သျှမ်းပြည် မြောက်ပိုင်း လားရှိုးမြို့နယ် နောင်မွန်ကျေးရွာ အနီးတွင် အမျိုးသား ၂ဦး သေနတ်ပစ်ခံရပြီး သေဆုံးသွားကြောင်း သတင်းရရှိသည်။
ဖြစ်စဉ်မှာ လားရှိုးမြို့နယ် နောင်မွန်ကျေးရွာ အနီးတွင် ယမန်( ဇန်နဝါရီ ၁၄) ရက် ည ၇နာရီခွဲတွင် အမျိုးသား ၂ဦး ကို အမည်မသိ လက်နက်ကိုင် အဖွဲ့က သေနတ်ပစ်သွားကြောင်း လားရှိုးဒေသခံ အသိုင်းအဝန်း ကပြောသည်။
“သေနတ်သံ ၅ချက်ကြားတယ်။ အဲ့မှာ အမျိုးသား ၂ဦး သေနတ်ပစ်ခံလိုက်ရတာပဲ။ ဘယ်အဖွဲ့ဆိုတာတော့ မသိဘူး။ အဲ့နေရာက မူးယစ်ဆေးဝါးသုံးစွဲတဲ့သူတွေ သွားတဲ့နေရာပါ” ဟု လားရှိုးဒေသခံ စိုင်းဟန် က ပြောသည်။
အမျိုးသား ၂ဦး သေနတ်ပစ်ခံရပြီး သေဆုံးသည့်နေရာသည် မူးယစ်ဆေးဝါး ရောင်းဝယ်ဖောက်ကားသည့်နေရာဖြစ်ပြီး၊ လားရှိုးဒေသခံများ မသွားလာရဲသည့် နေရာဖြစ်သည် ဟုလည်း ဒေသခံများ ပြောပြချက် အရသိရသည်။
“ အဲ့နေရာက မူးယစ်ဆေးတွေ ရောင်းနေတာ ပွဲဈေးတန်း ကျနေတာပဲ။ တဲတွေ ရာနဲ့ရှိတယ်။ ဘယ်သူမှ သွားမရှင်းကြဘူး။ ဒေသခံတွေ အဲ့နေရာကို ဖြတ်သွားဖို့ကြောက်နေကြတယ်” ဟု နောင်မွန်ကျေးရွာ တွင်နေထိုင်သည့် စိုင်းမောင် က သျှမ်းသံတော်ဆင့် သို့ ပြောသည်။
သေနတ်ပစ်ခံရပြီး သေဆုံးသူ ၂ဦးကို ယမန်နေ့ ည ၁၁နာရီ တွင် လားရှိုးပြည်သူ့ဆေးရုံသို့ ပို့ဆောင်ထားကြောင်း လည်း စိုင်းမောင် က ဆိုသည်။
အဆိုပါ ကိစ္စနှင့် ပတ်သက်ပြီး သျှမ်းသံတော်ဆင့် မှ လားရှိုးမြို့ မ အမှတ်(၁) ရဲစခန်းကို ဖုန်းဆက်မေးမြန်းရာ ပြန်လည် ဖြေကြားခြင်းမရှိပေ။
လားရှိုးမြို့နယ် အတွင်း မူးယစ်ဆေးဝါး သုံးစွဲသူများပြားလာသဖြင့် ဒေသခံများ စိုးရိမ်ထိတ်လန့်မှု မျိုးစုံဖြင့် သွားလာနေရကြောင်း၊ နေ့ခင်း အချိန် လုယက်မှုများ၊ ဓားခုတ်မှုများလည်း မကြာခဏ ဖြစ်သော်လည်း သက်ဆိုင်ရာ ရဲတပ်ဖွဲ့များက ထိရောက်စွာ ဖြေရှင်းပေးချင်းမရှိကြောင်းကို လည်း လားရှိုးမြို့ လူမှုကူညီရေးတွင် အလုပ်လုပ်သည့် ကိုဝင်းကို က ပြောပြသည်။
“ ဆေးသမားတွေ များတော့ ကျနော်တို့ယောင်္ကျားတွေတောင် မလုံခြုံတဲ့နေရာဖြစ်နေတယ်။ အချိန်မရွေး လုယက်မှု ဖြစ်နိုင်တော့ ကိုယ့် လုံခြုံရေးနဲ့ကိုယ် သွားလာနေရတယ်” ဟု ကိုဝင်းကို က ဆိုသည်။
သက်ဆိုင်ရာ ရဲတပ်ဖွဲ့များ အနေဖြင့် မူးယစ်ဆေးဝါး ကိစ္စ၊ ဒေသလုံခြုံရေးကို သေချာလုပ်ပေးရန် လည်း လားရှိုးဒေသခံများက တောင်းဆိုကြသည်။
“ အခု လုယက်နေတဲ့သူက သူတို့ရဖို့ပဲသိတယ်။ ဗိုက်ကြီးသယ်တောင် မရှောင်ဘူး။ ကျမတို့ဘယ်သူ့ကို အားကိုးရမှန်းတောင်မသိတော့ဘူး” လားရှိုးမြို့ ဒေသခံ နန်းလင်းခမ်း က ပြောသည်။
ဇန်နဝါရီ ၁၁ရက်နေ့တွင်လည်း သီပေါမြို့နယ် ကုံးမုံကျေးရွာတွင် အမျိုးသား ၂ဦး သေနတ်ပစ်သတ်ခံရပြီး လက်ရှိ အချိန်ထိ တရားခံရှာဖွေ လွှတ်မြောက်နေဆဲ ဟု သိရသည်။
Leave a Comments