မိုင်းကိုင်မြို့နယ် RCSS နှင့် အစိုးရတပ် တိုက်ပွဲ ထပ်ဖြစ် နှစ်ခါပြန် စစ်ရှောင်

0

သျှမ်းပြည် တောင်ပိုင်း မိုင်းကိုင်မြို့နယ် ဟမ်းငိုင်းကျေးရွာ အုပ်စု အတွင်း သျှမ်းပြည် ပြန်လည်ထူထောင်ရေး ကောင်စီ (RCSS/SSA) နှင့် အစိုးရ တပ်မတော် တို့ ယနေ့ နေ့လည် တိုက်ပွဲပြန်လည်ဖြစ်ပွားကာ ဒေသခံများ ထပ်မံ ထွက်ပြေး နေရသည်ဟု သတင်းရရှိသည်။

 

Photo by ဒေသခံတဦး/ ယနေ့ တိုက်ပွဲကြောင့် စစ်ရှောင်လာသည့် ပြည်သူများ

ဟမ်းငိုင်းကျေးရွာ အုပ်စု ကုန်းညောင် ဖာဆားကျေးရွာ အနီးတွင် ယနေ့ (မတ် ၂) ရက် နေ့လည် ၂နာရီခွဲတွင် တိုက်ပွဲ ထပ်မံဖြစ်ပွားပြီး လက်နက်ကြီးများ ကျေးရွာ စာသင်ကျောင်းအနီးတွင် ကျကြောင်း၊ ကျေးရွာ ဒေသခံများ ရွာလုံးကျွတ် စစ်ဘေး ထပ်မံ ရှောင်နေရကြောင်း မိုင်းကိုင်မြို့နယ် ပြည်နယ်အမှတ်(၁) လွှတ်တော်ကိုယ်စားလှယ် စိုင်းပန် က သျှမ်းသံတော်ဆင့် သို့ ပြောသည်။

“ နေ့လည် ၂နာရီခွဲ သေနတ်သံတွေ လက်နက်ကြီးသံတွေကြားရတယ်။ ရွာထဲ ကို လက်နက်ကြီးတွေကျတယ်။ ဘယ်နလုံး ကျလဲဆိုတာ ကျနော်သေချာမသိသေးဘူး” ဟု စိုင်းပန် က ဆိုသည်။

Photo by ဒေသခံတဦး/ ယနေ့ တိုက်ပွဲကြောင့် စစ်ရှောင်လာသည့် ပြည်သူများ

ယနေ့ ဖြစ်ပွားသည့် တိုက်ပွဲကြောင့် ကုန်းညောင် ဖာဆား ကျေးရွာ တရွာလုံး ထွက်ပြေးလာကြောင်း၊ အဆိုပါ ရွာသားများသည် ယမန်နေ့ (မတ် ၁) ရက်တွင် တိုက်ပွဲများပြန် ငြိမ်သွားသဖြင့် မိမိနေရပ်သို့ပြန်သွားသည့် သူများဖြစ်ကြောင်း လည်း စိုင်းပန် က ပြောပြသည်။

“ သူတို့တွေက ၂ခါပြန် စစ်ရှောင်တဲ့သဘောပါပဲ။ မနေ့က ၂ဖက်တပ်တွေ ဆုတ်သွားပြီ။ စစ်ပွဲတွေမရှိတော့ဘူးဆိုလို့ ပြန်ကြတာ။ ဒီမနက်ထိ အေးဆေးပဲ။ နေ့လည် ၂နာရီခွဲမှ ထပ်ဖြစ်တာ။ စစ်ရှောင်တွေ ဘယ်လောက်ရှိလဲဆိုတာ အတိအကျ မရသေးဘူး။ ကောက်နေတုန်း” ဟု စိုင်းပန် က ထပ်လောင်း ပြောသည်။

Photo by ဒေသခံတဦး/ ယနေ့ တိုက်ပွဲကြောင့် စစ်ရှောင်လာသည့် ပြည်သူများ

လက်ရှိထွက်ပြေးလာသည့် ကုန်းညောင် ဖာဆားကျေးရွာ မှ ပြည်သူများသည် ဟမ်းငိုင်းကျေးရွာ အုပ်စု ရှိ လွယ်ဇောက်ကျေးရွာ ရှိ ဘုန်းကြီးကျောင်း နှင့် ကုန်းစုံ ကျေးရွာ ရှိ ဘုန်းကြီးကျောင်းတွင် လာရောက်ခိုလှုံနေကြကြောင်း လည်း စိုင်းပန် က ပြောသည်။

