ထိုင်း- မြန်မာ နယ်စပ် တာချီလိတ် တွင် ရက် ၉၀ “ ကျားမင်း စီမံချက်” ကာလ အတွင်း အမျိုးသားတဦး သေနတ်ပစ်ခံရကြောင်း သတင်းရရှိသည်။
ဖြစ်စဉ်မှာ ယနေ့ (ဖေဖော်ဝါရီ ၁၃) ရက် နေ့လည်တွင် တာချီလိတ်မြို့ ဆန်ဆိုင်း(ခ) ရပ်ကွက် ထွန်းလင်းအောင် လမ်း ၌ အမျိုးသားတဦး ကို အမည်မသိ သူ က သေနတ်ဖြင့် ပစ်ခတ်သွားကြောင်း တာချီလိတ်မြို့က ဒေသခံများ ပြောပြချက် အရသိရသည်။
“ ကားပေါ်တက်ဖို့ လမ်းလျှောက်လာတဲ့သူ တဦးကို အမည်မသိ သူ က ကားတစီးနဲ့ လာပြီး သေနတ် ၅ချက် ပစ်သွားတယ်။ ပြီးတော့ ပြေးသွားတယ်” ဟု တာချီလိတ်မြို့ နေမျက်မြင် ဒေသခံ အမျိုးသားတဦးကပြောသည်။
အဆိုပါ သေနတ်ပစ်ခံရသူကို လက်ရှိမှာ တာချီလိတ်မြို့ပြည်သူ့ဆေးရုံ တွင် ပို့ဆောင်ထားကြောင်းသိရသည်။
“ လူတဦး သေနတ်ပစ်ခံရတာတော့ ဟုတ်တယ်။ အသေးစိတ်ကို ကျနော်တို့ စိစစ်နေတာပါ” ဟု တာချီလိတ်မြို့ ရဲမှူး ညီညီထွေး က သျှမ်းသံတော်ဆင့် သို့ ပြောသည်။
လက်ရှိ မှာ တာချီလိတ်မြို့ အတွင်း မှုခင်း ကျဆင်းရေး နှင့် တရားဥပေဒ စိုးမိုးရေး ရှိစေရန် အတွက် ရက် ၉၀ “ ကျားမင်း စီမံချက်” လှုပ်ရှားနေသည့် အချိန်ကာလဖြစ်သည်။
ထို ရက် ၉၀ “ ကျားမင်း စီမံချက်” အတွက် ရပ်ကင်း ၁၅ကင်း ပြုလုပ်ပြီး၊ တကင်းတွင် ရဲတပ်သား ၂ဦး တာဝန်ချသွားမည်ဖြစ်ကြောင်း၊ မြို့ပေါ် ရပ်ကွက် (၄) ခုမှာလည်းနယ်မြေရဲကင်းများ ချထားပြီး၊ မြို့ ပေါ်တွင် အမှုများဖြစ်လာပါက အချိန်မီသိရအောင် ရပ်ကင်းမှပိတ်ဆို့တားဆီးနိုင်အောင်လည်း ဆောင်ရွက်သွားမည် ဟုလည်း ယမန်နေ့ (ဖေဖော်ဝါရီ ၁၂) ရက်တွင် ရဲမှူး ညီညီထွေး က သျှမ်းသံတော်ဆင့် အား ပြောသည်။
ထို့ပြင် ဖေဖော်ဝါရီ ၁၂ရက်နေ့ မနက် (၇)နာရီ ကလည်း တာချီလိတ်မြို့ ဆန်ဆိုင်း(ခ) ရပ်ကွက် 1G1 ဟိုတယ် အတွင်းရှိ နတ်စင်ကို အမျိုးသားတဦး က သေနတ်ပစ်ဖောက်ပြီး ထွက်ပြေးတိမ်းရှောင်နေဆဲ ဟု သိရသည်။
Leave a Comments