သီပေါမြို့နယ် လူငယ်တဦး သေနတ်ပစ်ခံရ

0

သျှမ်းပြည် မြောက်ပိုင်း သီပေါမြို့နယ် နမ့်မ ကျေးရွာ တွင် အသက် ၁၈နှစ် အရွယ် လူငယ် သေနတ်ပစ်ခံရသည့် အလောင်း တွေ့ရှိကြောင်း သတင်းရရှိသည်။

Photo by နမ့်မ ဒေသခံ တဦး၊ သေနတ်ပစ်ခံရသည့် နမ့်မ ဒေသခံ လူငယ်တဦး

ဖြစ်စဉ်မှာ ဇန်နဝါရီ ၃၁ရက်နေ့မှ စတင်ပြီး ပျောက်ဆုံးနေသည့် စိုင်းအောင်လူ ကို ကျည်ဆံဖြင့် သေဆုံးနေသည့် ရုပ်အလောင်း ကို ယမန်နေ့ (ဖေဖော်ဝါရီ ၂) ရက်နေ့ မနက် ၁၀နာရီခွဲ တွင် တွေ့ရှိခဲ့ကြောင်း နမ့်မ ဒေသခံ လူငယ် အဖွဲ့ စိုင်းထွန်း က သျှမ်းသံတော်ဆင့် သို့ ပြောသည်။

“ လွန်ခဲ့တဲ့ ၃ရက်နေ့ က ပျောက်သွားတာ။ မနေ့က တော့သူ့ ရုပ်အလောင်းကိုတွေ့ရတယ်။ ဦးခေါင်းမှာ ကျည်ဒဏ်ရာရတယ်။ ဘယ်သူက ပစ်တယ်ဆိုတာ မသိဘူး” ဟု စိုင်းထွန်း က ဆိုသည်။

သေဆုံးသူသည် နမ့်မကျေးရွာ နှင့် တမိုင်ကျော်ခန့် ဝေးသည့်နေရာတွင် သေနတ်ဒဏ်ရာဖြင် သေဆုံးနေကြောင်း စိုင်းထွန်း က ပြောသည်။

“ သူက ဖရဲသီးခြံသွားစောင့်တာ။ အိမ်မပြန်လာတာ ၃ရက်ရှိတော့ အိမ်ကလူတွေစိတ်ပူပြီး သွားရှာကြတာ။ အဲ့မှာ သူ့အလောင်းကို တွေ့ရတာပဲ။ အဲ့နေရာမှာပဲ မြေမြုပ် လိုက်တယ်” ဟု စိုင်းထွန်း က ဆိုသည်။

သေနတ်ပစ်ခံရပြီး သေဆုံးသည့် စိုင်းအောင်လူသည် အိမ်ထောင်သည် ဖြစ်ပြီး ကလေး မရသေးကြောင်း၊ မူးယစ်ဆေးဝါး ကင်းစင်သည့် လူငယ်ဖြစ်ကြောင်း လည်း နမ့်မ ဒေသခံ ပြည်သူများက ပြောဆိုသည်။

“ သူက အေးတယ်။ မူးယစ်ဆေး မသုံးဘူး။ တောထဲမှာ ပစ်ခံရတော့ လူမှား ပစ်တာလားမသိဘူး။ ဘယ်သူလာပစ်သွားလဲ မသိဘူး” ဟု နမ့်မ ဒေသခံ စိုင်းလှမောင် က ပြောသည်။

သျှမ်းပြည် မြောက်ပိုင်း သီပေါမြို့နယ် နမ့်မ ကျေးရွာအုပ်စု ကျောက်မီးသွေး တူးဖော်သည့် နေရာဖြစ်ပြီး၊ ထိုကျောက်မီးသွေး တူးေးဖာ်မှုကို ဒေသခံများ ကန့်ကွက်ဆန္ဒပြကြကြောင်း သိရသည်။

Leave a Comments

SHARE