သျှမ်းပြည် မြောက်ပိုင်း ကွတ်ခိုင်မြို့နယ် မော်ဟန် ကျေးရွာအုပ်စု တွင် အမျိုးသားတဦး သေနတ်ပစ်သတ်ခံရကြောင်း သတင်းရရှိသည်။
ဖြစ်စဉ်မှာ ဇန်နဝါရီ ၉ ရက် ည ၇နာရီ ဝန်းကျင်တွင် တာမိုးညဲ ဘက်မှ ဆိုင်ကယ်ဖြင့် ပြန်လာသည့် အမျိုးသား ၂ဦးကို တအာင်း(ပလောင် ) အမျိုးသား လွှတ်မြောက်ရေး တပ်မတော်(TNLA) တပ်သားမှ သေနတ်ပစ်လိုက်သဖြင့် အသက် ၃၀ အရွယ် ဒေါင်ဝ်ခေါင် ကျည်ထိမှန်ပြီး သေဆုံးခဲ့ကြောင်း သိရသည်။
“ TNLA တပ်က မူးယစ်ဆေးစစ်ဖို့ တားတဲ့အချိန် ကျနော်တူတွေက ဆိုင်ကယ်မရပ်ဘဲ ဆက်မောင်းတယ်။ အဲ့မှာ TNLA တပ်သားတွေက သေနတ်နဲ့ ပစ်လိုက်တယ်လို့ ပြောတယ်။ ကျနော်တူ က မူးယစ်ဆေးလည်း မသုံးဘူး” ဟု သေဆုံးသွားသည့် ဒေါင်ဝ်ခေါင်၏ ဦးလေး ဖြစ်သူ ဒေါင်ဇေ က သျှမ်းသံတော်ဆင့် သို့ ပြောသည်။
သေနတ်ပစ်ခံရပြီး သေဆုံးသွားသည့် ဒေါင်ဝ်ခေါင် အတွက် TNLA တပ်ဖွဲ့ မှ ငွေ ၁၀သိန်း နှင့် ဆန် ၁၀အိတ်လာရောက် ပေးကြောင်း၊ လည်း ဦးဒေါင်ဇေ က ပြောသည်။
“ TNLA ကတော့ သူတို့သေနတ်နဲ့ ပစ်လိုက်တယ်ဆိုတာ ဝန်ခံပါတယ်။ မှားပစ်တယ်လို့ ပြောပါတယ်” ဟု ဦးဒေါင်ဇ က ထပ်လောင်းပြောသည်။
ထို့ပြင် သေဆုံးသွားသည့် အသက် ၃၀ အရွယ်ရှိ ဒေါင်ဝ်ခေါင်သည် ကလေး ၂ယောက်၏ ဖခင်ဖြစ်ပြီး၊ မိသားစုကို ရှာဖွေ ကျွေးမွေးသည့် သူ ဖြစ်ကြောင်း သိရသည်။
ဆက်လက်ပြီး မော်ဟန်ကျေးရွာ အုပ်ချုပ်ရေးမှူး ခေါယိန်း က “ သေနတ်ပစ်ခံရပြီး သေသွားတယ်။သူတို့ တာမိုးညဲဈေးကနေ ပြန်လာတာ။ မူးယစ်ဆေးဝါး စစ်တဲ့သူတွေက တား တာ ကို သူတို့က မရပ်ပေးလို့ TNLA တပ်သားက သူတို့ ကိုပစ်လိုက်တယ်” ဟု သျှမ်းသံတော်ဆင့် သို့ပြောသည်။
TNLA တပ်သားများက မူးယစ်ဆေးဝါး စစ်ဆေးနေစဉ် ဆိုင်ကယ်မရပ်တဲ့ အတွက် ခြိမ်းခြောက်သည့်သဘောဖြင့် ပစ်လိုက်ရာ လူထိမှန်မှု ဖြစ်သွားသည် ဟု မော်ဟန်ကျေးရွာအုပ်စု တွင်နေထိုင်သူများ ပြောပြချက်အရသိရသည်။
“ တမင်ရည်ရွယ်ပြီး ပစ်တာမဟုတ်ဘူး။ ခြိမ်းခြောက်ရင်းနဲ့ မှန်သွားတယ်လို့ပြောတယ်။ မူးယစ်ဆေးဝါး သုံးစွဲတာကို ကျနော်တို့မလိုလားပါဘူး။ ဒါပေမယ့် အဲ့လောက်ထိတော့ မလုပ်သင့်ဘူး” ဟု ခေါယိန်း က ဆိုသည်။
TNLA အနေဖြင့် မူးယစ်ဆေးဝါးကို စစ်ဆေးမည့်ကိစ္စ သက်ဆိုင်ရာ ကျေးရွာ အုပ်ချုပ်ရေးမှူး များကို အကြောင်းကြားခြင်းမရှိကြောင်း၊ နောက်နောင် ထိုကဲ့သို့မဖြစ်စေရန် လည်း တိုင်းရင်းသားလက်နက်ကိုင်များကို ပြောချင်သည် ဟု ခေါယိန်း က ထပ်လောင်းပြောသည်။
TNLA တပ်သားများ ထိုကဲ့သို့ သေနတ်ပစ်ဖြေရှင်းသည့်အပေါ် ဒေသခံများက ရှုပ်ချလိုက်သည်။
ကွတ်ခိုင်မြို့နယ် အတွင်းနေထိုင်သည့် ဒေသခံများအနေဖြင့် လက်နက်ကိုင်ဆောင်သည့် အဖွဲ့အစည်းတိုင်းကို ကြောက်နေရကြောင်း ဒေသခံများ က ပြောသည်။
“ ကျနော်အနေနဲ့တော့ နောက်နောင် ဒီလို မဖြစ်စေချင်ဘူး။ အခုတော့ ရွာသားတွေက ကြောက်နေရတယ်” ဟု ဒေါဝ်ခေါင်၏ ဦးလေးဖြစ်သူ က တောင်းဆိုလိုက် ပြောသည်။
အဆိုပါ ကိစ္စနှင့် ပတ်သက်ပြီး သျှမ်းသံတော်ဆင့် မှ TNLA ၏ပြောရေးဆိုခွင့်ရှိသူ ဗိုလ်မှူး တားအိုက်ကျော် ကိုင်ဆောင်သည့် ဖုန်းကို ဆက်သွယ်သော်လည်း ဖုန်းစက်ပိတ်ထားသည်။
Leave a Comments