သျှမ်းပြည် မြောက်ပိုင်း လားရှိုးမြို့ တွင် ယနေ့ ညနေ ၄နာရီ တွင် လူငယ်တဦး ဓားခုတ်ခံရကြောင်း သတင်းရရှိသည်။
ဖြစ်စဉ်မှာ လားရှိုးမြို့ ရပ်ကွက် (၅) အထက်တန်းကျောင်း(အထက ၆) အနောက်ဘက်လမ်းတွင် လူငယ်တဦး ဓားခုတ်ခံရကြောင်း၊ လက်ရှိမှာ လားရှိုးဆေးရုံသို့ ပို့ဆောင်ပေးထားကြောင်း လားရှိုး လူငယ် လူမှုကူညီရေး အသင်း မှ ကိုအောင်ကျော်ဦး က ပြောသည်။
“ နေအိမ်ထဲမှာ နေရင်နဲ့ ခုတ်ခံရတာပါ။ တုတ်နဲ့ လည်းရိုက်ထားတယ်။ ဓားနဲ့ ခုတ်တာကတော့ ဘယ်ဘက် တံတောင်ဆစ် ထိရှသွာတးယ်။ အခု လားရှိုးဆေးရုံ အရိုးဆောင်ကို ပို့ထားတယ် ” ဟု ကိုအောင်ကျော်ဦး ကပြောသည်။
အဆိုပါ ဓားခုတ်ခံရသူသည် အသက် ၁၆နှစ် အရွယ်ရှိကြောင်း၊ လာရောက်ခုတ်သည့် သူကို စုံစမ်းနေဆဲဟု ကိုအောင်ကျော်ဦး က ထပ်လောင်းပြောသည်။
“ ရန်ညိုး ရန်စ ရှိလို့လာခုတ်သွားတဲ့သဘောပါ။ ရဲတွေကတော့ လာခုတ်တဲ့သူကို စုံစမ်းနေတယ်။ တရားခံတော့ မဖမ်းမိသေးဘူး” ဟု ကိုအောင်ကျော်ဦးက ဆိုသည်။
လားရှိုးမြို့တွင် မကြာခဏ ဓားခုတ်မှု ဖြစ်ပွားကြောင်း၊ ယခုနောက်ပိုင်း နေ့ခင်းအချိန်တွင် ဓားခုတ်ခံရမှု ဖြစ်ပွားလာမှုကြောင့် ဒေသခံ များ စိုးရိမ်ထိတ်လန့်မှု ဖြစ်ပွားနေကြကြောင်း လားရှိုးဒေသခံများ ပြောပြချက် အရသိရသည်။
“ နေ့ခင်းမှာ ဓားခုတ်မှုတွေ ဖြစ်တော့ သွားလာရတာ တောင် ကြောက်နေရတယ်။ ဆေးသမားတွေကလည်း ပေါတော့ ဘယ်သွားသွား သတိရှိနေရတယ်” ဟု လားရှိုး ဒေသခံ ကျော်လှ က သျှမ်းသံတော်ဆင့် သို့ ပြောသည်။
လားရှိုးမြို့တွင် မကြာခဏ လုယက်မှု၊ ခိုးမှု၊ ဓားခုတ်မှုများ ဖြစ်ပွားသော်လည်း သက်ဆိုင်ရာ က တိကျစွာ ကိုင်တွယ်ပေးခြင်း ဖြေရှင်းပေးခြင်း မရှိကြောင်းလည်း လားရှိုး ကျော်လှ က ပြောသည်။
“ အရင်က ည မှောင်ရင် လုယက်တာ၊ ခိုးတာ ၊ ဓားခုတ်တာရှိတယ်။ အခုက နေ့ခင်းတောင် ဓားခုတ်တော့ လားရှိုး မြို့ တရားဥပဒေ စိုးမိုးမှု က လုံးဝ မရှိဘူးတော့ဘူး။ ကြောက်နေရတယ်” ဟု ကျော်လှ က ထပ်လောင်းပြောသည်။
Leave a Comments