တရုတ်နိုင်ငံ ဝူဟန်မြို့ မှ စတင်ဖြစ်ပွားသည့် Novel Corona Virus ( ခိုရိုနာ ဗိုင်းရပ်စ်) ကြောင့် တရုတ်နယ်စပ်တလျောက် စီးပွားရေး အရောင်းအဝယ် ကျဆင်းကြောင်း ဒေသခံများ ပြောပြချက် အရသိရသည်။

အဓိက တရုတ်နိုင်ငံကို မှီတင်းကာ စီးပွားရေး လုပ်နေသည့် မူဆယ်မြို့ နယ်နှင့် နမ့်ခမ်းမြို့နယ် တွင် ယခုရက်ပိုင်း စီးပွားရေး များ ရပ်ဆိုင်းနေရသည်။

လက်ရှိမှာ တရုတ် ကုန်သွယ်ရေး လုပ်ငန်းများ ရပ်ဆိုင်းနေရသလို တရုတ်နိုင်ငံသို့ တင်ပို့ မည့် ကုန်များ၊ တရုတ်နှင့် ဆက်သွယ်သည့် အရောင်းအဝယ်များလည်း ရပ်ဆိုင်းနေရကြောင်း မူဆယ်မြို့ တောင်ရပ်ကွက်နေ စိုင်းမှိုင်း က သျှမ်းသံတော်ဆင့် သို့ပြောသည်။

တရုတ်နယ်စပ် အဓိက ဂိတ်များဖြစ်သည့် မူဆယ်မြို့ နန်းတော် (အလယ်ပေါက်ဂိတ်)၊ ဆင်ဖြူဂိတ် နှင့် မန့်ဝိန်း ဂိတ်များ ဖွင့်လှစ်ထားသော်လည်း လက်ရှိမှာ ဝင်၊ထွက်သွားလာမှု တိတ်ဆိတ်နေသည်။

ထို့ပြင်တရုတ်နယ်မြေ နှင့် ထိစပ်နေသည့် မူဆယ်မြို့နယ် နောင်မွန် ကျေးရွာ၊ ဟိုးနွမ်း ကျေးရွာ ဂိတ်ကို တရုတ်ပြည် အစိုးရ က လုံးဝ ဝင်၊ထွက်သွားလာခွင့် မပြုတော့ပေ။

ထို့ ခိုရိုနာ ဗိုင်းရပ်စ်သည် တရုတ်နယ်စပ် နှင့် ထိစပ်နေသည့် မူဆယ်၊ နမ့်ခမ်း ပြည်သူများအတွက် ထိခိုက်မှုများရှိကြောင်း လည်း ထိုဒေသတွင် နေထိုင်သူများက ပြောဆိုလိုက်သည်။

“ အခု ဗိုင်းရပ်စ် ရောဂါကြောင့် တရုတ်ဘက်ကလည်း အလုပ်နားထားတယ်။ မူဆယ်မှာတော့ စီးပွားရေး တော်တော်ထိတယ်။ ကားခတွေ ဆိုလည်း တက်လာတယ်။ ကုန်ဈေးနှုန်း တချို့ တက်တယ်” ဟု စိုင်းမှိုင်း က ပြောသည်။

လက်ရှိ မူဆယ်မှ မန္တလေးသို့ သွားမည်ဆိုပါက တဦးလျှင် ကားခ ရှေ့ခန်း ၆သောင်းကျပ်ထိ ပေးရကြောင်း၊ နောက်ခန်း ၅သောင်းကျပ်ထိ ပေးဆောင်ရကြောင်း စိုင်းမှိုင်းက ပြောသည်။

“ မန္တလေးကနေ မူဆယ် ပြန်တက်လာမယ့် သူမရှိတော့ မူဆယ်ကနေ မန္တလေး ကို ဆင်းမယ်ဆိုရင် ကားသမားတွေက ၂သိန်း ကျော်မရရင် မဆင်းကြဘူး။ အရောင်းအဝယ်မရှိတော့ ဘယ်သူမှလည်း မတက်လာတော့ဘူး” ဟု စိုင်းမှိုင်းက ဆိုသည်။

ထို့ပြင် ခိုရိုနာဗိုင်းရပ်စ် ကြောင့် ဈေးဆိုင်ခန်များတွင် ဈေးလာဝယ်သူများမရှိကြောင်း၊ ယနေ့ နမ့်ခမ်း ဈေးနေ့ဖြစ်သော်လည်း ဈေးဝယ်သူ အနည်းငယ်သာ လာရောက် ဝယ်ယူကြကြောင်း နမ့်ခမ်းမြို့ ဒေသခံ စိုင်းမောဝ် က သျှမ်းသံတော်ဆင့် သို့ ပြောသည်။

“ ဒီနေ့ ဈေးနေ့ ရောင်းကောင်းရမှာ။ အခုက ရောင်းသူရှိပြီး၊ ဝယ်သူမရှိဖြစ်နေတယ်။ အရောင်းအဝယ် လုပ်ရခက်တယ်” ဟု စိုင်းမောဝ် က ဆိုသည်။

ထို ခိုရိုနာ ဗိုင်းရပ်စ်ကြောင့် ဒေသခံပြည်သူများ အဘက်ဘက်မှ စိုးရိမ်မှုဖြင့် ရင်ဆိုင်နေရသလို စီးပွားရေး လည်း ထိခိုက်မှုများ ရင်ဆိုင်နေရသည်။

“ တချို့ အသီးကားတွေ ဆိုရင် မူဆယ်ဘက် မလာတော့ဘဲ ရန်ကုန်ဘက် သွားရောင်းရတဲ့အဆင့်ဖြစ်နေတယ်။ စီးပွားရေး ကတော့ ဘယ်တော့ မှ ပြန်ကောင်းလာမှာလဲဆိုတာ မသိဘူး” ဟု မူဆယ်မြို့ သစ်သီးကုန်သည် တဦး က ပြောသည်။

တရုတ်နိုင်ငံ ဝူဟန်မြို့ မှ စတင်ဖြစ်ပွားသည့် ခိုရိုနာ ဗိုင်းရပ်စ် ကူးစက်မြန် အဆုတ်ရောင် ရောဂါသည် ကမ္ဘာနိုင်ငံပေါင်း ၂၈နိုင်ငံ ကူးစက်ခံရသူ ၂၄၅၄၂ဦးရှိကာ သေဆုံးသူ ၄၉၂ ဦးရှိသွားပြီ ဖြစ်ကြောင်း သိရသည်။