ဆက်လက်ပြီး ကုန်းညောင် ဖာဆားကျေးရွာ မှ စစ်ရှောင်လာသည့် အသက် ၃၀ကျော် စိုင်းကျိန် က “ ဒီနေ့ နေ့လည် ၃နာရီ လောက်မှာ ရွာထဲ မှာ သေနတ်သံတွေကြားတယ်။ လက်နက်တွေလည်း ကျတော့ ပြန်ထွက်ပြေးလာတာပါ” ဟု သျှမ်းသံတော်ဆင့် သို့ ပြောသည်။

RCSS/SSA နှင့် အစိုးရ တပ်မတော် တို့ သည် မိုင်းကိုင်မြို့နယ် ဟမ်းငိုင်းကျေးရွာ အုပ်စု အတွင်း ရှိ လွိုင်တွမ်း တောင်ကြော တွင် ဖေဖော်ဝါရီ ၂၇ ရက် က တိုက်ပွဲစတင်ဖြစ်ပွားကာ ထို စစ်ဘေးရှောင်များ တကြိမ်ထွက်ပြေးခဲ့သည်။

မတ် ၁ရက် တွင် တိုက်ပွဲများ ပြန်လည် ငြိမ်သက်သွားသဖြင့် ကုန်းညောင် ဖာဆား ကျေးရွာ ဒေသခံ အမျိုးသားများ သည် မိမိနေရပ်ကို ပြန်ကာ အိမ်တွင် ကျန်ခဲ့သည့် ကြက်များ၊ နွားများကို ပြန်သွားကြည့်ကြကြောင်း၊ ယနေ့နေ့လည် တိုက်ပွဲ ပြန်ဖြစ်သဖြင့် ပြန်ကာ ထွက်ပြေးလာရကြောင်း စစ်ရှောင် အမျိုးသား စိုင်းကျိန် ကပြောသည်။

RCSS/SSA သည် လက်ရှိ ဆောင်ရွက်နေသည့် ငြိမ်းချမ်းရေး ကို ထိခိုက်မည်ကို စိုးရိမ်သဖြင့် RCSS/SSA တပ်စခန်းဖြစ်သည့် လွိုင်တွမ်းတောင် စခန်းကို ရှောင်တိမ်းပေးရကြောင်း သိရသည်။

RCSS/SSA တပ်စခန်း ရှောင်ထွက်ခဲ့သော်လည်း လက်ရှိ မှာ တိုက်ပွဲများ ပြန်ဖြစ်သည့် အပေါ် ဒေသခံများ က စိုးရိမ်နေကြသည်။

“ သတင်းတွေမှာ RCSS က တပ်ဆုတ်လိုက်ပြီ၊ တပ်၂ဖက် ညှိလို့ရပြီ၊ တိုက်ပွဲမဖြစ်တော့ဘူးဆိုပြီးတွေ့တော့ ကျနော်တို့ ပြန်တယ်။ ဒါပေမယ့် တိုက်ပွဲက ပြန်ဖြစ်တော့ ကျနော်တို့ဘာကို ယုံရမှာလဲ” ဟု ကုန်းစုံ ကျေးရွာ ဘုန်းကြီးကျောင်းသို့ရောက်နေသည့် စစ်ရှောင် အမျိုးသား တဦး က ပြောသည်။

လက်ရှိမှာ သျှမ်းပြည် တောင်ပိုင်း မိုင်းကိုင် မြို့နယ် ဟမ်းငိုင်းကျေးရွာ အုပ်စု လွိုင်တွမ်းတောင်ကြော အရှေ့ဘက်တွင် ကျေးသီးမြို့နယ်၊ အနောက်ဘက်တွင် မိုင်းကိုင်မြို့နယ်တို့ ရှိသည်။

ထို့ကြောင့် စစ်ရှောင်များသည် မိုင်းကိုင်မြို့နယ် နှင့် ကျေးသီးမြို့နယ် အတွင်း ထွက်ပြေးတိမ်းရှောင်နေရကြောင်း သိရသည်။

Leave a Comments

SHARE