သျှမ်းပြည် မြောက်ပိုင်း မူဆယ်တွင် ပစ်ခတ်မှု ဖြစ်ပွားကာ တဦးသေဆုံး ၂ဦး ဒဏ်ရာရခဲ့ကြောင်း သတင်းရရှိသည်။
ဖြစ်စဉ်မှာ ဒီဇင်ဘာ ၂၃ရက် ည ၈နာရီဝန်းကျင်တွင် မူဆယ်မြို့ တော်ရွက်ကျေးရွာ အနီးတွင် ပြန်ပေးဆွဲရန် ကြိုးစားရာမှ ပစ်ခတ်မှု ဖြစ်ပွားပြီး တဦးပွဲချင်းပြီး သေဆုံးကာ၊ ၂ဦး ဒဏ်ရာရခဲ့ကြောင်း မူဆယ်မြို့ ဂရုဏာလူမှုကယ်ဆယ်ရေး အသင်းမှ ဦးသောင်းထွန်း က ပြောသည်။
“ ပြန်ပေးဆွဲ ရာကနေ ပစ်ခတ်မှု ဖြစ်တယ်လို့ကြားရတယ်။ ပြန်ပေးဆွဲ ဘက်ကတော့ တယောက်သေတယ်၊ တယောက် ဒဏ်ရာရတယ်။ ဒေသခံ တဦးကိုလည်းထိတယ်” ဟု ဦးသောင်းထွန်း က ပြောသည်။
ပစ်ခတ်မှု ကြောင့် ဒဏ်ရာရသည့် တဦးသည် စိုးရိမ်စရာရှိပြီး၊ တဦးမှာ စိုးရိမ်စရာမရှိသော်လည်း ဒဏ်ရာရသူ များကို လားရှိုးဆေးရုံသို့ ပို့ဆောင်ထားကြောင်း ဦးသောင်းထွန်း က ဆိုသည်။
ထိုပြန်ပေးဆွဲရန် ကြိုးစားပြီး ပစ်ခတ်မှုသည် မည်သည့်အဖွဲ့အစည်းဖြစ်သည်ကို မသိရှိသေးကြောင်းလည်း မူဆယ်မြို့မ ရဲစခန်းမှ တာဝန်ကျသည့် ရဲ တဦးက သျှမ်းသံတော်ဆင့် သို့ပြောသည်။
“ ပစ်ခတ်မှု က ဘယ်အဖွဲ့ဆိုတာ စုံစမ်းနေပါတယ်။ တယောက်သေပြီး ၂ဦးဒဏ်ရာရတယ်” ဟု ၎င်း တာဝန်ကျ ရဲ တဦးက ပြောသည်။
ထို့ ပြင် မူဆယ်မြို့ မင်္ဂလာမူဆယ် နှင့် တော်ရွက် ကျေးရွာ အနီး ပစ်ခတ်မှုသည် စီးပွားရေး ပြဿနာကြောင့် ပစ်ခတ်မှု ဖြစ်ကြောင်း နှင့် ထိုပစ်ခတ်မှုတွင် ပြည်သူ့စစ် အဖွဲ့ တဖွဲ့ နှင့် အမည်မသိ အဖွဲ့ က ပစ်ခတ်မှုသည် ဟု မျက်မြင်သည့် ဒေသခံ စိုင်းဆမ် က သျှမ်းသံတော်ဆင့် သို့ ပြောသည်။
“ အစက ယာဉ်တိုက်မှု ဖြစ်တာ။ နောက် ကားပေါ် ကနေ ဗျောက်ဖောက်တယ်ပဲထင်တာ။ ကျနော် ကားရှေ့ ရောက်မှ သူတို့ပစ်နေတာ သိတာ။ ကျနော်ကို မထိတာကံကောင်းတယ်။ ဘေးပတ်ဝန်းကျင် က အိမ်တွေတော့ ကျည်ထိတယ်” ဟု စိုင်းဆမ် က ဆိုသည်။
သျှမ်းပြည် မြောက်ပိုင်း မူဆယ်မြို့သည် တရုတ်နယ်စပ် စီးပွားရေး မြို့ဖြစ်ပြီး၊ လက်နက်ကိုင် ပြည်သူ့စစ်များ သွားလာ လှုပ်ရှားသည့် နေရာဖြစ်ပြီ၊ မကြာခဏ ပစ်ခတ်မှု ဖြစ်ပွားသည့် နေရာဖြစ်သည်။
