သျှမ်းပြည် မြောက်ပိုင်း မိုင်းရယ်မြို့နယ် အတွင်းရှိ နမ့်တုန်းတံတားသည် ယနေ့ နေလည်ပိုင်းတွင် မြေပြိုကျမှုဖြစ်ပြီးကားတစီး ကျွံကျသွားကြောင်း သတင်းရရှိသည်။
မိုင်းရယ်မြို့နယ် တန့်ယန်း- မိုင်းရယ် ကားလမ်း ရှိ နမ့်တုန်းတံတား သည် မြေပြိုကျမှုဖြစ်ပွားကာ ကားတစီး ကျွံကျသွားပြီး လူ ၂ဦး ဒဏ်ရာရရှိသွားကြောင်း မျက်မြင်ကြုံတွေ့ရသည့် “ဝ” ပြင်ပ ဆက်ဆံရေးရုံး တာဝန်ရှိသူ ဦးညီရမ်း က ပြောသည်။
“ မြေသားပြိုသွားတာ။ ခွေးဘီလူးကားတစီး ကျွံသွားတယ်။ ကျတော့မကျဘူး။ လူ ၂ဦး ကတော့ဒဏ်ရာ အနည်းငယ်ရပါတယ်” ဟု ဦးညီရမ်းက ပြောသည်။
အဆိုပါလမ်းသည် ၂လမ်းသွားကားလမ်းဖြစ်ကာ တဖက်ခြမ်းသာမြေသားပြိုသွားကြောင်း၊ လက်ရှိတွင် ကားသေးသာ ဖြစ်သန်းနေရကြောင်း လည်း ထို ကားလမ်းကိုအသုံးပြုနေသည့် ကားဆရာ စိုင်းခမ်း က သျှမ်းသံတော်ဆင့် သို့ ပြောသည်။
“ သက်ဆိုင်ရာက ကားတန်ချိန်ပိုဖြတ်သန်းလို့ မြေသားပြိုတယ်လို့ ပြောတယ်။ ကျနော်အထင်တော့ တန်ချိန်ပိုတာမဟုတ်ဘူး။တည်ဆောက်မှု မခိုင်လို့ပါ” ဟု စိုင်းခမ်းက ဆိုသည်။
လက်ရှိမှာ အဆိုပါ နမ့်တုန်း တံတား သည် ခံနိုင်ရည်မရှိတော့သဖြင့် ဖြတ်သန်းသွားလာသည် ကားသေးများအတွက်လည်း အန္တရာယ်ရှိနိုင်ကြောင်း လည်း စိုင်းခမ်းက ထပ်လောင်းပြောသည်။
ဆက်လက်ပြီး စိုင်းခမ်း က “ ကားသေးတွေကတော့ သွားနေတာပဲ။ လမ်းတော့မပိတ်ဘူး။ အန္တရာယ်များတယ်။ တကယ်ဆို ပေးမဖြတ်သင့်တော့ဘူး” ဟု လည်း ပြောသည်။
သျှမ်းပြည်မြောက်ပိုင်း တန့်ယန်းမြို့ နှင့် မိုင်းရယ်မြို့ သွားလာသည် ကားလမ်းကို ကောင်းမွန်စွာ တည်ဆောက်စေချင်ကြောင်း၊ ခိုင်ခံ့သည့် တံတားများ ဆောက်ပေးစေချင်ကြောင်းလည်း ထိုလမ်းတွင် ပြေးဆွဲသည့် ကားသမားများက ပြောသည်။
