သျှမ်းပြည် တောင်ပိုင်း လဲချားမြို့နယ် အတွင်း ဝမ်ပန်ပြည်သူ့စစ် ကျောက်မီးသွေး တူးဖော်ရန် ကြိုးစားနေသည် ဟု ဒေသခံများ ပြောပြချက် အရသိရသည်။
ဝမ်ပန်ပြည်သူ့စစ် ခေါင်းဆောင် ခူးဒေါန သည် ဖေဖော်ဝါရီ ၁၅ ရက် ညပိုင်းက ကျောက်မီးသွေးတူးဖော်မည့် ကိစ္စနှင့် ပတ်သက်ပြီး ဒေသခံလူထုကို ခေါ်ယူတွေ့ဆုံ ကာ ပြောကြားခဲ့သည်။
အဆိုပါ တွေ့ဆုံမှုသည် လဲချားမြို့နယ် နောင်ယာဆိုင်းကျေးရွာအတွင်းရှိ နောင်ယာဆိုင်း ဘုန်းကြီးကျောင်း တွင် ပြုလုပ်ခဲ့သည်။
လက်ရှိ ဝမ်ပန်ပြည်သူ့စစ် အဖွဲ့ ကျောက်မီးသွေး တူးဖော်မည့် နေရာသည် ဝမ်ပန် ကျေးရွာ နှင့် နောင်ယာဆိုင်း ကျေးရွာ ကြားတွင် တည်ရှိသည်။ဝမ်ပန်ကျေးရွာ နှင့် တမိုင်ခန့်သာ ဝေးကွာပြီး၊ နောင်ယာဆိုင်းကျေးရွာ နှင့် ၂မိုင်ခန့်ဝေးကွာ ကာ လဲချားမြို့ နှင့် ၈မိုင်ဝေးကွာသည်။
“ ခူးဒေါန (ဝမ်ပန်ပြည်သူ့စစ် ခေါင်းဆောင်) က ကျနော်တို့ ကို ခေါ်ပြောတာက ကျောက်မီးသွေး တူးမယ်။ တဖက်ရွာကလူတွေကတော့ သဘောတူပြီ။ ကျနော်တို့ ဆီက သဘောထားကိုလာတောင်းတယ် လို့ပြောတယ် ” ဟု နောင်ယာဆိုင်း ကျေးရွာမှ အသက် ၅၀ကျော် အမျိုးသား တဦး က သျှမ်းသံတော်ဆင့် သို့ပြောသည်။
ထို့ပြင် ဝမ်ပန်ပြည်သူ့စစ် အဖွဲ့ သည် ဒေသတွင်း ဘုန်းကြီးကျောင်း၊ စာသင်ကျောင်းများကို ပြုပြင်ပေးမည်ဟုလည်း ပြောဆိုခဲ့ကြောင်း ၎င်း အမျိုးသားက ပြောသည်။
“ ကျနော်တို့ သူတို့ ကျောက်မီးသွေး တူးဖို့၊ မတူးဖို့ ၃ရက် စဉ်းစားခိုင်းထားတယ်။ ကျနော်တို့က တော့ တူးဖို့ လက်မခံဘူး” ဟု နောင်ယာဆိုင်းကျေးရွာမှ အစည်းအဝေး တက်ခဲ့သည့် သူ တဦး က ပြောသည်။
ဆက်လက်ပြီး ကျောက်မီးသွေး တူးဖော်ရန် အစည်းအဝေးတက်ခဲ့သည့် အိုက်စိုင်း က “ သူက ဒီရွာရောက်ရင် ဟိုရွာက သဘောတူပြီတဲ့၊ ဟိုရွာရောက်တော့ ဒီရွာက သဘောတူပြီလို့ သွားပြောတယ်။ နောက် ဘုန်းကြီး တွေလည်း ကျောက်မီးသွေး တူးဖော် ခွင့်ပေးပြီလို့လည်းပြောတယ်” ဟု သျှမ်းသံတော်ဆင့် သို့ ပြောပြသည်။
