နမ့်ဆန်မြို့နယ် အမျိုးသား ၂ဦး မိုင်းနင်းမိ တဦးသေ၊ တဦးဒဏ်ရာရ

0

သျှမ်းပြည် မြောက်ပိုင်း နမ့်ဆန်မြို့နယ် ပန်နင်းကျေးရွာ တွင် ယမန်နေ့( ဒီဇင်ဘာ ၁၁) ရက်တွင် အမျိုးသား ၂ဦး မြေမြုပ်မိုင်းနင်းမိကာ တဦး သေဆုံး၊တဦး ဒဏ်ရာရရှိကြောင်း သတင်းရရှိသည်။


Photo by အဘမ်း/ယမန်နေ့ မိုင်းနင်းမိသူသွားရောက်ကယ်ဆယ်သည့် ပုံ

ဖြစ်စဉ်မှာ ယမန်နေ့ (ဒီဇင်ဘာ၁၁) ရက် နေ့လည် ၁၂နာရီခန့်တွင် နမ့်ဆန်မြို့နယ် ပန်နင်းကျေးရွာ မှ သောက်သုံးရေး ပြင်ရန် အတွက် သွားစဉ် အမျိုးသား ၂ဦး သည် မိုင်းနင်းမိကာ အသက် ၂၃နှစ် အရွယ် နန္ဒာ သည် ပွဲချင်းပြီးသေဆုံးပြီး၊ အသက် ၅၆နှစ် အရွယ် ဦးမြဇော်သည် ထိခိုက်ဒဏ်ရာရရှိခဲ့ကြောင်း အိုမ်တမောဝ် လူမှုကူညီရေးအသင်း မှ မိုင်းအဘမ်း က ပြောသည်။

“ သေဆုံးသူက ထိခိုက်ဒဏ်ရာ သိပ်မပြင်းဘူး။ သူလန့်ပြီး ပွဲချင်းဆုံးသွားတာနေမယ်။ ဦးမြဇော်ကတော့ ရင်ဘတ်နဲ့ ဒူးခေါင်း ထိတယ်။ ရင်ဘတ်ထိတော့ ဓာတ်မှန်ရိုက်ထားရတယ်။ ရှပ်ပြီးထိရင်တော့ စိုးရိမ်စရာမရှိဘူး။ အဆုတ်တွေ နှလုံးတွေ ထိမှာ ပဲ စိုးရိမ်ရတယ်” ဟု မိုင်းအဘမ်းက ဆိုသည်။


Photo by အဘမ်း/ယမန်နေ့ မိုင်းနင်းမိသူသွားရောက်ကယ်ဆယ်သည့် ပုံ

ဒဏ်ရာရသည့် ဦးမြဇော်သည် ယမန်နေ့ ည ၇နာရီ ခွဲ အချိန်၌ ကျောက်မဲ ပြည်သူ့ဆေးရုံ သို့ရောက်ရှိကာ ဆေးကုသခံယူနေကြောင်း လည်း သိရသည်။

ယခုနောက်ပိုင်း သျှမ်းပြည် မြောက်ပိုင်း ကျောက်မဲခရိုင် အတွင်း မြေမြုပ်မိုင်းများသည် ကျေးရွာ ဒေသခံများ လှုပ်ရှားသွားလာသည့်နေရာ၊ ကျေးရွာ အနီးတဝှိက်တွင် ရှိနေသည့် နေ့စဉ်နှင့်အမျှ မိုင်းဒဏ်ကို ခံနေရကြောင်းလည်း မိုင်းအဘမ်း က ပြောသည်။

“ မြေမြုပ်မိုင်းတွေ က အခုဆိုရင် ရွာနားမှာ ရှိနေတော့ မိုင်းရဲ့ ဒဏ်ကို ပြည်သူတွေ ဆက်ခံနေရအုံးမယ်” မိုင်းအဘမ်း က ပြောသည်။

မြေမြုပ်မိုင်း ထိသူများသည့် နေ့စဉ် သေဆုံးမှု၊ ဒဏ်ရာရရှိမှုကို တွေ့ရှိရသည်မှာ စိတ်မကောင်းကြောင်း၊ လက်နက်ကိုင်တပ်များအနေဖြင့် ပြည်သူများနေထိုင်သည့် ကျေးရွာအနီးတွင် မိုင်းမထောင်ရန် တောင်းဆိုချင်ကြောင်း လည်း ကျောက်မဲမြို့ဒေသခံ လုံးလှ က သျှမ်းသံတော်ဆင့် သို့ ပြောသည်။

“ စစ်ဖြစ်တဲ့နေရာတွေ က မိုင်းအန္တရာယ်မကင်းကြပါဘူး။ ဒါပေမယ့် စစ်မြေပြင်မှာ မြေမြုပ်မိုင်း မသုံးတာကောင်းတယ်။စစ်ပွဲမဖြစ်ရင်လည်း မိုင်းအန္တရာယ် က ဆက်ပြီး စိုးရိမ်ရအုံးမယ်” ဟု လုံးလှ က ဆိုသည်။

ယခုနှစ် အတွင်း သျှမ်းမြောက် ကျောက်မဲမြို့နယ် အတွင်း မိုင်းအန္တရာယ် များပိုပြီး ဆိုးရွားကာ တနေ့လျှင် တဦးနှုန်း မိုင်းထိနေကြောင်းလည်း ကျောက်မဲမြို့ လူမှုကူညီရေးအသင်းများ က ပြောသည်။

သျှမ်းပြည် မြောက်ပိုင်း ကျောက်မဲမြို့နယ် နှင့် သီပေါမြို့နယ် အတွင်း မြန်မာ့တပ်မတော် နှင့် တိုင်းရင်းသား လက်နက်ကိုင်များ လှုပ်ရှားသည့် နေရာဖြစ်ပြီး မြေမြုပ်မိုင်းများစွာ ရှိကြောင်း သိရသည်။

လွန်ခဲ့သည့် ဒီဇင်ဘာ ၆ ရက်တွင် ကျောက်မဲမြို့နယ် ခုံငင်းကျေးရွာသား ၂ဦးသည် လက်ဖက်ခြံသွားပြီးမိုင်းနင်းမိကာ ဒဏ်ရာစိုးရိမ်သဖြင့် မန္တလေး ပြည်သူ့ဆေးရုံသို့ ပို့ဆောင်ရကြောင်း သိရသည်။

Leave a Comments

SHARE