မူဆယ်မြို့ တရုတ်နယ်စပ်ဂိတ်များတွင် ယနေ့အချိန်ထိ တရုတ်နိုင်ငံမှ ပြန်လာသည့် မြန်မာအလုပ်သမားများ ရှိနေဆဲ ဟု သတင်းရရှိသည်။

တရုတ်နိုင်ငံ တွင် ဖြစ်ပေါ်နေသည့် Nobel Corona Virus (နိုဗယ်လ် ခိုရိုနာ ဗိုင်းရပ်စ်) ဝူဟန် ကူးစက်မြန်ရောဂါကြောင့် အရေး ပေါ် အခြေအနေတရပ်အဖြစ် ကမ္ဘာ့ကျန်းမာရေးအဖွဲ့က ကြေငြာကာ ဇန်နဝါရီလ ၃၀ ရက် ယနေ့လက်ရှိအချိန် ကမ္ဘာတဝှမ်း နိုင်ငံပေါင်း ၂၀ အတွင်း ထို ဗိုင်းရပ်စ်ပိုး ကူးစက်ခံရသူ ၇၈၇၅ ဦး သေဆုံးသူ ၁၇၀ ဦးရှိပြီဖြစ်ကြောင်း South China Morning Post သတင်းတွင်ဖော်ပြထားသည်။

တရုတ်နယ်စပ် မူဆယ်မြို့ရှိ နယ်စပ်ဂိတ်များတွင်မူ ယနေ့ချိန်ထိ ဖွင့်လှစ်ထားပြီး တရုတ်နိုင်ငံမှ ပြန်လာသည့် အလုပ်သမား တရက်လျှင် ၂၀၀ ဦးခန့်ရှိကြောင်း မူဆယ်မြို့ ပြည်နယ်လွှတ်တော်ကိုယ်စားလှယ်အမတ် စိုင်းကျော်သိန်း က သျှမ်းသံတော်ဆင့် သို့ ပြောသည်။

“ နယ်စပ် ဂိတ် တံခါး က မပိတ်ဘူး။ တရုတ်ရော မြန်မာရော မပိတ်ဘူး။ တရုတ်နှစ်သစ်ကူး အလုပ်တွေ ပိတ်တော့ အလုပ်သမားတွေ ကပြန်လာတယ်။ တကယ်တော့ ပိတ်လိုက်ရင် သူတို့ ခိုးပေါက်ကနေ လာမယ်။ခိုးပေါက်ကနေဆိုရင် ကျန်းမာရေး စစ်လို့ မရတော့ဘူး” ဟု စိုင်းကျော်သိန်း က ဆိုသည်။

လက်ရှိ မူဆယ်- တရုတ်နယ်စပ်ဂိတ်တွင် တရုတ်ပြည်မှ ပြန်လာသည့် မြန်မာလုပ်သားများသာရှိကြောင်း၊ တရုတ်နိုင်ငံသားများ မြန်မာပြည်ဘက်သို့ ဝင်လာခြင်းမရှိတော့ကြောင်း၊ မြန်မာပြည်ပြန်လာသည့် မြန်မာလုပ်သားများကို ကျန်းမာရေး မှ စိစစ်ဆောင်ရွက်လျက်ရှိကြောင်းလည်း စိုင်းကျော်သိန်း က ရှင်းပြသည်။

ဇန်နဝါရီလ ၂၆ ရက်နေ့က တရုတ်ပြည်မှ ပြန်လာသည့်မြန်မာ အလုပ်သမား ၂ ဦး သည် ကိုယ်အပူချိန်တက်နေရာ မူဆယ်ဆေးရုံတွင် စစ်ဆေးမှု ခံယူစေခဲ့သည်။ ၎င်း ၂ ဦးအနက် အမျိုးသားမှာ သာမာန် အဖျားရောဂါဖြစ်သဖြင့် ဆေးရုံမှ ဆင်းခွင့်ရခဲ့သည်။ လက်ရှိတွင် ကျန်အမျိုးသမီးတဦးကို မူဆယ်ဆေးရုံတွင် ဆေး ကုသပေးနေကြောင်း သိရသည်။

