၂၀၁၇ ခုနှစ်ကတည်းက ကျင်းပခွင့်မရခဲ့သည့် သျှမ်းအမျိုးသားအဆင့် နိုင်ငံရေးဆွေးနွေးပွဲအား လာမည့် ဧပြီလ ဆန်းပိုင်းအတွင်းကျင်းပသွားမည်ဟု တနိုင်ငံလုံးအပစ်အခတ်ရပ်စဲရေးစာချုပ် NCA လက်မှတ်ရေးထိုးသည့် သျှမ်းပြည်ပြန်လည်ထူထောင်ရေးကောင်စီ သျှမ်းပြည်တပ်မတော် RCSS/SSA က နှစ်ပတ်လည်အစည်းအဝေး အပြီး ထုတ်ပြန်ကြေငြာသည်။

RCSS/SSA ၏ အကြိမ် ၂၀ မြောက် နှစ်ပတ်လည်အစည်းအဝေးအား ဖေဖေါ်ဝါရီ ၂၁ ရက် မှ ၂၄ ရက်နေ့အထိ လွယ်တိုင်းလျန်းဗဟိုဌာနချုပ်တွင်ကျင်းပပြုလုပ်ခဲ့သည်။ အစည်းအဝေးအပြီး အချက် ၆ ချက်ပါ ကြေငြာချက် တစ်စောင်ထုတ်ပြန်ရာ သျှမ်းအမျိုးသားအဆင့် နိုင်ငံရေးဆွေးနွေးပွဲ ND- National Dialogue ကျင်းပနိုင်ရေးဆောင်ရွက်သွားမည်ဟု ထည့်သွင်းထုတ်ပြန်ထားသည်။

RCSS/SSA ပြောခွင့်ရပုဂ္ဂိုလ်ဗိုလ်မှူးခမ်းစံက – “ပြီးခဲ့တဲ့ JICM အစည်းအဝေးမှာ UPC ငြိမ်းချမ်းရေး ဆွေးနွေးပွဲပြုလုပ်မယ်လို့ ဘဘောတူခဲ့တာတစ်ခုရှိပါတယ်။ အဲရှေ့မတိုင်ခင်မှာတော့ ဧပြီလဆန်းပိုင်း မှာ သျှမ်းအမျိုးသားအဆင့် ND ဆွေးနွေးပွဲကို သျှမ်းပြည်တောင်ပိုင်း လင်းခေးမြို့မှာ ကျင်းပဖို့ သဘောတူထားတယ်” – ဟု ပြောပါသည်။

လင်းခေးမြို့တွင်ပြုလုပ်မည့် သျှမ်းအမျိုးသားအဆင့် ND ဆွေးနွေးပွဲ ဖြစ်မြောက်ရေးအတွက် အလုပ်အမှုဆောင်ဖွဲ့ မဖွဲ့ရသေးကြောင်း၊ အလုပ်အမှုဆောင်ဖွဲ့ ဖွဲ့စည်းနိုင်ရန် အတွက် မကြာမီ အစည်းအဝေးခေါ် ယူကျင်းပသွားမည်ဖြစ်ကြောင်း၊ အလုပ်အမှုဆောင်အဖွဲ့ ဖွဲ့စည်းပြီးပါက မတ်ချ် လနှောင်းပိုင်း တွင် ကြိုတင်ပြင်ဆင်သည့်အစည်းအဝေးတရပ်ကျင်းပသွားမည်ဖြစ်ကြောင်း သိရသည်။

တတိယ အကြိမ်ပြည်ထောင်စု ငြိမ်းချမ်းရေးညီလာခံ မကျင်းပမီ ၂၀၁၇ ခု နှစ်ဆန်းပိုင်းက သျှမ်းအမျိုးသားအဆင့် နိုင်ငံရေးဆွေးနွေးပွဲ ကျင်းပရန် တောင်ကြီးမြို့ သို့မဟုတ် ပင်လုံမြို့ တွင် ပြင်ဆင်ခဲ့ဖူးသည်။

သို့သော် အစိုးရ နှင့် တပ်မတော်က ထိုမြို့များတွင် ကျင်းပခွင့်မပေးသည့်အပြင် လူထု သဘောထားရယူရန် လူထုတွေ့ဆုံပွဲများအားလည်း အစိုးရတပ်မတော်မှ လိုက်လံပိတ်ပင်သည့်အတွက် တတိယအကြိမ် ၂၁ ရာစု ပင်လုံ ညီလာခံ ခေါ် ပြည်ထောင်စု ငြိမ်းချမ်းရေးညီလာခံ ကျင်းပပြီးစီးသွားသော်လည်း သျှမ်းအမျိုးသား အဆင့် နိုင်ငံရေးဆွေးနွေးပွဲအား ယနေ့တိုင်ကျင်းပနိုင်ခြင်းမရှိသေးပေ။

(ယိင်းယိင်း ရေးသားပေးပို့သည်)