သျှမ်းပြည် မြောက်ပိုင်း ကျောက်မဲမြို့ပေါ် သို့ ယမန်နေ့ ဒီဇင်ဘာ ၁၀ ရက် ညပိုင်းက စစ်ရှောင်များ ထပ်မံ ရောက်ရှိလာကြောင်း သတင်းရရှိသည်။
တိုက်ပွဲများ ထပ်မံ ဖြစ်ပွားလာမည် ကို စိုးရိမ်စိတ်ကြောင့် ကျောက်မဲမြို့နယ် ကွန်ကော်ကျေးရွာ အုပ်စု အုံးအွီး ကျေးရွာ မှ ဒေသခံ သည် ၄၃ဦး စစ်ရှောင်လာကြောင်း၊ လက်ရှိတွင် ကျောက်မဲမြို့ ရပ်ကွက်(၈) ဓမ္မာရုံ တွင် နေရာချထားကြောင်း ကျောက်မဲမြို့ စစ်ရှောင် ကူညီရေး ကော်မတီ မှ ဦးတင်မောင်သိန်း က သျှမ်းသံတော်ဆင့် သို့ ပြောသည်။
“ မနေ့က စစ်ရှောင် ၄၃ဦး ရောက်လာတယ်။ အဓိက တော့ စားဝတ်နေရေး၊ လိုအပ်တယ်။ အခုက အရမ်းအေးတော့ စောင်တွေ အနွေးထည်တွေလည်း လိုအပ်တယ်။ သူတို့က အရေးပေါ် ထွက်လာတာဆိုတော့ လိုအပ်ချက်တွေ တော့များတယ်” ဟု ဦးတင်မောင်သိန်း က ဆိုသည်။
ကျောက်မဲမြို့နယ် ကွန်ကော်ကျေးရွာအုပ်စု အတွင်းတွင် တအာင်း(ပလောင်) အမျိုးသားလွတ်မြောက်ရေး တပ်မတော် (TNLA) နှင့် မြန်မာ့တပ်မတော် တို့ ထိတွေ့မှု မကြာခဏ ဖြစ်ပွားကာ ဒေသခံများလည်း နေရပ်စွန့်ခွာမှု မကြာခဏ ပြုလုပ်ခဲ့ရကြောင်း သိရသည်။
“ ဒီစစ်ရှာင်တွေက မကြာခဏ တိမ်းရှောင်နေတဲ့ ပြည်သူတွေပါ။ အခုလည်း တိုက်ပွဲ တော့ မဖြစ်ပေမယ့် သူတို့ဘက်မှာ တိုက်ပွဲထပ်ဖြစ်မှာ ကြောက်လို့ ထွက်ပြေးလာတာပါ” ဟု ကျောက်မဲမြို့ အိုမ်တမောဝ် လူမှု ကူညီရေး အသင်းမှ အဘမ်း က သျှမ်းသံတော်ဆင့် သို့ ပြောသည်။
ယမန်နေ့ ကျောက်မဲမြို့ ပေါ်သို့ ရောက်လာသည့် စစ်ရှောင်များအတွက် အစားအသောက် များ၊ နေရာ ထိုင်ခင်းများနှင့် အေးချမ်းသည့် ရာသီဖြစ်သည့်အတွက် စောင်များ၊ အနွေးထည်များ လည်း လိုအပ်ကြောင်းလည်း အဘမ်း က ပြောသည်။
လွန်ခဲ့သည် ဒီဇင်ဘာ ၇ ရက်နေ့တွင်လည်း ကျောက်မဲမြို့နယ် ကွန်ကော်ကျေးရွာ ဒေသခံ ၈၀ ကျော်သည် ကျောက်မဲမြို့ ပေါ်သို့ ထွက်ပြေးလာပြီး ဆွေမျိုးများအိမ်တွင် နေထိုင်ကြကြောင်း လည်း လူမှုကူညီရေး အသင်း များက ပြောသည်။
“တချို့ စစ်ရှောင်တွေ က ဆွေမျိုးအိမ်မှာ လာနေကြပေမယ့် အခက်အခဲတော့ ရှိကြမှာပဲ။ ဆွေမျိုးအိမ်မှာ ရက်အကြာရင်နေရင်လည်း ဘယ်လို အဆင်ပြေမလဲ။ စစ်ရှောင်တွေ အားလုံး စုနေရင်တော့ ကောင်းတာပေါ့” ဟု အဘမ်း က ထပ်လောင်းပြောသည်။
ကျောက်မဲမြို့နယ် အတွင်း မြန်မာ့ တပ်မတော် နှင့် TNLA တို့သည် နိုဝင်ဘာ မှစတင်ကာ တိုက်ပွဲ ဖြစ်ပွားကာ စစ်ရှောင် ၇၀၀ ကျော် ထွက်ပြေး တိမ်းရှောင်နေရကြောင်းသိရသည်။
Leave a Comments