သျှမ်းပြည်မြောက်ပိုင်း နမ္မတူမြို့နယ် ချောင်းသာကျေးရွာအုပ်စု ရေအိုးကျေးရွာတွင် ပြည်သူ့နေအိမ် ဖောက်ထွင်းခံရပြီး ငွေကြေး ကျပ်သိန်း ၅၀ ကျော် ဆုံးရှုံးသွားရကြောင်း စုံစမ်း သိရှိရသည်။
ပြီးခဲ့သည့် အောက်တိုဘာလ ၁၅ ရက်နေ့ ည အချိန်တွင် နမ္မတူမြို့နယ် ရေအိုးကျေးရွာတွင်ရှိသည့် ဦးကြာယုံ နေအိမ် ဖောက်ထွင်းခံရပြီး သေတ္တာအတွင်း ထည့်ထားသည့် ပိုက်ဆံ ကျပ်သိန်း ၅၀ ကျော် ခိုးယူခံလိုက်ရကြောင်း ဒေသခံတစ်ဦးက သျှမ်းသံတော်ဆင့်ကို ပြောသည်။
“သူခိုးက လှေကားကို အသုံးပြုပြီး ပြတင်းပေါက်ကနေ အိမ်ထဲကို ဝင်ခိုးတာ၊ စနေနေ့ ညက ကျနော်တို့ အပြင်ရောက်နေချိန်ကို လာခိုးသွားတာဖြစ်မယ်၊ တနင်္ဂနွေ မနက်ခင်းမှ အိမ်ကို သူခိုးဝင်ခိုးပြီး ပိုက်ဆံပျောက်မှန်း သိရတယ်၊ ငွေ သိန်း ၅၀ ကျော် ဆုံးရှုံးရတယ်” ဟု ဦးကြာယုံ ဆွေမျိုးတစ်ဦးက သျှမ်းသံတော်ဆင့်ကို ပြောသည်။
ပြီးခဲ့သည့် ဝါတွင်းကာလ ဝါခေါင်လပြည့်နေ့တွင်လည်း အိမ်ရှင် ဒေါ်အေးနေ ဘုန်းကြီးကျောင်းသို့ ဥပုသ် သွားယူစဥ် နေအိမ်ဖောက်ထွင်းခံရပြီး ပိုက်ဆံ ၃ သိန်းကျော် ခိုးယူ ခံလိုက်ရကြောင်းလည်း သိရသည်။
“သူခိုးတွေက အိမ်ရှင်တွေ မရှိတဲ့အချိန်ကို ချောင်းပြီး ဝင်ခိုးနေကြတာ၊ ဒေါ်အေးနေ အိမ်ကိုဝင်ခိုးတဲ့ အမျိုးသားကလည်း အိမ်ရှင် ဥပုသ်သွားယူနေချိန် ဝင်ခိုးတာ၊ အိမ်သားတွေလည်း ရွာထဲက အလှူဆီ ရောက်နေလို့ ဘယ်သူမှ မရှိတဲ့ အချိန်ပေါ့” ဟု အထက်ပါ ပုဂ္ဂိုလ်က ဆက်ပြောသည်။
ရေအိုးကျေးရွာသည် တအာင်း (ပလောင်) အမျိုးသား လွတ်မြောက်ရေး တပ်မတော် (TNLA) တပ်ဖွဲ့မှ ထိန်းချုပ်ထားသည့် ရွာဖြစ်ပြီး ခိုးယူဖောက်ထွင်းမှုများ မကြာခဏ ဖြစ်ပွားလေ့ရှိသော်လည်း သူခိုးကို ဖမ်းမိခြင်း မရှိကြောင်း ဒေသခံများက ပြောဆိုကြသည်။
ထို့အပြင် ရေအိုးကျေးရွာသည် ပြီးခဲ့သည့် ၂၀၂၁ ခုနှစ် မတ်လ မှစတင်ပြီး မေလကုန်အထိ သျှမ်းလက်နက်ကိုင် တပ်ဖွဲ့ RCSS နဲ့ TNLA တပ်ဖွဲ့တို့ တိုက်ပွဲ အပြင်းအထန် ဖြစ်ပွားခဲ့ဖူးသည့် နေရာလည်းဖြစ်သည်။
Leave a Comments