ကျေးရွာ ပြန်မည့် စစ်ရှောင်များ တပ်မတော်မှ ဟန့်တား

0

သျှမ်းပြည်တောင်ပိုင်း မိုင်းကိုင် မြို့နယ် ဟမ်းငိုင်းကျေးရွာအုပ်စု ဘုန်းကြီးကျောင်းရောက် စစ်ဘေးရှောင်များသည် မိမိနေရပ်သို့အခြေအနေို ပြန်ကြည့်ရန် အတွက် သွားစဉ် တပ်မတော်မှ ဟန့်တားခဲ့ရကြောင်း သတင်းရရှိသည်။

 

Photo by Khun Zaw Oo VJ/ Facebook

ယမန်နေ့က ကုန်းညောင် ဖာဆား ကျေးရွာရှိ စစ်ရှောင် အမျိုးသားများ နှင့် မိုင်းကိုင်မှ ပြည်နယ် လွှတ်တော် ကိုယ်စားလှယ်များ ကျေးရွာသို့ အခြေအနေပြန်ကြည့်ရန်အသွားလမ်းခရီးတွင် အစိုးရ စစ်သားများ၏ ဟန့်တား မှုကို ခံခဲ့ရသဖြင့် ကျေးရွာထဲ မရောက်ခဲ့ကြောင်း မိုင်းကိုင်မြို့နယ် အမှတ်(၁) ပြည်နယ် လွှတ်တော်ကိုယ်စားလှယ် စိုင်းပန် က သျှမ်းသံတော်ဆင့် သို့ပြောသည်။

“ မနေ့က ကျနော်တို့ ကုန်းညောင်ဖာဆား ကျေးရွာ အသွား ဖာပေါင် ကျေးရွာမှာ ဟန့်တားခံရတယ်။ ဖာပေါင် ရွာ ထိပ်အရောက် အစိုးရ စစ်သားက ဆက်ပေးမသွားတာ။ လုံခြုံရေး အရ ပေးမသွားတာလို့ပြောတယ်” ဟု စိုင်းပန် က ဆိုသည်။

ကုန်းညောင်ဖာဆားကျေးရွာအတွင်း အစိုးရ တပ်မတော် မှ စစ်သားများသည် ရွာသားများ စစ်ဘေးရှောင်နေစဉ် နေအိမ်၊ ဈေးဆိုင်များရှိ အစားအစာများ ကို ဝင်ရောက် ယူငင်ခြင်း၊ ဖျက်ဆီးခြင်း ပြုလုပ်ကြောင်း၊ ကျေးရွာ အတွင်း လက်နက်ကြီးများပစ်ခတ်ခဲ့ကြကြောင်း ၊ အဆိုပါအခြေအနေများကို သွားရောက် ကြည့်ရှုရန် နှင့် ရွာတွင် ကျန်ရှိသည့် ဝက်များ၊ နွားများကို အစားကျွေးရန် သွားကြခြင်းဖြစ် ကြောင်း စိုင်းပန် က ပြောသည်။

“ ဒေသခံတွေ အိမ်၊ ဆိုင်တွေ ပစ္စည်းယူတာတွေ အိမ်ဖောက်တာတွေကို ကျနော်တို့ကြည့်ရှုဖို့သွားတာ။ နောက် ဒေသခံတွေက ကျန်ခဲ့တဲ့ ဝက်တွေ နွားတွေကို အစာကျွေးဖို့ို့ပါ။ စစ်တပ်က ပေးမသွားလို့ ပြန်လှည့်လာရတယ်” ဟု စိုင်းပန် က ပြောသည်။

မိုင်းကိုင်မြို့နယ် ဟမ်းငိုင်းကျေးရွာ အုပ်စု အတွင်း RCSS/SSA နှင့် အစိုးရ တပ်မတော်သည် ဖေဖော်ဝါရီ ၂၇ ရက်မှ စတင်ကာ တိုက်ပွဲဖြစ်ပွားခဲ့ပြီး ယနေ့ချိန်ထိ စစ်ရေး တင်းမာမှုများရှိနေကြောင်း သိရသည်။

အဆိုပါ တိုက်ပွဲကြောင့် မိုင်းကိုင်မြို့နယ် ဟမ်းငိုင်းကျေးရွာအုပ်စု အတွင်းရှိ ဘုန်းကြီးကျောင်းတွင် စစ်ရှောင် ၅၀၀ ကျော် ရှိသည်။

ထိုစစ်ရှောင်များသည် ရက် အနည်းငယ် ကြာ စစ်ရှောင်နေရသဖြင့် မိမိနေရပ်ကို ပြန်လိုကြောင်း၊ တိုက်ပွဲ အမြန်ရပ်စေလိုကြောင်း ကုန်းညောင် ဖာဆာ ကျေးရွာ မှ စိုင်းကျိန် က သျှမ်းသံတော်ဆင့် သို့ ပြောသည်။

“ ကျနော်တို့ မပြန်ရဲသေးဘူး။ ဟိုရက်တွေက ကျနော်တို့ရွာသားတွေ ကိုယ့်ဘာသာ ကိုယ် ဝက်၊နွားအစာသွားကျွေးတော့ စစ်သားတွေ သေနတ်နဲ့ ပစ်တယ်။ တချို့ ဆို ဖမ်းခံရတယ်။ မနေ့က လွှတ်တော်ကိုယ်စားလှယ်တွေနဲ့သွားတာ ရွာထဲ ပေးမဝင်ဘူး” ဟု စိုင်းကျိန် က ဆိုသည်။

စစ်ရှောင်များသည် မိမိနေရပ် ကို ပြန်ကာ လုပ်ငန်းခွင်များ ပြန်လည် လုပ်ချင်ကြကြောင်း၊ လက်ရှိမှာ ဘုန်းကြီးကျောင်းတွင်စုပေါင်းနေထိုင်ရသဖြင့် အဆင်မပြေကြောင်းလည်း စိုင်းကျိန်က ဆက်လက်ပြောသည်။

“ နေရပ်ပြန် ကိုယ့်အလုပ်ပဲ ကိုယ်လုပ်ချင်တယ်။ ဒီမှာက လူတွေလည်းများ။ အဆင်မပြေဘူး” ဟု စိုင်းကျိန် က ဆိုသည်။

လွန်ခဲ့သည့် ၂ ရက် အတွင်း အစိုးရ စစ်ကြောင်းမှ စစ်သားများသည် စစ်ရှောင်နေအိမ် များကို ဝင်ရောက်မွှေနှောက် ရှာဖွေကြကြောင်း၊ လက်ရှိ အချိန်ထိ စစ်ကြောင်းများသည် ကျေးရွာ အတွင်း တပ်စခန်းချကာ လှုပ်ရှားနေကြောင်း သိရသည်။

Leave a Comments

SHARE