သျှမ်းပြည်တောင်ပိုင်း မိုင်းကိုင်မြို့နယ်အတွင်း RCSS/SSA နှင့် အစိုးရတပ်မတော်တို့ မတ်လ ် ၁ ရက် တွေ့ဆုံဆွေးနွေးကြပြီးနောက် တိုက်ပွဲ ၁၈ ကြိမ်ထပ်မံဖြစ်ပွားခဲ့ကြောင်း သတင်းရရှိသည်။

သျှမ်းပြည်ပြန်လည်ထူထောင်ရေး ကောင်စီ၊ သျှမ်းပြည်တပ်မတော်( RCSS/SSA) နှင့် အစိုးရ တပ်မတော်သည် ဖေဖော်ဝါရီ ၂၇ ရက်မှ စတင်ကာ မိုင်းကိုင်မြို့နယ် ဟမ်းငိုင်းကျေးရွာ အုပ်စု အတွင်းရှိ လွိုင်တွန်းတောင်ကြော ၌ တိုက်ပွဲ ဖြစ်ပွားခဲ့သည်။

RCSS/SSA နှင့် အစိုးရ တပ်မတော်သည် မတ် ၁ ရက်တွင် ညှိနှိုင်းဆွေးနွေးပြီး RCSS/SSA မှ လက်ရှိဆောင်ရွက်နေသည့် ငြိမ်းချမ်းရေး လုပ်ငန်းစဉ် ပျက်မည်ကို စိုးရိမ်သဖြင့် လွိုင်တွန်းစခန်းမှ တပ်ဆုတ်ပေးခဲ့သည်။

သို့ို့သော် မတ်လ ၁ ရက် တွေ့ဆုံဆွေးနွေးပြီး နောက်ပိုင်း တိုက်ပွဲ ၁၈ ကြိမ် ဆက်လက်ဖြစ်ပွါးခဲ့သေးကြောင်း RCSS/SSA ပြောရေးဆိုခွင့်ရှိသူ ဗိုလ်မှူး စိုင်းခမ်းစံ က သျှမ်းသံတော်ဆင့်သို့ ပြောသည်။

“ တွေ့ဆုံမှု နောက်ပိုင်း တိုက်ပွဲက လျှော့လာပေမယ့် ၁၈ ကြိမ်တော့ ဖြစ်ခဲ့တယ်။ ကျနော်တို့တပ်သားတွေ ဒဏ်ရာရတာလည်းရှိတယ်။ အစိုးရတပ်ဘက်လည်း သေတာ ဒဏ်ရာရတာရှိတယ်” ဟု ဗိုလ်မှူး စိုင်းခမ်းစံ က ဆိုသည်။

ထိုတိုက်ပွဲ အတွင်း RCSS/SSA ဘက်မှ အစိုးရ တပ်မတော် ၏ လက်နက်များ သိမ်းဆည်းရမိကြောင်း လည်း ၎င်းကဆက်လက် ပြောပြသည်။

“အစိုးရ တပ်ရဲ့ သေနတ် ၁၀ လက် လောက် ကျနော်တို့ ရထားတယ်။ MA သေနတ်အမျိုးအစား ပိုများတယ်” ဟု စိုင်းခမ်းစံ က ထပ်လောင်းပြောသည်။

လက်ရှိ မှာ RCSS/SSA နှင့် အစိုးရတပ်မတော်တို့တိုက်ပွဲငြိမ်သက်နေသော်လည်း အစိုးရ တပ်မတော် ၏ စစ်ကြောင်းများသည် ကျေးရွာ အတွင်း လှုပ်ရှားနေဆဲဖြစ်ကြောင်း သိရသည်။

ဖေဖော်ဝါရီ ၂၇ ရက်မှ စတင်သည့် တိုက်ပွဲသည် မိုင်းကိုင်မြို့နယ် အရှေ့ဘက် ကျေးသီး မြို့နယ်ထိ ပြန်နှံ့ှံ့ခဲ့ပြီး မတ် ၂ ရက်နေ့တွင် ကျေးသီး- မိုင်းနောင် ကားလမ်းအား အစိုးရတပ်မတော်က ပိတ်ထား လိုက်သည်။

လက်ရှိတွင် တိုက်ပွဲများ ငြိမ်နေသော်လည်း အဆိုပါကားလမ်းမှာ ဆက်လက်ပိတ်ထားရကြောင်း ကျေးသီးမြို့နယ် ပြည်နယ် လွှတ်တော်အမတ် (၁) စိုင်းစံမိဏ်း က သျှမ်းသံတော်ဆင့် သို့ပြောသည်။

အဆိုပါ လမ်းပိတ်မှုကြောင့် ခရီးသည်များ သွားလာမှု ခက်ခဲနေကြောင်း လည်း စိုင်းစံမိဏ်း က ပြောသည်။

ထိုတိုက်ပွဲများကြောင့် မိုင်းကိုင်မြို့နယ် ဟမ်းငိုင်းကျေးရွာရှိ ဘုန်းကြီးကျောင်းများတွင် စစ်ဘေးရှောင် ၅၀၀ ကျော် ရှိပြီး ကျေးသီးမြို့ အတွင်းရှိ ဘုန်းကြီးကျောင်းတွင် ၁၆၀ ကျော်ရှိကြောင်း သိရသည်။