NCA လက်မှတ်ထိုးထားသည့် အဖွဲ့တချို့ နှင့် တပ်မတော် ကြား ထိတွေ့ ပစ်ခတ်မှု ရှိသော်လည်း NCA အတိုင်း ညှိနှိုင်း အဖြေရှာ သွားမည် ဟု PPST ယာယီ အဖွဲ့ခေါင်းဆောင် ဗိုလ်ချုပ်ကြီး ယွက်စစ် က ပြောသည်။

ယနေ့ ၉ ကြိမ်မြောက် ငြိမ်းချမ်းရေး လုပ်ငန်းစဉ် ဦးဆောင် အဖွဲ့ (PPST ) အစည်းအဝေး ကို ထိုင်းနိုင်ငံ ချင်းမိုင်တွင် မတ် ၂ ရက်မှ ၃ ရက်ထိ ပြုလုပ်နေသည်။

အဆိုပါ အစည်းအဝေး တွင် တနိုင်ငံလုံး အပစ်ခတ်ရပ်စဲရေး သဘောတူညီစာချုပ်( NCA) လက်မှတ်ရေးထိုးသည့် အဖွဲ့ တချို့ နှင့် တပ်မတော် ကြား မတော်တဆ ထိတွေ့ ပစ်ခတ်မှု ရှိကြောင်း၊ ထို ကိစ္စများကို NCA အတိုင်း ဆွေးနွေးခြင်းနှင့် အဖြေရှာသွားမည်ဟု ဗိုလ်ချုပ်ကြီး ယွက်စစ်က အဖွင့်မိန့်ခွန်းတွင် ထည့်သွင်းပြောသည်။

“ပြဿနာ အသေးအမွှား၊ နားလည်မှုလွဲခြင်းတွေကြောင့် လက်ရှိ တဖြည်းဖြည်းချင်း ချီတက်နေတဲ့ ငြိမ်းချမ်းရေး လုပ်ငန်းစဉ်ကို အထိအခိုက် အပွန်းအပဲ့ မခံစေရပါဘူး။ NCA ပူးတွဲ ပိုင်ရှင် တွေဖြစ်လို့ NCA အပေါ် တာဝန်ယူမှု တာဝန်ခံမှု ရှိရပါမယ်” ဟု ဗိုလ်ချုပ်ကြီး ယွက်စစ် က ထည့်သွင်းပြောခဲ့သည်။

ယနေ့ကျင်းပသည့် PPST အစည်းအဝေးသည် ပြည်ထောင်စု မပြိုကွဲရန် တပ်မတော် မှ အာဏာသိမ်း ခဲ့သည်မှာ (၅၈)နှစ် ပြည့်သည့်ရက်လည်း ဖြစ်ကြောင်း၊ အာဏာသိမ်းသူများသည် ပြည်ထောင်စု မပြိုကွဲ အောင် ကယ်တင်သည်  ဟု ဆိုသော်လည်း တိုင်းရင်းသားများ အနေဖြင့် ပြည်ထောင်စု ပြိုကွဲသည့်နေ့ဟု သတ်မှတ်ခဲ့ကြောင်း ဗိုလ်ချုပ်ကြီး  ယွက်စစ် က ထပ်လောင်း ထည့်သွင်းပြောဆိုလိုက်သည်။

ဆက်လက်ပြီး လက်ရှိ အချိန်သည် ကမ္ဘာတဝန်းလုံး ရှိ နိုင်ငံပေါင်း (၅၀) ကျော် ကိုခိုနာ ဗိုင်းရပ်စ် အဆုတ်ရောင် ကပ်ဘေး ရောဂါဆိုးကြီး သည် လျင်မြန်စွာ ဖြင့် ကူးစက်နေကြောင်း၊ ထိုရောဂါနှင့် ပတ်သက်ပြီး တိုင်းရင်းသားလက်နက်ကိုင် အားလုံးအနေဖြင့် ကျန်းမာရေးဆိုင်ရာ သတိပေးချက်၊ တားမြစ်ချက် လိုက်နာဆောင်ရွက်သွားကြရန်လည်း တိုက်တွန်းပြောဆိုလိုက်သည်။