Comments