သျှမ်းပြည် မြောက်ပိုင်း မူဆယ်မြို့နယ် တိန်းလုံ ကျေးရွာတွင် စက္ကူစက်ရုံ မီးလောင်မှုဖြစ်ပွားကာ ဆုံးရှုံးမှုများကြောင်း သတင်းရရှိသည်။
ဖေဖော်ဝါရီ ၁၆ ရက် မနက် ၅နာရီ ဝန်းကျင်တွင် မူဆယ်မြို့နယ် တိန်းလုံကျေးရွာ ၌ ဝါယာရှော့ဖြစ်ပွားမှုကြောင့် စက္ကူစက်ရုံမီးလောင်မှုဖြစ်ပွားကာ ဆုံးရှုံးမှု ၁၀သိန်း အထက်ရှိကြောင်း မူဆယ်မြို့ မီးသတ်တပ်ဖွဲ့ မှ သတင်းရရှိသည်။
“ မနက် မိုးမလင်းခင်ကတည်း စလောင်တာပါ။ အလုပ်သမားတွေ ထလာတော့ မီးက တော်တော်ကြီးနေပြီ၊ စက္ကူလုပ်မယ့် ပစ္စည်းဆိုတော့ မီးလောင်လွယ်တယ်” ဟု မီးသတ်တပ်ဖွဲ့ဝင် တဦးက သျှမ်းသံတော်ဆင့် သို့ ပြောသည်။
ဆက်လက်ပြီး တိန်းလုံ ဒေသခံ တဦး ဖြစ်သည့် စိုင်းထွန်း က “ဝါယာရှော့ ဖြစ်တာကနေ စလောင်တာပါ။ မနက် ၅နာရီ က စဖြစ်တယ်။ ၈နာရီ မှာ ပေါက်ကွဲသံကြားရတယ်။ အလုပ်သမားတွေ ထလာတဲ့အချိန် မီးကတော်တော်လောင်နေပြီ” ဟု သို့ပြောသည်။
လက်ရှိ တိန်းလုံ ကျေးရွာ စက္ကူ စက်ရုံ မီးလောင်ကျွမ်းမှုသည် ဝါယာရှော့မှ စတင်ကာ လောင်ကျွမ်းသဖြင့် ကျေးရွာ ပြည်သူများ လျှပ်စစ်မီး သုံးစွဲမှုကို သေချာ စိစစ်သင့်ကြောင်း၊ မိမိနေအိမ် ဝါယာကြိုးများကို လည်း စစ်ဆေးရန် လိုအပ်ကြောင်းလည်း စိုင်းထွန်း က ပြောသည်။
ယခုရက်ပိုင်း သျှမ်းပြည်နယ် တဝှမ်း မီးလောင်မှု မကြာခဏဖြစ်ပွားနေကြောင်း၊ များသောအားဖြင့် မီးလောင်မှုသည် ဝါယာရှော့ကြောင့် စတင်သည့် မီးလောင်မှုဖြစ်ကြောင်း သိရသည်။
လွန်ခဲ့သည့် ဖေဖော်ဝါရီ ၁၃ရက် ည ၁၀နာရီ ဝန်းကျင်တွင် သျှမ်းပြည် တောင်ပိုင်း ပင်လုံမြို့ ရဲစခန်းတွင်လည်း ဝါယာရှော့ကြောင့် ရဲဝန်ထမ်း တန်းလျား မီးလောင်ကျွမ်းမှု ဖြစ်ပွားခဲ့သည်။
မြန်မာနိုင်ငံ မီးသတ်ဖွဲ့ မှလည်း ခြောက်သွေ့သည့် ရာသီ ရောက်ရှိလာပြီ ဖြစ်သဖြင့် မီးများ အထူးသတိပြုသုံးစွဲရန်၊ မိမိနေအိမ်၊ စက်ရုံ၊ ဘုန်းကြီးကျောင်း၊ အလုပ်ရုံများတွင် အသုံးပြုသည့် ဝါယာကြိုးများ၊ ဆိုလာများကိုလည်း အထူး စိစစ်ကြရန် တိုက်တွန်း ပြောဆိုထားသည်။
နေအိမ်၊ စက်ရုံများတွင် အသုံးပြုသည့် ဝါယာကြိုးများ ဟောင်းပါက အသစ်ပြန်လည် လဲရန် နှင့် ဝါယာကြိုး သွယ်တန်းသည့် အခါတွင်လည်း မိမိသဘောဆန္ဒဖြင့်မပြုလုပ်ဘဲ သက်ဆိုင်ရာကို အကူအညီတောင်းရန်လည်း မြန်မာနိုင်ငံ မီးသတ် အဖွဲ့ မှ ပြောသည်။