မြန်မာ- တရုတ်နယ်စပ် မူဆယ်မြို့မှ လာသည့် မှန်လုံကားပေါ်တွင် လူနာတဦး နေမကောင်းဖြစ်ပွါးရာ လားရှိုးဆေးရုံတွင် သေဆုံးခဲ့ကြောင်း သတင်းရရှိသည်။
မတ်လ ၅ ရက် ယမန်နေ့ ည ၈ နာရီခွဲက မူဆယ်မြို့ မှ လာသည့် မှန်လုံကားတစီးတွင် ပါလာသည့် ခရီးသည်တဦးနေမကောင်းဖြစ်ရာ လူမှုကူညီရေး အသင်း အကူအညီဖြင့် လားရှိုးပြည်သူ့ဆေးရုံသို့ ပို့ဆောင်ခဲ့ကြောင်း၊ လားရှိုးဆေးရုံ ရောက်သည့် အချိန်တွင် လူနာ သေဆုံးသွားကြောင်း ပေးသောလက် စေတနာရှင် (သွေး) နှင့် လူမှုကူညီရေး အသင်း မှ ကိုမြင့်မော် က သျှမ်းသံတော်ဆင့် သို့ပြောသည်။
“ မူဆယ်ကနေ လာတဲ့ ကားပေါ် မှာ နေမကောင်းတဲ့သူပါလာတယ်။ လာခေါ်ပေးပါဆိုလို့ ကျနော်တို့အဖွဲ့သွားခေါ်တာ။ ဆေးရုံရောက်တော့ သူဆုံးသွားတယ်။ သွေးတွေလည်း အန်တယ်လို့ပြောတယ်” ဟု ကိုမြင့်မော် က ဆိုသည်။
အဆိုပါ သေဆုံးလူနာသည် ရခိုင်ပြည်နယ်မှဖြစ်ပြီး တရုတ်နိုင်ငံတွင် သွားရောက်အလုပ်လုပ်ရာ တလကျော်နေမကောင်းဖြစ်နေကြောင်း သိရသည်။
“ ကျနော်တို့စုံစမ်းသိရသလောက်ကတော့ သေဆုံးတဲ့သူက တရှောင်ရှောင် ချောင်းဆိုးနေတာ ကြာပြီ။ လောဆယ်တော့ တရုတ်ပြည်မှဖြစ်နေတဲ့ ခိုရိုနာ ဟုတ်၊မဟုတ် ဆရာဝန် ဆေးစစ်ချက် မရသေးဘူး” ဟု ကိုမြင့်မော်က ထပ်လောင်းပြောပြသည်။
အဆိုပါ မှန်လုံကားပေါ် ပါလာသည့် ခရီးသည်များကို သက်ဆိုင်ရာ ကျန်းမာရေး ဌာန က ကျန်းမာရေး စစ်ဆေးမှုများပြုလုပ်ပေးကြောင်း၊ ကားပေါ်ပါလာသည့် ခရီးသည်များအားလုံး ကျန်းမာရေးကောင်းမွန်နေပြီး ၎င်းတို့၏ နေရပ်လိပ်စာများကိုလည်းယူထားကြောင်း သိရသည်။
ထို မှန်လုံကားပေါ်လိုက်ပါလာသည့် ခရီးသည် သေဆုံးမှု နှင့် ပတ်သက်ပြီး သျှမ်းသံတော်ဆင့်မှ လားရှိုးပြည်သူ့ဆေးရုံကို ကြိုးစား ဆက်သွယ်မေးမြန်းသော်လည်း မရခဲ့ပေ။
