နမ့်စန်မြို့လယ်ခေါင် အမျိုးသားတဦး သေနတ်ပစ်ခံရ

0

သျှမ်းပြည် တောင်ပိုင်း နမ့်စန်မြို့ လယ်ခေါင်တွင် အမျိုးသား တဦး သေနတ်ပစ်ခံရကြောင်း သတင်းရရှိသည်။

Photo by U Nay Zaw/ နမ့်စန်မြို့လယ်ခေါင်တွင် သေနတ်ပစ်ခံရသည့် အမျိုးသားပုံ

ဖြစ်စဉ်မှာ ယမန်နေ့ (ဇန်နဝါရီ ၃၀) ညနေ ၄နာရီ ကျော် တွင် အမည်မသိ လက်နက်ကိုင် ၂ဦးက ဆိုင်ကယ်ဖြင့် မောင်းလာကာ ထူးဆန်း ယာဉ်ငယ်လိုင်း ဂိတ်မှူးကို သေနတ်ဖြင့် ၄ချက် ပစ်သွားကြောင်း နမ့်စန် ဒေသခံ အမျိုးသား တဦး က သျှမ်းသံတော်ဆင့် သို့ ပြောသည်။

“ သေနတ်ပစ်တာတော့ ၄ချက်၊ ထိတာတော့ ၃ချက်ပါ။ ခေါင်းတချက်၊ ဗိုက်တချက်၊ ဘယ်ဖက် လက်မောင်းတချက် ထိတယ်။ လောဆယ်တော့ ဒဏ်ရာကို ခွဲစိတ်ထားတယ်။ စိုးရိမ်စရာတော့ မရှိတော့ဘူး” ဟု ၎င်း က ပြောသည်။

သေနတ်ပစ်ခံရသူသည် အသက် ၄၈ အရွယ် ရှိ အမျိုးသားဖြစ်ပြီး၊ ဆိုင်ကယ်ဖြင့်လာရောက် ပစ်ခတ်သွားသည့် တရားခံ ၂ဦး ကို လက်ရှိ အချိန်ထိ မမိသေးကြောင်းလည်း သိရသည်။

“ ဆိုင်ကယ်နဲ့ ဆိုတော့ တရားခံမမိလိုက်ဘူး။ အခုတော့ မြို့ဝင်၊ မြို့ထွက် လုံခြုံရေးတွေ တင်းကြပ်ထားတယ်” ဟု အဆိုပါ အမျိုးသား က ဆိုသည်။

အဆိုပါ သေနတ်ပစ်ခံရသည့် သူသည် သာမာန် အရပ်သားဖြစ်ပြီး နိုင်ငံရေး နှင့် မပတ်သက်ကြောင်း၊ လူအေးဆေး နေသည့် ဟုလည်း နမ့်စန်ဒေသခံများက ပြောသည်။

နမ့်စန်မြို့လယ်ခေါင်အတွင်း သေနတ်ပစ်မှု နှင့် ပတ်သတ်ပြီး နမ့်စန် ရဲစခန်းကို ဆက်သွယ်မေးမြန်းရာ “ တရားခံကို စုံစမ်းနေဆဲ ပါ” ဟု သျှမ်းသံတော်ဆင့် သို့ ပြောသည်။

နမ့်စန်မြို့ လယ်ခေါင် တွင် အမည်မသိ လက်နက်ကိုင် အဖွဲ့ဝင် က သေနတ်လာရောက်ပစ်ခတ်မှုကြောင့် ဒေသခံများ စိုးရိမ်မှုဖြင့် နေထိုင်နေရကြောင်းလည်း ဒေသခံများက ပြောသည်။

Leave a Comments

SHARE