ထိုင်းနိုင်ငံ ချင်းမိုင်မြို့တွင် တရုတ်ပြည်မှလာသော ခရီးသွားဧည့်သည် အမျိုးသမီးတဦး ပဟေဠိဆန်ဆန်သေဆုံးမှုကြောင့် ကိုရိုနာဗိုင်းရပ်စ်ဖြစ်မည်ကိုဒေသခံပြည်သူလူထု စိုးရိမ်ထိတ်လှန့် နေကြသည်။

ဇန်နဝါရီလ ၂၉ ရက် ယနေ့မနက် ၈ နာရီခွဲခန့်က ချင်းမိုင်ခရိုင် မယ့်ရင်းမ်မြို့နယ်ရှိ ဆုကွန်ထာရာ ရီဆော့တ် တွင်တည်းခိုနေသော တရုတ်နိုင်ငံ ရှန်တုန်းမြို့သူ အသက် ၃၂ နှစ်အရွယ်  Wang Li Juan သည် တည်းခိုသည့်အခန်းအတွင်းသေဆုံးနေသဖြင့် လူမှုကူညီရေးအဖွဲ့မှ အလောင်းအားသွား ရောက်သယ်ဆောင်ကာ ချင်းမိုင်မြို့ နခွန်းဖင်း ဆေးရုံ ရင်ခွဲရုံသို့ပို့ဆောင်ထားကြောင်းသိရသည်။

၎င်းအမျိုးသမီးအလောင်းအား သက်ဆိုင်ရာအာဏာပိုင်များသွားရောက်စစ်ဆေးရာတွင် လုပ်ကြံသတ်ဖြတ်ခံရခြင်းမျိုးမဟုတ်ကြောင်း ပြောဆိုခဲ့ပြီး သေဆုံးရခြင်းအကြောင်းရင်းကို စစ်ဆေးမှုပြုလုပ်နေဆဲဖြစ်ကြောင်းသာ သတင်းထောက်များအားပြောဆိုသည်။

ချင်းမိုင်ခရိုင် ကျန်းမာရေးဌာနကမူ ၎င်းအမျိုးသမီးသည် ယမန်နေ့ညက အရက်အလွန်အကျွံသောက်ထားမှုကြောင့်သေဆုံးဖွယ်ဖြစ်ကြောင်းသာ ကနဦး ကြေငြာထားသည်။

သေဆုံးသူ တရုတ်အမျိုးသမီး၏ ခရီးသွားဖော်များက- “မနေ့ညကတောင်မှ ညစာအတူတူစားကြသေးတယ်။ သူသိပ်နေမကောင်းဘူးလို့ပြောတယ်။ ဒီမနက်အံ့ဩဖွယ် သေဆုံးနေတယ် ” – ဟုပြောဆိုကြောင်းလည်း  The One ထိုင်းသတင်းဌာနက ရေးသားဖော်ပြထားသည်။

အမျိုးသမီးအလောင်းသွားရောက်သယ်ဆောင်သူများမှာ ဗိုင်းရပ်စ်ကာကွယ်သည့်ဝတ်စုံများဖြင့် သွားရောက်သယ်ဆောင်ကြသဖြင့်  ချင်းမိုင်လူထုကြား စိုးရိမ်ထိတ်လှန့်မှုများဖြစ်ပွါးခဲ့ကြသည်။

ချင်းမိုင်မြို့နယ်အတွင်း သျှမ်းရွှေ့ပြောင်းအလုပ်သမားများ၏ ကျန်းမာရေးအတွက် ကူညီဆောင်ရွက်မှုပေးနေသော နန်းယိင်းက – “ချင်းမိုင်ရောက် ရွှေ့ပြောင်းအလုပ်သမားတွေက မြန်မာနိုင်ငံကလာတဲ့ သူတွေချည်းဘဲ။ အလုပ်သမားတွေက ကျန်းမာရေးစောင့်ရှောက်မှုအပေါ် သိပ်ပြီးအလေးမထားကြဘူး။ အထူးသဖြင့် ကျမတို့ သျှမ်းပြည်သားအလုပ်သမားတွေ ပေါ့။ အရမ်း စိုးရိမ်မိပါတယ်။ မတ်စ် တွေတပ်ထားစေချင်တယ်။ ” – ဟုသျှမ်းသံတော်ဆင့်အားပြောသည်။

လက်ရှိတွင် ဇန်နဝါရီလ ၂၉ ရက် မွန်းတည့်ချိန်အထိ စာရင်းအရ တရုတ်နိုင်ငံအပါအဝင် တကမ္ဘာလုံးတွင် ကိုရိုနာဗိုင်းရပ်စ်ကူးစက်ခံရသူ ၆၀၇၈ ဦးရှိပြီး သေဆုံးသူမှာ ၁၃၂ ဦးရှိပြီဖြစ်ကြောင်း  South China Morning Post သတင်းအရသိရသည်။ ဗိုင်းရပ်စ်ကူးစက်ခံရသူများမှာ တရုတ်နိုင်ငံတွင်အများဆုံးဖြစ်ပြီး တရုတ်ခရီးသွား အများဆုံးဝင်ရောက်လည်ပတ်သော ထိုင်းနိုင်ငံတွင် ဗိုင်းရပ်စ်ပိုး ကူးစက်ခံရသူ ၁၄ ယောက်ဖြင့် ဒုတိယအများဆုံးဖြစ်နေပါသည်။