သျှမ်းပြည် ကျောက်မဲခရိုင် နမ္မတူမြို့ နှင့် ကျားစခန်းကို ဆက်သွယ်ထားသည့် ရထားသံလမ်းဖြုတ်မှု လုပ်ငန်းစဉ်သည် ယနေ့ (မတ်လ ၂၂ ) ရက်မှာ ယာယီ ရပ်ဆိုင်းသွားပြီဖြစ်ကြောင်း စုံစမ်းသိရှိရသည်။
ပြီးခဲ့သည့် (မတ်လ ၂၀ ရက်) မနက်ပိုင်း အချိန်မှစပြီး ဝင်းမြင့်မိုရ် ကုမ္ပဏီမှ ဦးဆောင်ပြီး နမ္မတူမြို့မှ ကျားစခန်းသို့ ဆက်သွယ်ထားသည့် ရထားသံလမ်းကို စတင်ဖြုတ်ဖျက်ခဲ့ကာ ယနေ့အချိန်ထိ ရထားသံလမ်း ပေ ၁,၀၀၀ နီးပါးကို ဖြုတ်ထားပြီ ဖြစ်ကြောင်း ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ အခုက ဘာကြောင့် ရပ်သွားတယ်ဆိုလည်း ကျနော်တို့က မသိရဘူး။ ဖြုတ်တယ်ဆိုတဲ့ အကြောင်းကိုဘဲ ကျနော်တို့ကို လာပြောတာ။ နိုင်ငံတော်က ရပ်ခိုင်းလို့၊ သဘောသဘာဝက လက်နက်ကိုင်က ရပ်ခိုင်းလို့၊ စစ်တပ်က ရပ်ခိုင်းလို့ သူတို့ရပ်သွားတာဆိုလည်း ကျနော်တို့က မသိရဘူး။ ဖြုတ်တော့လည်း သူတို့က နိုင်ငံတော် နဲ့ လုပ်တဲ့အလုပ်ဆိုတော့ အောက်ခြေက ကျနော်တို့တွေ ဘာမှမသိရဘူး “ ဟု ၎င်းက ပြောသည်။
အဆိုပါ ဝင်းမြင့်မိုရ် ကုမ္ပဏီသည် လက်ရှိ နမ္မတူမြို့ကနေ ကျားစခန်းကို ဆက်သွယ်ထားသည့် ရထားသံလမ်းကို ဖြုတ်ပြီး နမ္မတူဘော်တွင်း သတ္တုတွင်း သယ်ယူဖို့ရန်အတွက် ကားလမ်းအဖြစ် ဆောက်လုပ်သွားမည်ဟု သိရသည်။
ထို့အပြင် ကုမ္ပဏီမှ ဖြုတ်ဖျက်ဆီးပြီးနောက် ရထားသံလမ်းဖြင့် လမ်းခရီး အသုံးပြုရနေသူ လူဦးရေ ၂၀၀ ကျော်သည် သွားလာရန် အခက်ခဲရှိနေကြောင်း သိရသည်။
“ နဂိုတုန်းက ကျနော်တို့တွေ ဒီ ရထားလမ်းကိုဘဲ အသုံးပြုရတယ်။ အခုခေတ် တခါမှ လမ်းပန်းဆက်သွယ်ရေးကောင်းလာမှသာ ကားတွေ၊ ဆိုင်ကယ်တွေနဲ့ သွားကြတာ။ ဝင်းမြင့်မိုရ် စဝင်ကတည်းက ရထားသံလမ်းတွေ စားသွားတာရှိတယ်၊ သူတို့မြေစာသွန်ချလိုက်တဲ့အခါ စားသွားတဲ့ဟာလည်း ရှိတယ်။ အဲ့ဒါ ကုမ္ပဏီမှ ပြန်လုပ်ပေး မယ်ဆိုလည်း ဒီနေ့ထိ ပြန်မလုပ်ပေးသေးဘူး “ ဟု ၎င်းက ပြောသည်။
အင်္ဂလိပ်ခေတ်ကတည်းက ဖောက်လုပ်ခဲ့သည့် နှစ်ပေါင်း ၁၀၀ ကျော်ရှိ အဆိုပါ ရထားလမ်းသည် သတ္တုထုတ်လုပ်သော ကုမ္ပဏီက အသုံးမပြုတော့ကြောင်း၊ သို့သော် ကျားစခန်းတွင် နေထိုင်သည့် ဒေသခံများက နမ္မတူမြို့သို့ ကားရထား စီးပြီး သွားလာနေသေးကြောင်း သိရသည်။
လွန်ခဲ့သည့် ၂၀၁၀ ခုနှစ်မှစပြီး နမ္မတူ – ဘော်တွင်း သတ္တုထုတ်လုပ်မှုကို ဝင်းမြင့်မိုရ် ကုမ္ပဏီ နှင့် EAP Global Mining Company Limited တို့ ပူးပေါင်းပြီး အစိုးရ နှင့် ၁၅ နှစ်ကြာ ချုပ်ဆိုထားပြီး ကိုဗစ် – ၁၉ ရောဂါ ဖြစ်ပွားချိန်၌ ထုတ်လုပ်မှု ရပ်တန့်သွားခဲ့ပြီး ၂၀၂၂ ခုနှစ် ဧပြီလတွင် လုပ်ငန်း ပြန်လည်ပတ်ခဲ့ကြောင်း သိရသည်။
