RCSS/ SSA ဌာနချုပ်တွင် ကျင်းပမည့် (၇၃) နှစ်မြောက် သျှမ်းအမျိုးသားနေ့ ကို မြန်မာ့တပ်မတော် နှင့် အစိုးရ ကိုယ်စားလှယ် အဖွဲ့ဝင်များ တက်ရောက်မည် ဟု သတင်းရရှိသည်။

ယခုနှစ် ဖေဖော်ဝါရီ ၇ ရက်သည် သျှမ်းအမျိုးသားနေ့ ၏ ၇၃နှစ်မြောက် နေ့ဖြစ်သည်။

သျှမ်းအမျိုးသားနေ့ အထိမ်းအမှတ်အနေဖြင့် သျှမ်းပြည် ပြန်လည်ထူထောင်ရေး ကောင်စီ၊ သျှမ်းပြည် တပ်မတော် ( RCSS/SSA) ဌာနချုပ် လွိုင်းတိုင်းလျန်း တွင် နှစ်စဉ်ကျင်းပသည်။

“ တပ်မတော် ဘက် က ကိုယ်စားလှယ် ၅ဦး နဲ့ အစိုးရဘက် က ကိုယ်စားလှယ် ၆ဦး။ အားလုံး ၁၁ဦး လာပါတယ်။ တာချီလိတ် မယ်ဆိုင် ဘက်ကနေ လာတယ်။ ဒီနေ့သူတို့ လွိုင်တိုင်းလျန်း ရောက်ကြမယ်” ဟု RCSS/ SSA ပြောရေးဆိုခွင့် ရ ပုဂ္ဂိုလ် ဒုတိယ ဗိုလ်မှူးကြီး စိုင်းမိဏ်း က သျှမ်းသံတော်ဆင့် သို့ ပြောသည်။

RCSS/SSA ဌာနချုပ်တွင် ကျင်းပမမည့် ၇၃နှစ်မြောက် အမျိုးသားနေ့ ကို မြန်မာ့တပ်မတော်ဘက်တွင် ဒုတိယ ဗိုလ်ချုပ်ကြီး အေးဝင်း ဦးဆောင်ပြီး၊ အစိုးရ ၏ အမျိုးသား ပြန်လည်သင့်မြတ်ရေး နှင့် ငြိမ်းချမ်းရေး ဗဟိုဌာန (NRPC) ဒုဥက္ကဌ ဦးထွန်းထွန်းဦး ဦးဆောင် ပြီး တက်ရောက်ကြောင်း သတင်းရရှိသည်။

ယခုနှစ် သျှမ်းအမျိုးသားနေ့ ကို တရုတ်နိုင်ငံ ကိုယ်စားလှယ်များတက်ရောက်ခြင်းမရှိကြောင်း၊ တခြား နိုင်ငံဖြစ်သည့် ဆွီစလန် နိုင်ငံ နှင့် နယ်သာလန် နိုင်ငံ ကိုယ်စားလှယ်များတက်ရောက်မည် ဟု လည်း ဒုတိယ ဗိုလ်မှူးကြီး စိုင်းမိဏ်း က ပြောသည်။

ထို့ပြင် တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူစာချုပ် လက်မှတ် ရေးထိုးထားသော တိုင်းရင်းသားလက်နက်ကိုင်အဖွဲ့အစည်းများ (NCA-S EAO) အဖွဲ့လည်း တက်ရောက်ညမည်ဟု စိုင်းမိဏ်း က ထပ်လောင်းပြောသည်။

ယနေ့ ( ဖေဖော်ဝါရီ ၆) ရက်တွင် လွိုင်တိုင်းလျန်း တို့ ရောက်လာသည့် အထူး ဧည့်သည်တော်များနှင့် RCSS/SSA ခေါင်းဆောင် ဗိုလ်ချုပ်ကြီး ယွက်စစ် တို့ ညနေ မိတ်ဆုံစားပွဲ ရှိကြောင်း သိရသည်။

သျှမ်းအမျိုးသားနေ့ (ဖေဖော်ဝါရီ ၇) သျှမ်းစော်ဘွားများ၊နှင့် ပြည်သူလူထုများ ကြား သွေးစည်းညီညွတ်မှု ရခဲ့ပြီး၊ ထိုနေ့ နှင့် အတူ အမျိုးသား သီချင်း၊ သျှမ်း အမျိုးသားအလံ ကို သတ်မှတ်နိုင်ခဲ့သည့် နေ့ ရက်လည်းဖြစ်သည်။

ထို့ပြင် ပင်လုံစာချုပ် နှင့် ပြည်ထောင်စု နေ့ဖြစ်ပွားလာရန် ပေါ်ပေါက်လာရန် အတွက် သျှမ်းအမျိုးသားနေ့သည် အရေးကြီးသည့် သမိုင်းဝင် ရက်တရက်လည်းဖြစ်သည်။

သို့သော် သျှမ်းအမျိုးသားနေ့ သည် မြန်မာတပြည်လုံး ၏ နေ့ထူး နေ့မြတ်ဖြစ်သည့် အတွက် သျှမ်းပြည်သူများ နှစ်စဉ်နှစ်တိုင်း တရားဝင် ရုံးပိတ်ရက် အဖြစ် သတ်မှတ်ပေးရန် တောင်းဆိုခဲ့သော်လည်း လက်ရှိ အချိန်ထိ သတ်မှတ်ခြင်း မခံရပေ။