သျှမ်းပြည်မြောက်ပိုင်း မူဆယ်မြို့ ပြည်သူ့ဆေးရုံတွင် Novel Corona Virus (ခိုရိုနာဗိုင်းရပ်စ်) ကူးစက်မြန် အဆုတ်ရောင် ရောဂါ သံသယရှိ အမျိုးသားတဦး ရောက်ရှိနေကြောင်း သတင်းရရှိသည်။
ခိုရိုနာ ဗိုင်းရပ်စ် သံသယရှိ အမျိုးသား သည် အသက် ၂၃နှစ်အရွယ်ရှိပြီး လွန်ခဲ့သည့် ၁၅ရက်ခန့်၌ တရုတ်ပြည် ရွှေလီမြို့ ရှိ ကားဝပ်ရှော့ တခုတွင် အလုပ်လုပ်ပြီး ဖေဖော်ဝါရီ ၂၄ရက် တွင် ရွှေလီမြို့ မှ မူဆယ်မြို့ သို့ ပြန်ခဲ့ကြောင်း သိရသည်။
ထိုမှတဆင့် ဖေဖော်ဝါရီ ၂၅ရက် တွင် မူဆယ်မြို့ မှ ရွှေလီမြို့ သို့ ပြန်သွားရာ မူဆယ်-မန့်ဝိန်း နယ်စပ် ဂိတ်တွင် မြို့နယ် ပြည်သူ့ကျန်းမာရေး မှ စစ်ဆေးရာ အဆိုပါ အသက် ၂၃နှစ် အရွယ် အမျိုးသားသည် အဖျား (၁၀၀) ဒီဂရီ ဖာရင်ဟိုက် ရှိကြောင်း တွေ့ရသည်။
ထို့ကြောင့် အဆိုပါ အမျိုးသား ကို မူဆယ်မြို့ ပြည်သူ့ဆေးရုံ တွင် ခိုရိုနာ ဗိုင်းရပ်စ် သံသယရှိသူအဖြစ် သီးသန့်စောင့်ကြည့်လူနာ အဖြစ် သတ်မှတ်ထားကာ ကုသနေကြောင်း၊ ၎င်း လူနာ၏ ဓာတ်ခွဲ နမူနာကို ရန်ကုန်မြို့ ရှိ အမျိုးသားကျန်းမာရေး ဓာတ်ခွဲမှု ဆိုင်ရာ ဌာန ကို ပေးပို့ စစ်ဆေးရန် စီစဉ်ဆောင်ရွက်နေကြောင်း အားကစား နှင့် ကျန်းမာရေး ဝန်ကြီးဌာန ထုတ်ပြန်ချက် တွင်ရေးသားထားသည်။
ခိုရိုနာ ဗိုင်းရပ်စ် သံသယ ရှိလူနာ အား စစ်ဆေးရာ လက်တလော ပြင်ထန်း အသက်ရှူ လမ်းကြောင်းဆိုင်ရာ ရောဂါ လက္ခဏာများ မတွေ့ရှိသေးကြောင်းလည်း အဆိုပါ ထုတ်ပြန်ချက်တွင် ဖော်ပြထားသည်။
မူဆယ်မြို့ ပြည်သူ့ဆေးရုံတွင် တက်ရောက်နေသည့် ခိုရိုနာ သံသယရ ရှိသူ အမျိုးသားအခြေအနေ နှင့် ပတ်သက်ပြီး မူဆယ်ပြည်သူ့ဆေးရုံ တွင် တာဝန်ကျသည့် ဆရာဝန်များ၊ ဆရာမများ ပွင့်လင်းမြင်သာစွာ ပြည်သူကို ချပြ ပြောဆိုခြင်းမရှိကြောင်းလည်း မူဆယ်ဒေသခံများက ပြောသည်။
“ ကျနော် ပြည်သူ့ဆေးရုံ လူနာ ဆောင်မှာ တာဝန်ကျတဲ့ ဆရာမကိုမေးတာတောင် သူတို့က မသိဘူး၊ မရှိဘူးပဲ ဒီနေ့ထိပြောနေတယ်။ သူတို့တောင်မရှိဘူး၊ မသိဘူးပြောနေတာ ဆိုတော့ ကျနော်တို့လည်း ဘာမှ မသိဘူး” ဟု မူဆယ်မြို့ဒေသခံ စိုင်းကွမ်း ကပြောသည်။
မူဆယ်မြို့တွင် ခိုရိုနာ ဗိုင်းရပ်စ် နှင့် ပတ်သက်ပြီး ပညာပေးမှု အားနည်းကြောင်း၊ ဆေးရုံဝန်းအတွင်း သွားလာသူများသည် မျက်နှာစည်း( Mark)များ ကို အသုံးပြုခြင်းမရှိဘဲ သွားလာနေကြကြောင်း၊ မြို့လည်တွင် လှုပ်ရှားသူများလည်း Mark ကို တပ်ကြခြင်းမရှိကြောင်း စိုင်းကွမ်း က ပြောသည်။
ထို့ပြင် မူဆယ်ပြည်သူ့ဆေးရုံ ကို သျှမ်းသံတော်ဆင့် မှ ဆက်သွယ်ပြီး ခိုရိုနာ ဗိုင်းရပ်စ် သံသယရှိသူ အကြောင်း နှင့် ပတ်သက်ပြီးမေးမြန်းရန် ကြိုးစားခဲ့သော်လည်း မရရှိခဲ့ပေ။
ယခုလ အစောပိုင်းတွင်လည်း တရုတ်နိုင်ငံသား တဦး မူဆယ်မြို့ ပြည်သူ့ဆေးရုံတွင် နှလုံးရောဂါ၊ အဆုတ်ရောင်(TB) ဖြင့် သေဆုံးခဲ့သေးကြောင်းသိရသည်။
ခိုရိုနာ ဗိုင်းရပ်သည် တရုတ်နိုင်ငံ ဝူဟန်မြို့ မှ စတင် ဖြစ်ပွားခဲ့ကာ လက်ရှိမှာ နိုင်ငံပေါင်း (၄၀) ကူးစက်ခံရပြီး၊ လူဦးရေ (၈၀၉ ၇၀) ဦး ကူးစက်ခံရ ကာ၊ သေဆုံးသူ (၂၇၆၃) ဦးရှိပြီး၊ ပြန်လည်နေကောင်းလာသူ (၂၉၉၉၈) ဦးရှိကြောင်း ယနေ့ နေ့လည်ပိုင်းချိန်ထိ China Morning Post သတင်းဌာန ထုတ်ပြန်ချက် အရ သိရသည်။
မူဆယ်မြို့သည် တရုတ်နယ်စပ် ဝင်၊ထွက်ပေါက် အများဆုံးရှိသည့် နေရာဖြစ်ပြီး ရွှေ့ပြောင်းအလုပ်သမားများနေ့စဉ် သောင်းချီ ဝင်၊ထွက်သွားလာသည့် မြို့ဖြစ်သည်။
