ငြိမ်းချမ်းရေး ထိခိုက်မည် ကို စိုးရိမ်သဖြင့် RCSS/SSA တပ်စခန်းရှောင်

0

သျှမ်းပြည် တောင်ပိုင်း မိုင်းကိုင်မြို့နယ် အတွင်းဖြစ်ပွားနေသည့် တိုက်ပွဲ သည် ငြိမ်းချမ်းရေး လုပ်ငန်းစဉ်ကို ထိခိုက်မည်ကို စိုးရိမ်သဖြင့် တပ်စခန်းရှောင်လိုက်ရခြင်းဖြစ်သည် ဟု RCSS/SSA ကပြောသည်။

Photo by တပ်မတော် ကာကွယ်ရေး ဦးစီးချုပ်ရုံး သတင်းဝက်ဆိုဒ်

မိုင်းကိုင်မြို့နယ် ဟမ်းငိုင်းကျေးရွာ အုပ်စုအတွင်း ဖေဖော်ဝါရီ ၂၇ ရက် မနက် မှ စတင်ကာ သျှမ်းပြည် ပြန်လည် ထူထောင်ရေး ကောင်စီ၊ သျှမ်းပြည် တပ်မတော်( RCSS/SSA) နှင့် အစိုးရ တပ်မတော် တို့ တိုက်ပွဲဖြစ်ပွားခဲ့သည်။

ထို တိုက်ပွဲသည် ၃ ရက်ကြာဖြစ်ပွားကာ RCSS/SSA တပ်စခန်းချသည့် ဟမ်းငိုင်းကျေးရွာ အုပ်စု အနီး လွိုင်တွမ်းတောင် စခန်း မှ ရှောင်ပေးလိုက်ရကြောင်း RCSS/SSA မှ ပြောရေး ဆိုခွင့်ရှိသူ ဗိုလ်မှူး စိုင်းခမ်းစံ က သျှမ်းသံတော်ဆင့် သို့ ပြောသည်။

“ မနေ့က မနက် ကျနော်တို့ ( RCSS/SSA ) ခေါင်းဆောင်နဲ့ တပ်ဘက်က ခေါင်းဆောင်တွေ့ဆုံ ညှိနှိုင်းကြတယ်၊ ကျနော်တို့ လက်ရှိ ငြိမ်းချမ်းရေး ဆွေးနွေးပွဲတွေ မပျက်အောင်လို့ ရှောင်လိုက်တဲ့ သဘောပါပဲ” ဟု ဗိုလ်မှူး စိုင်းခမ်းစံက ဆိုသည်။

RCSS/SSA အနေဖြင့် တပ်စခန်း ရှောင်လိုက်ခြင်းသည် တိုက်ပွဲထပ်မံ မဖြစ်ပွားရန် နှင့် နိုင်ငံရေး ဆွေးနွေးပွဲ စတင်နိုင်ရန် အတွက် ရှောင်လိုက်ခြင်းဖြစ်သည် ဟု ဗိုလ်မှူး စိုင်းခမ်းစံ က ပြောသည်။

Photo by တပ်မတော် ကာကွယ်ရေး ဦးစီးချုပ်ရုံး သတင်းဝက်ဆိုဒ်

“ ကျနော်တို့ ရှောင်လိုက်ရင် တပ် (အစိုးရ တပ်မတော်) က ထပ်မတက်လာတော့ဘူး။ သူတို့ မတက်လာရင် တိုက်ပွဲ က မဖြစ်တော့ဘူး ဆိုတဲ့သဘောပါ” ဟု ဗိုလ်မှူးစိုင်းခမ်းစံ က ဆိုသည်။

တိုက်ပွဲဖြစ်ပွားသည့်နေရာ တွင် မူးယစ်ဆေးဝါး သတင်းများရရှိသဖြင့် တပ်မတော် စစ်ကြောင်း များက ဝင်ရောက်ကာ နယ်မြေ လုံခြုံရေး ဆောင်ရွက်သွားမည် ဖြစ်ကြောင်း ဖေဖော်ဝါရီ ၂၂ရက် မနက်ပိုင်းတွင် ခိုလမ်မြို့ ရှိ RCSS/SSA အဖွဲ့ ဆက်ဆံရေး တာဝန်ခံ ကို အသိပေးအကြောင်းကြားခဲ့သည် ဟု တပ်မတော်ကာကွယ်ရေး ဦးစီးချုပ်ရုံး ဝက်ဆိုဒ်တွင် မတ် ၁ရက် ၌ထုတ်ပြန်ခဲ့သည်။

ထို အသိပေး အကြောင်းကြားစာတွင် RCSS/SSA အဖွဲ့ မှ တပ်များ နယ်မြေ ကျော်လွန် ရောက်ရှိနေပါက အချိန်မီ ထွက်ခွာနိုင်ရေးကို ပါ ထည့်သွင်း ပြောကြားခဲ့ကြောင်း ထုတ်ပြန်ချက်တွင်ရေးသားထားသည်။

Photo by တပ်မတော် ကာကွယ်ရေး ဦးစီးချုပ်ရုံး သတင်းဝက်ဆိုဒ်

အဆိုပါ ကိစ္စနှင့် ပတ်သက်ပြီး RCSS/SSA ပြောရေးဆိုခွင့်ရှိသူ ဗိုလ်မှူး ခမ်းစံက “ ကျနော်တို့ သိရသလောက် ခိုလမ်း ဆက်ဆံရေးရုံးကို စာပေးတာ။ ဝန်ကြီးခရီးစဉ်ရှိတယ်။ဝန်ကြီးခရီးစဉ်ရှိလို့ ကျနော်တို့ ရဲဘော်တွေနဲ့ လမ်းမှာ ထိပ်တိုက်တိုးမှာ စိုးလို့ ရှောင်ပေးဖို့ အဲ့လောက်ပါပဲ” ဟု သျှမ်းသံတော်ဆင့် ကို ပြောသည်။

RCSS/SSA နှင့် အစိုးရ တပ်မတော်တို့ ၃ရက်ကြာ ဖြစ်ပွားသည့် တိုက်ပွဲ ကြောင့် မိုင်းကိုင်မြို့နယ် ဟမ်းငိုင်းကျေးရွာ အုပ်စု အတွင်းရှိ ဒေသခံ ပြည်သူ ၃၀၀ နီးပါးသည် ဟမ်းငိုင်းကျေးရွာ အတွင်းရှိ ဘုန်းကြီးကျောင်းများတွင် လာရောက် ရှောင်ခဲ့သည်။

ယမန်နေ့ (မတ် ၁) ရက်တွင် တိုက်ပွဲများ ငြိမ်သွားသဖြင့် မိမိတို့ နေရပ်သို့ ပြန်သွားကြပြီး ဖြစ်ကြောင်း သိရသည်။

Leave a Comments

SHARE