သို့

သျှမ်းသံတော်ဆင့်သတင်းဌာန မှ တဆင့်

နိုင်ငံ့အကြီးအကဲ၊ ရှမ်းပြည်နယ်အကြီးအကဲများ သိရှိပြီး တာ၀န်ယူဖြေရှင်းပေးပါရန်

ပြည်ထောင်စု သန္ဓေတည်ရာ ပင်လုံမြို့တွင် မြို့သူမြို့သားများကြောက်ရွံ့နေသည့် ပြည်သူ့စစ်တပ်ဖွဲ့များ မကြာခဏ ပြန်ပေးဆွဲနေမှုများအား နိုင်ငံ့အကြီးအကဲ၊ ရှမ်းပြည်နယ်အကြီးအကဲများ တာ၀န်ယူဖြေရှင်းပေးပါရ န်။

သမိုင်းဝင်မြို့ ပြည်ထောင်စုမြို့လေးဖြစ်တဲ့ ရှမ်းပြည်တောင်ပိုင်း လွိုင်လင်မြို့နယ် ပင်လုံမြို့မှာ မကြာခဏဆိုသလို ပြန်ပေးဆွဲတာတွေကို ကြားနေရပါတယ်။ ဘယ်သူကပြန်ပေးဆွဲတာလဲဆိုတာ နားစွင့်ကြည့်လိုက်တော့ ပြည်သူ့စစ်ပါတဲ့။

ပြီးခဲ့တဲ့နိုဝင်ဘာလကုန်ရက် နေ့လည် ၁၁ နာရီလောက်မှာ ပင်လုံနယ်မြေရှိ PNO/PNA တပ်ဖွဲ့ဝင်လို့ အမည်ခံသူ ၄ ဦးက စစ်ဝတ်စုံ၊ လက်နက်အပြည့်အစုံနဲ့ ပင်လုံမြို့ ရပ်ကွက် ၄ ပိဋိကတ်ကျောင်းလမ်းမှာ နေထိုင်တဲ့ ဖြားကုမ္မာကျော်ရဲ့သမီး အိမ်ခြံမြေရောင်းဝယ်ရေးပွဲစားလုပ်သူ အသက် ၆၀ နှစ်ရှိ  ဒေါ်ပါဒိုက်(ခေါ်)မွိုဒိုက် နဲ့ တူဖြစ်သူ အသက် ၂၆ နှစ်ရှိ ခွန်ခမ်းဟတ် ကို ပင်လုံမြို့ ရပ်ကွက် ၄ ပိဋိကတ်ကျောင်းလမ်းနေ PNO/PNA တပ်ဖွဲ့ဝင် ဦးထွက်ချန်းရဲ့တူတွေက လိုင်စင်မဲ့ကားအဖြူရောင်နဲ့ လာရောက်ဖမ်းဆီးခေါ်ဆောင်သွားပါတယ်။

ညနေ ၃ နာရီမှာ ဒေါ်ပါဒိုက်  ပြန်လွှတ်လာပေမဲ့ တူဖြစ်သူ စိုင်းခမ်းဟတ် ကို တောတွင်းရှိ PNA စခန်းတစ်နေရာမှာ ချုပ်နှောင်ဖမ်းဆီးထားပါတယ်။ ဒီကိစ္စကို ဘယ်သူ့ကိုမှ တိုင်ကြားတာ ပြောကြားတာ မပြုလုပ်ဖို့နဲ့ သတင်းပေါက်ကြားပြဿနာဖြစ်ရင် သူတို့ရဲ့တစ်မိသားစုလုံးကို သတ်ဖြတ်မယ်လို့ ခြိမ်းခြောက်ပြောကြားပြီး ဒေါ်ပါဒိုက် ကို ပြန်လွှတ်လာပါတယ်။

ဒီကိစ္စဟာ ပင်လုံမြို့ပေါ်နေပြည်သူတွေကို ထိတ်လန့်တုန်လှုပ်စေတဲ့အပြင် ပြည်သူတွေရဲ့ဘ၀ လုံခြံမှု မရှိဘူးလို့ ခံစားမိပါတယ်။ မြို့ပေါ်မှာ ပြည်သူ့စစ်အမည်ခံသူတွေဟာ အစိုးရရဲ့ အုပ်ချုပ်မှုပိုင်းဆိုင်ရာကို ဝင်ရောက်စွက်ဖက်တယ်လို့လည်း ယူဆမိပါတယ်။ အလားတူဖြစ်စဉ်တွေ လူမသိရှင်မသိဘဲ ပြောင်ပြောင်တင်းတင်း အတင့်ရဲကာ မိမိတို့နဲ့ သဘောထားခြင်းမတူတဲ့သူတွေကို လာရောက်ဖမ်းဆီး ပြန်ပေးဆွဲတာကို မကြာခဏ ကြားနေရပါတယ်။ ဒီလိုလာရောက်ဖမ်းဆီး ပြန်ပေးဆွဲတာဟာ ၄ ကြိမ်လောက်ရှိသွားပြီလို့ ကြားသိရပါတယ်။

ပြည်သူတွေဟာ လုံလုံခြုံခြုံ အေးအေးချမ်းချမ်း နေထိုင်လိုကြပါတယ်။ ဒီတစ်ခေါက် ပြန်ပေးဆွဲတာ အကြွေးရလိုမှုကြောင့်လို့ သိရပါတယ်။ ဒီနေရာမှာ မေးစရာရှိတာက ပြည်သူ့စစ်ကို အကြွေးဆပ်စရာ ရှိလို့လားပေါ့။ အကြွေးနဲ့ မဆိုင်တဲ့သူကို ဖမ်းဆီးချုပ်နှောင် ပြန်ပေးဆွဲတာ မဖြစ်သင့်ပါဘူး။ အကြွေးရှင်နဲ့ အကြွေးပေးစရာရှိတဲ့သူတို့နဲ့သာ သက်ဆိုင်ပြီး ညှိနှိုင်းဖြေရှင်းဖို့ လိုအပ်ပါတယ်။

ဒီလို ပြည်သူတွေကို ပြည်သူ့စစ်က ပြန်ပေးဆွဲတဲ့ကိစ္စတွေကို နိုင်ငံသူရဲကောင်းအမေစု ၊ နိုင်ငံတော် သမ္မတ၊ ရှမ်းပြည်နယ်ဝန်ကြီးချုပ်နဲ့ ရှမ်းပြည်နယ်အစိုးရအဖွဲ့တို့ သိရှိပြီး ပြည်သူတွေရဲ့ အသက်အိုး အိမ်စည်းစိမ်ကို စောင့်ရှောက်ကာကွယ်ပေးဖို့  ၂၀၂၀ နှစ်သစ်ကာလမှာအလေးအနက် တောင်းဆိုလိုက်ရပါတယ်။

ဒီပြသနာတွေကို အမြန်ဆုံး ကူညီဖြေရှင်းပေးနိုင်လိမ့်မယ်လို့ယုံကြည်မျှော်လင့်ပါတယ်။

လုံခြုံငြိမ်းချမ်းစွာ နေထိုင်လိုတဲ့ ပြည်ထောင်စုကျောက်တိုင်မြို့က
ခွန်ငြိမ်းချမ်း