သျှမ်းပြည် တိုးတက်ရေးပါတီ သျှမ်းပြည်တပ်မတော် SSPP/SSA သည် တနိုင်ငံလုံး ပစ်ခတ်တိုက်ခိုက်မှု ရပ်စဲရေး သဘောတူ စာချုပ်( NCA) ရေးထိုးရန် အဆင်သင့်ဖြစ်နေပြီဖြစ်ကြောင်း ပြောဆိုလိုက်သည်။

ဖေဖော်ဝါရီ ၄ ရက်မှ ၁၈ ရက်ထိ SSPP/SSA ဗဟို ကော်မတီ အစည်းအဝေးတရပ်ကျင်းပရာ NCA လက်မှတ်ရေးထိုးမည့် ကိစ္စပါ ဆွေးနွေးဆုံးဖြတ်ချက် ချခဲ့သည် ဟု သိရသည်။

အစည်းအဝေးအပြီး ဖေဖော်ဝါရီ ၁၉ ရက်နေ့တွင်ထုတ်ပြန်ခဲ့သော SSPP/SSA ၏ ကြေညာချက်တွင်လည်း SSPP/SSA အနေဖြင့် NCA ဖြစ်ပေါ်လာရေး ကြိုးပမ်းမှု ဖြစ်စဉ်တွင် အစ မှ အဆုံးထိ ပူးပေါင်း ပါဝင်ခဲ့သည် ဟု ဖော်ပြထားသည်။

သျှမ်းပြည် တပ်မတော်သည် FPNCC အဖွဲ့ဝင် အားလုံး နှင့် အတူ NCA ဖြစ်စဉ် နှင့် နိုင်ငံရေး ဖြစ်စဉ် များတွင် ပူးပေါင်းပါဝင်နိုင်ရန် အတွက် အစိုးရ၊ တပ်မတော် တို့နှင့် ဆွေးနွေးပြီး ဘဝတူ တိုင်းရင်းသားလက်နက်ကိုင် အဖွဲ့အစည်းများ၊ နိုင်ငံရေး ပါတီများ၊ လူမှုအဖွဲ့အစည်းများတို့ နှင့် ဆွေးနွေးဆောင်ရွက်သွားမည် ဟုလည်း ထုတ်ပြန်ချက်တွင် ရေးသားထားသည်

“ NCA လက်မှတ်ထိုးဖိုးက ကျနော်တို့ အဖွဲ့တွေ NCA စပြီးလုပ်ကတည်း က ပါဝင်ခဲ့ပါတယ်။ ဒါပေမယ့် အားလုံး မပါရင် ကျနော်တို့ အဖွဲ့က မထိုးသေးတာပါ။ ထိုးဖို့ က ရှိပါတယ်။ NCA ထိုးဖို့လည်း ပြင်ဆင်ထားပြီးပါပြီ” ဟု SSPP/SSA ပြောခွင့်ရ ပုဂ္ဂိုလ် ဗိုလ်မှူး စိုင်းသန်းအောင် က သျှမ်းသံတော်ဆင့် သို့ပြောသည်။

NCA လက်မှတ်ရေးထိုးရာတွင် တိုင်းရင်းသား လက်နက်ကိုင် တပ်ဖွဲ့ အားလုံးပါဝင်လာရန်အတွက် အဓိက မြောက်ပိုင်း မဟာမိတ် အဖွဲ့ နှင့် တွေ့ဆုံညှိနှိုင်း အဖြေရှာသွားမည် ဟု လည်း ဗိုလ်မှူး စိုင်းသန်းအောင် က ပြောသည်။

“ ကျနော်တို့မြောက်ပိုင်း အဖွဲ့ တွေနဲ့ တွေ့ပြီး ညှိဖို့ လုပ်ပါမယ်။ ဘယ်အချိန်လုပ်မယ်တွေ့မယ်ဆိုတော့ မသိသေးဘူး။ ကျနော်တို့ တွေ့ဆုံခဲ့ရင် NCA ကိစ္စ အကြောင်းတွေပြောမယ်” ဟု ဗိုလ်မှူး စိုင်းသန်းအောင် က ထပ်လောင်း ပြောသည်။

FPNCC သည် NCA မထိုးရသေးသည့် တိုင်းရင်းသားလက်နက်ကိုင်များ ဖွဲ့ထားသည့် မဟာမိတ် အဖွဲ့ဖြစ်သည်။

ထိုထဲတွင် SSPP/SSA ၊ ကချင် တပ်ဖွဲ့ (KIA) ၊မိုင်းလား အဖွဲ့ (NDAA) ၊ “ ဝ” တပ်ဖွဲ့ (UWSA)၊ တအာင်း (ပလောင်) တပ်ဖွဲ့( TNLA) ၊ကိုးကန့် တပ်ဖွဲ့ (MNDAA ) နှင့် ရခိုင် တပ်ဖွဲ့ (AA) တို့ ပါဝင်သည်။

ဆက်လက်ပြီး SSPP/SSA အနေဖြင့် နိုင်ငံရေး ပြဿနာ များကို နိုင်ငံရေး နည်းလမ်းဖြင့် တွေ့ဆုံ ဆွေးနွေး အဖြေရှာနိုင်ရန် အတွက် ပြည်တွင်း ငြိမ်းချမ်းရး၊ တိုင်းရင်းသား စည်းလုံး ညီညွတ်ရေး နယ်မြေ တည်ငြိမ်အေးချမ်းရေး ကို ထိန်းသိမ်းကာ ဒေသဖွံ့ဖြိုး ရေး လုပ်ငန်းစဉ်များကိုလည်း ဆောင်ရွက်သွားမည် ဟု ထုတ်ပြန်ချက်တွင် ရေးသားထားသည်။