သျှမ်းပြည် မြောက်ပိုင်း နမ္မတူမြို့ တွင် Novel Corona Virus (နိုဗယ်လ် ခိုရိုနာ ဗိုင်းရပ်စ်) ဝူဟန် ကူးစက်မြန်ရောဂါ သံသယ ရှိသူ အမျိုးသားတဦး တွေ့ရှိထားဟု သတင်းရရှိသည်။
ယမန်နေ့ (ဖေဖော်ဝါရီ ၃) ရက်နေ့တွင် တရုတ်ပြည်တွင် အလုပ်လုပ်ပြီး ပြန်လာသည့် အမျိုးသားတဦး နေမကောင်းသဖြင့် လက်ရှိမှာ နိုဗယ်လ် ခိုရိုနာ ဗိုင်းရပ်စ် သံသယ ရှိသူအနေဖြင့် နမ္မတူဆေးရုံတွင် ဆေးကုသမှုပေးနေကြောင်း နမ္မတူ သျှမ်းစာပေ၊ ယဉ်ကျေးမှု အသင်းမှ ဦးဘဉာဏ် က ပြောသည်။
“ သူက တရုတ်ပြည်က ပြန်လာတာ၊နေမကောင်းဖြစ်တယ်။ ခိုရိုနာ ဗိုင်းရပ်စ် ဟုတ်၊ မဟုတ်တော့ မသိဘူး။ ကျနော်တို့ဆီမှာလည်း စမ်းသပ်စရာ စက်မှ မရှိတာ။ ဆေးရုံမှာတော့ စောင့်ကြည့်နေရတဲ့အဆင့်ပါ” ဟု ဦးဘဉာဏ် ကဆိုသည်။
လက်ရှိ ခိုရိုနာဗိုင်းရပ်စ် သံသယ ရှိသူ အမျိုးသားသည် နမ္မတူ ဆေးရုံသီးသန့်အခန်းတွင်ထားကာ တင်းကြပ်စွာ စောင့်ကြည့်နေရသည့် အဆင့်ဖြစ်ကြောင်း ဦးဘဉာဏ် က ပြောသည်။
အဆိုပါ ကိစ္စနှင့် ပတ်သက်ပြီးနမ္မတူ ပြည်သူ့ဆေးရုံသို့သျှမ်းသံတော်ဆင့် မှ အတည်ပြု ရန် ကြိုးစားဆက်သွယ်သော်လည်း မရခဲ့ပေ။
ကမ္ဘာ့ ကျန်းမာရေး အဖွဲ့ ကြေညာချက် အရ ဇန်နဝါရီ ၄ရက် တွင် ကမ္ဘာ တဝှမ်း နိုင်ငံပေါင်း ၂၇ နိုင်ငံတွင် ဝူဟန် ဗိုင်းရပ်စ် ကူးစက်ခံရသူ ၂၀၆၇၆ ဦး ၊ သေဆုံးသူ ဦးရေ ၄၂၇ ရှိပြီး ပြန်လည် နေကောင်းလာသူ ၆၆၄ ဦးရှိကြောင်း သိရသည်။
Leave a Comments