သျှမ်းပြည်နယ် မြောက်ပိုင်း နမ့်ခမ်းမြို့နယ် အတွင်း တိုက်ပွဲ နေရာ ၅ နေရာဖြစ်ပွားကာ ၂ ဦးကျဆုံးကြောင်း သတင်းရရှိသည်။
့မတ်လ ၁၅ ရက် မနက် ၅ နာရီ အချိန်ကစတင်သည့်တိုက်ပွဲသည် ညနေပိုင်းထိ တအာင်း(ပလောင်) အမျိုးသားလွတ်မြောက်ရေး တပ်မတော် (TNLA) နှင့် အစိုးရ တပ်မတော်၊ ပန်းဆေး ပြည်သူ့စစ် တို့နှင့် ဖြစ်ပွါးခဲ့ခြင်းဖြစ်ကြောင်းသိရသည်။
“ မနက် ၄ နာရီ လောက်က စဖြစ်တာ။ နမ့်ခမ်းမြို့နယ် ထဲက နေရာ ၅ နေရာဖြစ်ပါတယ်။ လက်နက်ကြီးတွေက နေအိမ်တွေ ဈေးတွေထဲကျတယ်။ အခုထိ တိုက်ပွဲက ဖြစ်နေတုန်းပါ ” ဟု ခိုလုံ လီရှော လူငယ်အဖွဲ့ မှ တာဝန်ခံ အမျိုးသမီး တဦးက ပြောသည်။
ယမန်နေ့ကတိုက်ပွဲဖြစ်ပွားသည့် နမ့်ခမ်းမြို့နယ် ၅ နေရာမှာ လီရှောမန်ပန်ရွာ၊ ရှောက်ကုန်းကန်ရွာ၊ ပန်းဆေးရွာ၊ တာကွန်ရွာ နှင့် မန့်မိုင် ကျေးရွာတို့ဖြစ်ကြောင်းသိရသည်။
“ မန့်မိုင် မှာက ၂ ဦးသေတယ်။ အရပ်သားတွေ ပိတ်မိနေသေးတယ်” ဟု ၎င်း အမျိုးသမီး က ဆိုသည်။
ထို တိုက်ပွဲသည် TNLA မှ စတင်တိုက်ခိုက်လာပြီး ပန်းဆေးပြည်သူ့စစ် အနေဖြင့် မိမိတပ်စခန်းကို ကာကွယ်ရသဖြင့် ပြန်လည်ပစ်ခတ်ခြင်းဖြစ်ကြောင်း၊ အစိုးရ တပ်မတော် မှ တပ်သားများ ပါဝင်ခြင်း ရှိ၊ မရှိ မသိရှိသေးကြောင်းလည်း အဆိုပါ အမျိုးသား က ပြောသည်။
လက်ရှိဖြစ်ပွားနေသည့် တိုက်ပွဲနှင့် ပတ်သက်ပြီး TNLA မှ ပြောရေးဆိုခွင့် ရှိသူ ဗိုလ်မှူး တားအိုက်ကျော် က “ တိုက်ပွဲက နေရာ ၃ နေရာ ၅ နေရာလောက်ဖြစ်တယ်။ ဖြစ်တဲ့နေရာတွေက ပန်းဆေးပြည်သူ့စစ်စခန်း ဝန်းကျင်မှာဖြစ်ပါတယ်” ဟု သျှမ်းသံတော်ဆင့် သို့ ပြောသည်။
ယနေ့ တိုက်ပွဲဖြစ်ရသည့် အကြောင်းရင်းမှာ TNLAအနေဖြင့် မူးယစ်ဆေးဝါးတိုက်ဖျက်ရေး ဆောင်ရွက်နေစဉ် အစိုးရ တပ်မတော် နှင့် ပန်းဆေး ပြည်သူ့စစ် တို့မှ စတင်ပစ်ခတ် ခြင်းဖြစ် ကြောင်း ဗိုလ်မှူး တားအိုက်ကျော် က ပြောသည်။
“ မူးယစ်ဆေးဝါးတိုက်ဖျက်ရေး လုပ်တိုင်း တိုက်ပွဲက ပြင်းထန်ပါတယ်။ သေဆုံးဦးရေ ကတော့ ကျနော် စာရင်း အတိအကျမသိရသေးဘူး” ဟုလည်း ဗိုလ်မှူး တားအိုက်ကျော် ကဆိုသည်။
လက်ရှိဖြစ်ပွားနေသည့် တိုက်ပွဲ အခြေအနေကို သျှမ်းသံတော်ဆင့်မှ တပ်မတော်သတင်းမှန် ပြန်ကြားရေး ကို ဆက်သွယ်မေးမြန်းရာ ပြန်လည် ဖြေကြားခြင်းမရှိပေ။
သေဆုံးသူ ၂ ဦးသည်လည်း အရပ်သား ဟုတ်မဟုတ် အတိအကျ မသိရသေးပေ။
တိုက်ပွဲသည် နမ့်ခမ်းမြို့ နှင့် မိုင် ၃၀ ခန့်သာ ဝေးကြောင်း သိရသည်။
Leave a Comments