သျှမ်းပြည်မြောက်ပိုင်း ကွတ်ခိုင်မြို့နယ် အတွင်း ငွေကျပ် ၅၃ ဘီလီယံကျော်တန်ဖိုးရှိ မူးယစ်ဆေးများနှင့် ဆက်စပ်သည့် ပစ္စည်းများထပ်မံ ဖမ်းဆီး ရမိကြောင်း သတင်းရရှိသည်။

ကွတ်ခိုင်မြို့နယ် ကောင်းခါးကျေးရွာ အနီး ရှိ လူမနေသည့် နေအိမ်အတွင်း မတ် ၂ ရက် မနက် ၉ နာရီခွဲက သက်ဆိုင်ရာ လုံခြုံရေး တပ်ဖွဲ့ဝင်များ သွားရောက်စစ်ဆေးရာ မူးယစ်ဆေးဝါး ချက်လုပ်ရာတွင် အသုံးပြုသည့် ပစ္စည်းများ၊ ဆေးပြားရိုက်သည့် စက်များ၊ အက်စစ်ပုံးများ၊ စိတ်ကြွဆေးပြား များနှင့် မော်တော်ယာဉ်များကို သိမ်းဆည်းရမိခဲ့ကြောင်း တပ်မတော် ကာကွယ်ရေး ဦးစီးချုပ် သတင်းပြန်ကြားရေး ဝက်ဆိုဒ်တွင် ဖော်ပြထားသည်။

ဖေဖော်ဝါရီ ၂၉ ရက် မှစတင် ဖမ်းဆီးလိုက်သည့် မူးယစ်ဆေးဝါးများနှင့် ဆက်စပ်သည့် ပစ္စည်းများသည် တန်ဖိုးငွေ ၉၁ ဘီလီယံကျော်ရှိသွားပြီ ဖြစ်ကြောင်း သိရသည်။

အဆိုပါ မူးယစ်ဆေးဝါး ဖမ်းဆီးမှု နှင့် ပတ်သက်ပြီး ဒေသခံ တဦး ၏ အမြင်မှာ “ ကောင်းခါးဘက်မှာ အိမ်တိုင်းနီးပါး မူးယစ်ဆေးဝါး လုပ်တယ်။ အိမ်တိုင်းလိုလို ရှိတယ်။ နောက် လူမရှိတဲ့ အိမ်မှာ ဖမ်းမိတာ ကတော့ ထူးဆန်းတယ်” ဟု သျှမ်းသံတော်ဆင့် သို့ပြောသည်။

လူမနေသည့် အဆောက်အဦး အတွင်း မူးယစ်ဆေး နှင့် ဆက်စပ်သည့် ပစ္စည်းများ ၅၃ ဘီလီယံ ဖမ်းဆီးသည့် အပေါ် စဉ်းစားစရာများရှိနေကြောင်း၊ မူးယစ်ဆေး လုပ်သည့်သူနှင့် ဖမ်းဆီးသည့် အဖွဲ့အစည်းကြား သတင်းပေးမှုမျိုးများ ရှိနေကြောင်း ဟု လည်း ၎င်း ဒေသခံ က သုံးသပ်ပြောသည်။

“ ၂၀၂၀ ရွေးကောက်ပွဲ ရောက်တော့မှာဆိုတော့ တပ်ကလည်း လုပ်ပြတဲ့ သဘောလား။ မူးယစ်ဆေး များရင် တရားခံ တခါမှ မမိတာတော့ စဉ်းစားစရာတွေပဲ” ဟု ကွတ်ခိုင်မြို့ ဒေသခံ စိုင်းလုံ က ပြောသည်။

ကွတ်ခိုင်မြို့နယ် အတွင်း တိုင်းရင်းသားလက်နက်ကိုင်များ၊ ပြည်သူ့စစ်များ နှင့် အစိုးရတပ်မတော် တို့လှုပ်ရှားသည်။

ပြည်ထဲရေး ဝန်ကြီး အသစ် ဒုတိယ ဗိုလ်ချုပ်ကြီး စိုးထွဋ် တက်လာပြီးနောက် သျှမ်းပြည် မြောက်ပိုင်း ကွတ်ခိုင်မြို့နယ် အတွင်း မူးယစ်ဆေးနှင့် ဆက်စပ်သည့် ပစ္စည်းအများဆုံးဖမ်းဆီးရမိမှု ဖြစ်ပါသည်။

ဖေဖော်ဝါရီ ၂၆ ရက်ကလည်း တရုတ်နယ်စပ် မူဆယ် မြို့ နယ်အတွင်း လှုပ်ရှားနေသည့် ပြည်သူ့စစ်များ မိမိနေရပ် ဌာနေကို ပြန်ရန် တပ်မတော် က အမိန့့်ပေးခဲ့ကြောင်းသိရသည်။