သျှမ်းပြည်မြောက်ပိုင်း သီပေါမြို့နယ် ကုံးမုံကျေးရွာ အနီးတွင် ယနေ့ မနက်ပိုင်း ၌ အမျိုးသား ၂ဦး၊ အမျိုးသမီး ၁ဦး သေနတ် ထပ်မံ ပစ်ခံရကြောင်း သတင်းရရှိသည်။
ဖြစ်စဉ်မှာ ယနေ့မနက် ၈နာရီခွဲတွင် သီပေါမြို့နယ် ကုံးမုံကျေးရွာ အနီး တွင် သေနတ်ပစ်ခံရသည့် အလောင်း ၃လောင်းတွေ့ရှိကြောင်း၊ အပစ်ခံရပြီး သေဆုံးသူများမှာ အမျိုးသား ၂ဦး နှင့် အမျိုးသမီး ၁ဦးဖြစ်ကြောင်း၊ ထိုမည်သည့်အဖွဲ့ က လာရောက် ပစ်ခတ်သည်ကို မသိရှိကြောင်း သီပေါမြို့ နယ်စည်းမခြား ပရဟိတ မှ ကိုမျိုး က ပြောသည်။
“ ကျနော်တို့ကို အကြောင်းကြားလာလို့ အလောင်းသွားသယ်ခဲ့တယ်။ ဘယ်သူတွေဆိုတာ တော့ မသိသေးဘူး။ပိုင်ရှင်လည်း မသိရသေးဘူး။ အလောင်းကိုသီပေါမြို့ ပြည်သူ့ဆေးရုံ ရင်ခွဲရုံ မှာ ပို့ထားပါတယ်” ဟု ကိုမျိုး က ပြောသည်။
အဆိုပါ သေနတ်ပစ်ခံရပြီး သေဆုံးသည့် နေရာ သည် မူးယစ်ဆေးရောင်းဝယ်ဖောက်ကားသည့်နေရာဖြစ်ပြီး ယခု သည် တတိယ အကြိမ် ပစ်ခံရခြင်းဖြစ်ကြောင်းလည်း သီပေါမြို့ ဒေသခံများက ပြောသည်။
“ အဲ့နေရာက အခုနဲ့ဆို ၃ကြိမ်ရှိပြီး သေနတ်ပစ်ခံရတာ။ ဘာကြောင့် ပစ်တယ်ဆိုတာလည်း ရှင်းရှင်းလင်းလင်း တခါမှ မသိရဘူး။ အဲ့နေရာက မူးယစ်ဆေးသုံးစွဲတဲ့သူ၊ ရောင်းတဲ့သူတွေပဲ သွားတာ” ဟု သီပေါမြို့ ဒေသခံ အမျိုးသား တဦးဖြစ်သည့် စိုင်းစိုး က သျှမ်းသံတော်ဆင့် သို့ ပြောသည်။
အဆိုပါ မကြာခဏ သေနတ်ပစ်ခံရသည့်နေရာသည့် သာမာန် ပြည်သူများ မသွားရဲသည့်နေရာဖြစ်ကြောင်းလည်း စိုင်းစိုး က ပြောသည်။
ထို ကုံးမုံ ကျေးရွာ အနီးတွင် ယခုနှစ် ဇန်နဝါရီ ၁၁ရက်နေ့တွင် အမျိုးသား ၂ဦး သေနတ်ပစ်သတ်ခံရပြီး၊ ယမန်နှစ် ဒီဇင်ဘာ ၂၈ရက်တွင်လည်း အမျိုးသား ၃ဦး သေနတ်ပစ်သတ်ခံခဲ့ရသေးကြောင်း သိရသည်။
ထို့ပြင် ယခုလ ၁၅ ရက် တွင် လည်း လားရှိုးမြို့နောင်မွန်ကျေးရွာတွင် အမျိုးသား ၂ဦးလည်း ထိုနည်းတူ သေနတ်ပစ်သတ်ခံခဲ့ရသည်။
Leave a Comments