မြန်မာ-တရုတ်နယ်စပ် မူဆယ်မြို့ ဈေးရပ်ကွက် မြို့လယ်ခေါင်တွင် တရုတ်ငွေလဲသည့်နေရာတွင် ယနေ့ မနက်(၆နာရီခွဲ)တွင် အမည်မသိ အမျိုးသား ၄ဦးက လာရောက်ကာ ဓားပြတိုက်ခဲ့ကြောင်း သတင်းရရှိသည်။

ယနေ့ ( ဖေဖော်ဝါရီ ၂၆) ရက် မနက် ၆နာရီခွဲ အချိန်တွင် တရုတ်ငွေလဲသည့် အမျိုးသမီး ၂ဦးထံ အမည်မသိ အမျိုးသား ၄ဦး ကားဖြင့် မောင်းလာကာ ကျပ်သိန်း ၁၀၀ ကျော် ဓားပြတိုက် သွားကြောင်း မျက်မြင်သက်သေ အမျိုးသမီး နန်းမေ က သျှမ်းသံတော်ဆင့် သို့ ပြောသည်။

“ အမျိုးသား ၄ဦး ကားမောင်းလာတယ်။ ၃ဦးကတော့ ကားပေါ်ကနေ ဆင်းလာတယ်။ ကျမတို့က ငွေလဲမယ်ပဲထင်တာ။ ကျမတို့ နားရောက်တော့ ငွေထုတ် တန်းလုသွားတယ်၊ ဓားတွေပါလာတယ်” ဟု နန်းမေ က ပြောသည်။

အဆိုပါ ဓားပြတိုက် ၄ဦးသည် အဖြူရောင် တရုတ်ကားကို မောင်းလာပြီး၊ ငွေထုတ်လုပြီးနောက် “ မင်္ဂလာမူဆယ်” ဘက်သို့ ထွက်ပြေးသွားကြောင်း သိရသည်။

ငွေများကို ဓားပြတိုက် လုယူသွားချိန်တွင် ဘေးပတ်ဝန်းကျင်၌ ကားသမားများ၊ အခြား ပြည်သူများ ရှိနေသော်လည်း တစုံတရား ကူညီပေးခြင်း မရှိကြောင်း၊ ထို ဓားပြတိုက်ခံရကြောင်တွင် ကြောက်စိတ်ကြောင့် ဓားပြ များကို တုန့်ပြန်မှု မရှိခဲ့ကြောင်းလည်း နန်းမေ က ပြောသည်။

“ တကယ်တော့ ကျမတို့ ၂ယောက်ထိုင်နေတာ။ သူတို့က ၂ယောက်စလုံး ရဲ့ ငွေအိတ်လုဖို့ ကြိုးစားတယ်။ ကျမရဲ့ ဘေးမှာ ထိုင်တဲ့ ပီမီးငွေပဲ လုလို့ ရသွားတယ်” ဟု နန်းမေ က ဆိုသည်။

အဆိုပါ ကိစ္စနှင့် ပတ်သက်ပြီး မူဆယ်မြို့မ ရဲစခန်းကို ဆက်သွယ်မေးမြန်းရာ တာဝန်ကျသည့် ရဲတဦးက က “ ငွေလဲတဲ့ အမျိုးသမီး ငွေလုခံရတာ ဟုတ်ပါတယ်။ ကျနော်တို့ အခု တရားခံကို လိုက်လံ ဖမ်းဆီးနေပါတယ်။ ခုထိတော့ တရားခံ မရသေးဘူး” ဟု သျှမ်းသံတော်ဆင့် ကို ပြောသည်။

ဓားပြတိုက်သည့် အမျိုးသား ၄ဦး “ မင်္ဂလာမူဆယ်” ဘက်သို့ဆင်းသွားပြီးနောက် သက်ဆိုင်ရာများ၊ ရဲတပ်ဖွဲ့များ ရောက်လာပြီး၊ အမှုဖွင့်ထားကြောင်းလည်း ငွေလှဲသည့် အသိုင်းအဝန်းက ပြောသည်။

“ ရဲတွေကတော့ ဓားပြ တွေပြန်မှ သူတို့ရောက်လာတယ်။ နောက် အမှုဖွင့်ပေးတယ်လို့ပြောတာပဲ။ ကျမတို့လည်း ဓားပြတဲ့သူပုံစံ သေချာမမြင်လိုက်ရဘူး။ ကားနံပတ်လည်း မကြည့်လိုက်ဘူး” ဟု ငွေလဲသည့် အမျိုးသမီး နန်းဆာ က ပြောသည်။

မူဆယ်မြို့တွင် တရုတ်ငွေလဲသည့် အမျိုးသမီးများကို မကြာခဏ ငွေလုယက်မှု၊ ဓားပြတိုက်မှု ရှိခဲ့သော်လည်း တရားခံကို တကြိမ်တခါမှ မဖမ်းမိခဲ့ကြောင်း လည်း နန်းဆာ က ပြောသည်။

“ ကျမတို့ငွေလဲတဲ့ အမျိုးသမီးတွေ က အရာရာကို ကြောက်နေရတယ်။ ကိုယ့်လုံခြုံရေးကို တာဝန်ယူရတယ်။ အခုက ၆နာရီခွဲဆိုတာ မိုးလင်းနေပြီ။ မူဆယ်မြို့ ကတော်တော် ကြောက်စရာကောင်းလာတယ်” ဟု နန်းဆာ က ဆိုသည်။

တရုတ် နယ်စပ် မူဆယ်မြို့တွင် တရုတ်ငွေလဲသူများအနက် ၉၀ ရာခိုင်နှုန်းသည် အမျိုးသမီးများ ဖြစ်ကြောင်း သိရသည်။

မူဆယ်မြို့တွင် ပြည်သူ့စစ်များ၊ လောင်းကစားရုံများ၊ မူးယစ်ဆေးဝါးများ ရောင်းဝယ်ဖောက်ကားသည့်နေရာ တခုဖြစ်ပြီး လုယက်သမား၊ ဒုစရိုက်သမားများ များပြားသည့်နေရာဖြစ်သည်။