လဲချားမြို့နယ် ဝမ်ပန်ကျေးရွာ နှင့် နောင်ယာဆိုင်း ကျေးရွာအတွင်း မန်ပန်ပြည်သူ့စစ်များ ကျောက်မီးသွေး တူးဖော်မည့်ကိစ္စကို မည်သည့် ဒေသခံမှ သဘောမတူကြောင်း၊ ထို့ပြင် ဘုန်းကြီးများလည်း သဘောမတူကြောင်း သျှမ်းသံတော်ဆင့် စုံစမ်းမေးမြန်းရာတွင် ဒေသခံများနှင့်ဘုန်းတော်ကြီးများကပါ တညီတညွတ် တည်းပြောဆိုသည်။
“ ကျောက်မီးသွေး တူးဖို့ ကျနော်တို့ တယောက်မှ သဘောမတူထားဘူး။ ကျောက်မီးသွေးတူးရင် လယ်ယာကိစ္စတွေ ရေကိစ္စတွေ ခက်ခဲလာမယ်” ဟု အိုက်စိုင်း က ဆိုသည်။
ထို့ပြင် ဝမ်ပန်ပြည်သူ့စစ် ခေါင်းဆောင် ခူးဒေါန က “ ဒေသခံတွေ သဘောမတူရင်လည်း ဘာမှမဖြစ်ဘူး။ သက်ဆိုင်ရာဆီ တင်ပြီး လုပ်လို့ရတယ်။ကျနော်တို့ ဒီမှာတပ်စခန်းလာချမယ်။ ” ဟု အစည်းအဝေးတက်လာသည့် ဒေသခံများကို ပြောဆိုခဲ့ကြောင်းရွာသားများပြောပြချက်အရသိရသည်။
အဆိုပါ ကျောက်မီးသွေး တူးဖော်မည့် ကိစ္စနှင့် ပတ်သက်ပြီး လဲချားမြို့ ပြည်နယ်လွှတ်တော်အမတ် (၁) စိုင်းကျော်ဇေယျ က “ ကျနော် မကြားရသေးဘူး။ ဒေသခံတွေ က ကျနော့်ကို ဘာမှ မပြောလာသေးဘူး။ လာပြောတာလည်း မရှိဘူး။ ဒေသခံတွေ မလိုလားရင်တော့ ကျောက်မီးသွေး တူးလို့မရဘူး” ဟု သျှမ်းသံတော်ဆင့် ကို ပြောသည်။
လဲချားမြို့နယ် အတွင်း ကျောက်မီးသွေး တူးဖော်မည့် ကိစ္စတွင် မြေစာရင်း၊ ဒေသခံ သဘောတူညီမှု မရပါက တူးဖော် မရကြောင်း လည်း စိုင်းကျော်ဇေယျ က ပြောသည်။
ထိုကိစ္စနှင့် ပတ်သက်ပြီး သျှမ်းသံတော်ဆင့် မှ ခူးဒေါန ဦးဆောင်သည့် ဝမ်ပန်ပြည်သူ့စစ်ကို ဆက်သွယ်မေးမြန်းရန်ကြိုးစားသော်လည်း ဆက်သွယ်လို့ မရရှိခဲ့ပေ။
လဲချားမြို့နယ် အတွင်း ပြည်သူ့စစ်များစွာ လှုပ်ရှားသည့်နေရာဖြစ်ပြီး ဝမ်ပန်ပြည်သူ့စစ်သည် ၂၀၀၆ ခုနှစ်က လွိုင်တိုင်းလျန်းမှ ခွဲထွက်ကာ အစိုးရထံ လက်နက်ချထားသည့် တပ်မဟာ ၇၅၈ ၏ လက်အောက်ခံ တပ်ခွဲ တခုဖြစ်သည်။
