သျှမ်းပြည် အရှေ့ပိုင်း မိုင်းဆတ် မြို့နယ် ထိုင်းနိုင်ငံသား တဦး ငှားရမ်းထားသည့် ဈေးဆိုင်အတွင်း မူးယစ်ဆေးဝါး ကျပ်သိန်း ၁၃၀၀၀ သိမ်းဆည်းရမိကြောင်း သတင်းရရှိသည်။
ဖြစ်စဉ်မှာ ဒီဇင်ဘာ ၂၈ ရက် တွင် မိုင်းဆတ် မြို့နယ် မိုင်းထလမ်းကျေးရွာ အုပ်စု ယောင်ခ(နားယောင်း) ဈေး ၌ ထိုင်းနိုင်ငံသား ကျော့ချိုင်း ငှားရမ်းထားသည့် ဈေးဆိုင်ခန်း ကို ဝင်ရောက်ရှာဖွေရာ စိတ်ကြွဆေးပြား ၁၃၀၀၀၀၀ပြား (ဒေသ ပေါက်ဈေး တန်ဖိုး ကျပ်သိန်း ၁၃၀၀၀) ကို သိမ်းဆည်းရမိကြောင်း မူးယစ်ရဲတပ်ဖွဲ့ ထုတ်ပြန်ချက် အရ သိရသည်။
ထို ဈေးဆိုင်ငှားရမ်းနေထိုင်သည့် ထိုင်းနိုင်ငံသား ကျော့ချိုင်း မှာ လွှတ်မြောက်နေကြောင်းလည်း မူးယစ်ရဲတပ်ဖွဲ့ ထုတ်ပြန်ချက်တွင် ဖော်ပြထားသည်။
ဆက်လက်ပြီး လွှတ်မြောက်နေသည့် မူးယစ်ဆေးဝါး ပိုင်ရှင် ထိုင်းနိုင်ငံသား ကျော့ချိုင်းကို မိုင်းတွမ်းနယ်မြေ ရဲစခန်းတွင် မူးယစ်ဆေးဝါး နှင့် စိတ်ကို ပြောင်းလဲစေသော ဆေးဝါး များဆိုင်ရာ ဥပဒေ ဖြင့် အမှုဖွင့်အရေးယူပြီး တရားခံဖမ်းဆီးရမိရေး ကို စုံစမ်းဆောင်ရွက်လျက်ရှိကြောင်း လည်း ထုတ်ပြန်ချက်တွင်ရေးသားထားသည်။
“ မူးယစ်ဆေး တန်ဖိုးများရင် တရားခံ က အလိုအလျောက်ပျောက်နေတယ်။ ဒါက စဉ်းစားစရာပဲ။ ကျနော်တို့ သျှမ်းရှေ့ မှာ မူးယစ်ဆေးဝါး တန်ဖိုးများရင် ပိုင်ရှင်မဲ့ ဖြစ်သွားတယ်” ဟု တာချီလိတ်မြို့ ဒေသခံ စိုင်းတစ် က သျှမ်းသံတော်ဆင့် သို့ ပြောသည်။
သျှမ်းပြည် အရှေ့ပိုင်း တွင် တန်းဖိုးများသည့် စိတ်ကြွဆေးပြားများ၊ မူးယစ်ဆေးဝါးများကို သိမ်းဆည်းရာတွင် ပိုင်ရှင်မဲ့များနေကြောင်း၊ မူးယစ်ဆေး လုပ်သည့် သူများစုသည် လက်နက်ကိုင် တပ်ဖွဲ့နှင့် ဆက်စပ်မှု ရှိနေသည် ဟုလည်း စိုင်းတစ်က ပြောဆိုလိုက်သည်။
