သျှမ်းပြည်တောင်ပိုင်း မိုင်းကိုင် -ကျေးသီး ဘက်တွင် ဖြစ်ပွားသည့် တိုက်ပွဲကြောင့် ကျေးသီး-မိုင်းနောင် ကားလမ်းကို အစိုးရတပ်မတော်က ယနေ့အထိ ပိတ်ထားသဖြင့် ခရီးသွား ပြည်သူများ အတွက် အခက်အခဲ ဖြစ်နေကြောင်း သတင်းရရှိသည်။

အဆိုပါ လမ်းပိုင်းကို မတ်လ ၂ ရက် မွန်းလွဲ ၁ နာရီ မှ စပိတ်လိုက်ခြင်းဖြစ်ပြီး၊ ယနေ့ မတ်လ ၃ ရက်ထိ ပြန် မဖွင့်သေးသဖြင့် ခရီးသည်များ လမ်းတွင် ပိတ်မိနေကြကြောင်း ကျေးသီးမြို့နယ် ပြည်နယ် အမှတ်(၁) လွှတ်တော် ကိုယ်စားလှယ် စိုင်းစံမိဏ်း က သျှမ်းသံတော်ဆင့် သို့ ပြောသည်။

သျှမ်းပြည် တောင်ပိုင်း မိုင်းကိုင်မြို့နယ် အတွင်း ဖေဖော်ဝါရီ ၂၇ ရက်မှ စတင်ကာ သျှမ်းပြည် ပြန်လည် ထူထောင်ရေး ကောင်စီ၊ သျှမ်းပြည် တပ်မတော်( RCSS/SSA) နှင့် အစိုးရ တပ်မတော် တို့တိုက်ပွဲဖြစ်ပွားခဲ့သည်။

ထို ဖြစ်ပွားခဲ့သည် တိုက်ပွဲကြောင့် မိုင်းကိုင်မြို့နယ် အရှေ့ဘက် ကျေးသီးမြို့နယ် အထိ ပြန့်နှံ့လာခဲ့သည်။

ထို့ကြောင့် အစိုးရ တပ်မတော် က ကျေးသီး- မိုင်းနောင် ကြား တိုက်ပွဲထိတွေ့မှုများဖြစ်မည်ကို စိုးရိမ်သဖြင့် ကားများ၊ ပြည်သူများ ဖြတ်သန်းသွားလာခြင်းကို ပိတ်လိုက်ခြင်းဖြစ်ကြောင်း စိုင်းစံမိဏ်း က ပြောသည်။

“ အခုက ကျေးသီးဘက်ကနေ သွားရင် ရပေမယ့် မိုင်းနောင်က နေ ကျေးသီးကိုလာမယ်ဆိုရင် ပိတ်ထားတယ်။ ဆိုတော့ ဒီနေ့ ခရီးသွားတွေက ပြန်ပြန်လှည့်သွားနေရတယ် ” ဟု စိုင်းစံမိဏ်း က ဆိုသည်။

ထိုလမ်းပိုင်းသည် ကျေးသီး နှင့် မိုင်းနောင် မြို့နယ် အတွင်းနေထိုင်သည့် ဒေသခံ ပြည်သူများ သီးသန့် အသုံးပြုသည့် လမ်းမဟုတ်ကြောင်း၊ သျှမ်းပြည် တောင်ပိုင်း နမ့်စန်၊ လွိုင်လင်၊ ပင်လုံ၊ လဲချား ကွန်ဟိန်း မှ သျှမ်းမြောက် လားရှိုးကို ဆက်သွယ်ထားသည့် ကားလမ်း လည်းဖြစ်ကြောင်း စိုင်းစံမိဏ်း က ပြောသည်။

“ အခု လမ်းပိတ်တော့ သျှမ်းတောင် ကနေ သျှမ်းမြောက်ကို သွားတဲ့ ခရီးသည်တွေ အတွက် အခက်အခဲဖြစ်တာပေါ့” ဟု စိုင်းစံမိဏ်း က ထပ်လောင်း ပြောသည်။

လက်ရှိ ကျေးသီး နှင့် မိုင်းနောင်မြို့နယ်သို့ အစိုးရ တပ်မတော် မှ အင်အားထပ်မံတိုးဖြည့်နေကြောင်း ဒေသခံများ ပြောပြချက် အရ သိရသည်။

“ တပ်ဘက်က စစ်အင်အားတွေ အများကြီး ထပ်လာတယ်။ ဘာဆက်ဖြစ်မယ်ဆိုတာတော့ မသိဘူး။ လောဆယ် ကားလမ်းတွေလည်း ပိတ်ထားတယ်” ဟု မိုင်းနောင် မြို့နယ် အတွင်းနေထိုင်သည့် အသက် ၃၅နှစ် ကျော် အမျိုးသားတဦး က ပြောသည်။

RCSS/SSA နှင့် အစိုးရ တပ်မတော်သည် ယနေ့အချိန်ထိ စစ်ရေး တင်းမာမှု ဆက်ဖြစ်နေပြီး လွိုင်တွန်းတိုက်ပွဲကြောင့် ကျေးသီးမြို့နယ် တွင်လည်း စစ်ရှောင် ၁၆၀ ကျော် ရှိနေကြောင်းသိရသည်။