သျှမ်းပြည်တောင်ပိုင်း မိုင်းကိုင်မြို့နယ် အတွင်း သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော်(RCSS/SSA) တပ်စခန်းကို မြန်မာ့တပ်မတော် က လက်နက်ဖြင့် ပစ်ခတ်သည် ဟု သတင်းရရှိသည်။
ယနေ့ (ဖေဖော်ဝါရီ ၂၇) ရက် မနက် ၈နာရီ ကျော်မှစတင်ကာမိုင်းကိုင်မြို့နယ် ဟမ်းငိုင်းကျေးရွာ အုပ်စု အတွင်း RCSS/SSA ၏ လွိုင်တောင်း စခန်းကို မြန်မာ့တပ်မတော်က ဝင်ရောက် ပစ်ခတ်ခဲ့ကြောင်း၊ လက်ရှိ အချိန်ထိ ပစ်ခတ်နေဆဲ ဟု တိုက်ပွဲဖြစ်ပွားနေသည့် နေရာ မှ RCSS/SSA ၏ အရာရှိ တဦးက သျှမ်းသံတော်ဆင့် သို့ ပြောသည်။
“ ဒီမနက် ကျနော်တို့ လွိုင်တောင်း စခန်းကို ဖြတ်ဖို့ ခွင့်လာတောင်းတယ်။ ကျနော်တို့ အထက်ကို တင်ပြနေချိန် မှာပဲ မြန်မာ့တပ်မတော်က ကျနော်တို့ကို မနက် ၈ နာရီက စပစ်တာ။ ကျနော်တို့ ပြန်မပစ်ဘူး။ သူတို့ တဖတ်သတ် ပစ်နေတာပါ” ဟု အဆိုပါ အရာရှိ က ပြောသည်။
လက်ရှိ မွန်းလွှဲပိုင်း အချိန် ၁ နာရီ သျှမ်းသံတော်ဆင့် သတင်းဌာန ဆက်သွယ်မေးမြန်းသည့် အချိန်တွင် သေနတ်သံများ ကြားနေရကြောင်း လည်း RCSS/SSA အရာရှိ က ဆိုသည်
“ အခုထိ ကြားနေရတယ်။ တပ်မတော်က စစ်အင်အားတွေလည်းထပ်ပို့နေတယ်။ ရဟတ်တွေလာဝဲနေတယ်။ ပစ်တော့ မပစ်ဘူး။ သေနတ်သံတော့ ဆက်တိုက်ပဲ” ဟု ၎င်း အရာရှိ က ထပ်လောင်းပြောသည်။
မိုင်းကိုင်မြို့နယ် ဟမ်းငိုင်းကျေးရွာအုပ်စု အတွင်း RCSS/SSA နှင့် မြန်မာ့တပ်မတော်တို့ သည် မနက် ၈နာရီ မှစတင်သည့် တိုက်ပွဲသည် ယခုချိန်ထိ ဆက်တိုက်ဖြစ်နေကြောင်း၊ ရဟတ်ယာဉ်များလည်း ကောင်းကင်တွင် ပျံဝဲနေကြောင်း လည်း ဟမ်းငိုင်းကျေးရွာ ဒေသခံ စိုင်းဆိုင် က ပြောသည်။
“ အသံကတော့ တော်တော်ကျယ်တယ်။ လောဆယ်တော့ ဘယ်မှ ထွက်လို့ မရသေးဘူး။ အိမ်ထဲမှာပဲ နေနေရတယ်။ စစ်ကြောင်းတွေကလည်း ထပ်လာနေတယ်” ဟု စိုင်းဆိုင် က ဆိုသည်။
လက်ရှိ အချိန် ထိ ဟမ်းငိုင်း ကျေးရွာ အနီးရှိ ပြည်သူများ မြို့ ပေါ်သို့ထွက်ပြေးလာခြင်းမရှိသေးကြောင်း၊ တိုက်ပွဲများ ဆက်ပြီး ဖြစ်ရင် အခြေအနေ ဆိုးရွားလာနိုင်ပြီး ငြိမ်းချမ်းရေး ပျက်နိုင်ကြောင်းလည်း မိုင်းကိုင် ဒေသခံများက ပြောဆိုသည်။
“ ဒီလို တိုက်ပွဲတွေဆက်ဖြစ်နေမယ်။ တပ်မတော်က စစ်အင်အားတွေ ထပ်တိုးချဲ့နေမယ်ဆိုရင်တော့ ငြိမ်းချမ်းရေးက ဆက်အဆင်မပြေနိုင်ဘူး” ဟု မိုင်းကိုင်ဒေသခံ တဦး က မှတ်ချက်ပြုသည်။
RCSS/SSA သည် တနိုင်ငံလုံ ပစ်ခတ်တိုက်ခိုက်ရေး ဆိုင်ရာ သဘောတူညီစာချုပ် (NCA)လက်မှတ်ရေးထိုးထားသည့် တိုင်းရင်းသား လက်နက်ကိုင် တဖွဲ့ ဖြစ်ပြီး၊ စတုတ္တကြိမ် ၂၁ပင်လုံငြိမ်းချမ်းရေး ဖော်ဆောင်ရေးအတွက် ဦးဆောင်ကြိုးပမ်းနေသည့် အဖွဲ့တဖွဲ့လည်း ဖြစ်သည်။
“ တဖက်က ငြိမ်းချမ်းရေးတွေ ဖော်ဆောင်နေချိန်မှာ တဖက်က တိုက်ပွဲတွေဖြစ်တော့ တပ်မတော်က ငြိမ်းချမ်းရေး ပယ်ဖျက်နေတာလား” ဟု RCSS/SSA ၏ အရာရှိ တဦးက မေးခွန်းထုတ်လိုက်သည်။
သင်္ကြန် မတိုင်မီ သျှမ်းအမျိုးသားအဆင့် နိုင်ငံရေး ဆွေးနွေးပွဲ ကျင်းပသွားမည် ဟု ယခု လ ၂၄ရက်တွင် RCSS/SSA က ထုတ်ပြန်ကြေညာခဲ့သည်။
ထိုထုတ်ပြန်ကြေညာချက် ပြီးနောက်ပိုင်း တိုက်ပွဲဖြစ်ပွားသည့်အတွက် မြန်မာ့တပ်မတော်သည် ငြိမ်းချမ်းရေးကို မလိုလားကာ တိုက်ပွဲဖန်တီးခြင်းဖြစ်သည်ဟုလည်း RCSS/SSA ၏ အရာရှိ က ထောက်ပြ ပြောဆိုလိုက်သည်။
မြန်မာ့တပ်မတော်သည် ယခုလ ၁၆ ရက်နေ့မှစတင်ကာ သျှမ်းပြည်တောင်ပိုင်း လွိုင်လင်ခရိုင် အတွင်း စစ်ကြောင်းများ တိုးချဲ့လာသည်ဟုလည်း ဒေသခံများ ပြောပြချက် အရသိရသည်။
ယနေ့ တိုက်ပွဲနှင့် ပတ်သက်ပြီး မြန်မာ့တပ်မတော် သတင်းမှန် ပြန်ကြားရေး အဖွဲ့ ကို သျှမ်းသံတော်ဆင့် မှ ကြိုးစားပြီး ဆက်သွယ်ခဲ့သော်လည်း မရခဲ့ပေ။