“ အမျိုးသားကိုတော့ ပြန်လွှတ်လိုက်ပြီ။ အမျိုးသမီးကတော့ အခုထိ ဆေးရုံမှာရှိတယ်။ ဆရာဝန် တွေပြောပြချက် အရ သူတို့က သာမာန်ဖျားတာပါ။ အမျိုးသမီးလည်း အခု သက်သာလာပါပြီ” ဟု စိုင်းကျော်သိန်း က ဆက်လက်ပြောသည်။

လက်ရှိ တရုတ်ပြည် မှ ပြန်လာသည့် အလုပ်သမားများကို ကျန်းမာရေး ဌာန က သေချာ စိစစ်မှုပြုလုပ်နေသော်လည်း ကော်ရိုနာ ဗိုင်းရပ်( ဝူဟန်) ကူးစက်မြန် သည့် ရောဂါ ဖြစ်နေပြီး ရောဂါ လက္ခဏာသည် ရက်တပတ်ကြာမှ ပေါ်လာနိုင်သည့်အတွက် တရုတ်နယ်စပ်တွင်နေထိုင်သည့် ပြည်သူများအတွက် စိုးရိမ်မှုအရှိန် မြင့်တက်လာနေပါသည်။
“ ဒီရောဂါ အကြောင်း ကျနော်တို့ သိရသလောက် ရိုးရိုးအဖျားတိုင်းတာနဲ့ လည်း မတွေ့ရဘူးလို့ကြားတယ်။ ဒီမှာ က နေ့တိုင်းတရုတ်ပြည်က လာတဲ့ အလုပ်သမားတွေရှိနေတော့ ရောဂါပိုးပါလာမှာ ကြောက်နေရတယ်” ဟု မူဆယ်မြို့ဒေသခံ နန်းရွှေအောင် က သျှမ်းသံတော်ဆင့် သို့ ပြောသည်။

တရုတ်နယ်စပ် ဂိတ်များ ယနေ့တိုင် ဖွင့်လှစ်နေမှု သည် ဒေသခံများအတွက် စိုးရိမ်စရာ အချက်ဖြစ်နေကြောင်း၊ နေရပ်ပြန်လာသည့် အလုပ်သမား ကို မိမိနေရပ် မပြန်ခိုင်းသေးဘဲ သေချာ စိစစ်ပြီးမှသာ ပြန်လွှတ်သင့်သည် ဟု နန်းရွှေအောင် က ပြောသည်။

ကိုရိုနာ ဗိုင်းရပ်စ် ကာကွယ်ရန်အတွက် အရှေ့တောင်အာရှရှိ နိုင်ငံတိုင်း Mask (နှာခေါင်းအုပ်)များကိုအလုအယက်ဝယ်ယူတပ်ဆင်ကြရာ မြန်မာနိုင်ငံတွင်လည်း ယခင်က ထက် ဈေးတင်ရောင်းနေကြကြောင်းလည်း မူဆယ်ဒေသခံများက ပြောဆိုလိုက်သည်။

“ Mask က ဆေးဆိုင်တွေမှာတောင် ပြတ်နေပြီ။ တချို့ ဆေးဆိုင်တွေက ဈေး တင်ရောင်းနေကြတယ်။ အရင်က တထုတ် ၅၀၀ ကျပ် ကို အခု ၂၀၀၀ကျပ်နဲ့ ပေးဝယ်နေရတယ်” ဟု နန်းရွှေအောင် က ဆိုသည်။

ထိုင်းနိုင်ငံတွင် Mask ကို ပုံမှန်ဈေးနှုန်းထက်ပိုမြင့်သောဈေးနှုန်းဖြင့် ရောင်းချပါက ထောင်ဒဏ် ၇ နှစ် သို့မဟုတ် ငွေဒဏ် ဘတ် ၁၄၀၀၀၀( မြန်မာငွေ ကျပ်သိန်း ၇၀)၊ သို့မဟုတ် ပြစ်ဒဏ် ၂ ခု စလုံး ကျခံရမည်ဟုလည်း ထိုင်းမီဒီယာများတွင် ဖော်ပြထားသည်။

လက်ရှိ မြန်မာနိုင်ငံသည် တရုတ်နယ်စပ် နှင့် ပိုပြီး နီးစပ်သည့် နိုင်ငံဖြစ်သော်လည်း ကိုရိုနာ ဗိုင်းရပ်စ် နှင့် ပတ်သက်ပြီး အသိပညာပေးမှု အားနည်းနေကြောင်း လည်း ပြည်သူများ က ပြောဆိုလိုက်သည်။