သျှမ်းပြည် မြောက်ပိုင်း ကျောက်မဲမြို့ပေါ်သို့ ယမန်နေ့(ဒီဇင်ဘာ ၇) ရက် တွင် စစ်ရှောင် များ ရောက်လာကြောင်း သတင်းရရှိသည်။
Photo by Shan Chaw Chaw/ စစ္ေရွာင္မ်ား ေခကြဲေက်းရြာမွ မုိင္းေငါ့သို႔ ေျခက်င္လမ္းေလွ်ာက္လာသည့္ပံု
အဆိုပါ ရောက်လာသည့် စစ်ရှောင်များသည် ကျောက်မဲမြို့နယ် ကွန်ကော်ကျေးရွာ မှ ဒေသခံများဖြစ်ပြီး၊ လူဦးရေ ၈၀ ကျော်ရှိကြောင်း လက်ရှိမှာ ကျောက်မဲမြို့ပေါ်ရှိ ဆွေမျိုးများအိမ်တွင် နေထိုင်ကြောင်း ကျောက်မဲမြို့ ဇီဝိတ လူမှု ကူညီရေး အသင်းမှ ဦးတင်မောင်သိန်း က ပြောသည်။
“ မနေ့ က ည ရောက်လာတာပါ။ သူတို့က ဆွေမျိုးအိမ်မှာ နေကြတယ်။ သီးသန့်နေထိုင်တာတော့ မရှိဘူး” ဟု ဦးတင်မောင်သိန်း က ပြောသည်။
ထို စစ်ရှောင်များ စာရင်းတွင် အမျိုးသမီး နှင့် ကလေးငယ် အများစုဖြစ်နေကြောင်းသိရသည်။
လက်ရှိ ကျောက်မဲမြို့ သို့ ရောက်လာသည့် စစ်ရှောင်များသည် ကျောက်မဲမြို့နယ် ခေကွဲရွာ တွင် တိမ်းရှောင်နေကြသည့် ခွန်ကော်၊အုံအွီးရွာ မှ စစ်ရှောင်များဖြစ်ကြကြောင်း သိရသည်။
စစ်ရှောင်များသည် ကျောက်မဲမြို့ ပေါ်သို့ရောက်ရန် အတွက် ၁၅ မိုင် ဝေးကွာသည့် ခေကွဲ ရွာ မှ မိုင်းငေ့ါ ထိ ခြေလျင် လမ်းလျှောက်လာကြပြီး၊ မိုင်းငေါ့မှ တဆင့် ကျောက်မဲမြို့ ပေါ်သို့ ကားဖြင့် လာကြကြောင်း သိရသည်။
ယမန်နေ့ ရောက်လာသည့် စစ်ရှောင်များသည် ယခင်တွင် လည်း စစ်ရှောင်ခဲ့ဖူးသည့် သူများဖြစ်ကြောင်း၊ တိုက်ပွဲဆက်လက်ပြင်းထန်လာမည်ကို စိုးရိမ်သဖြင့် ကျောက်မဲမြို့ပေါ်သို့ရောက်လာကြောင်း အိုဝ်တမောဝ် လူမှုကူညီရေးအသင်းမှ အဘမ်းက သျှမ်းသံတော်ဆင့် သို့ ပြောသည်။
“ ဒီချိန်က အေးတဲ့အချိန်ဆိုတော့ စစ်ရှောင်တွေ အတွက် လိုအပ်ချက်ကများမယ်။ ဆွေမျိုးအိမ်တွေမှာနေလဲ သူတို့အတွက် စောင်တွေ စားစရာတွေတော့လိုမယ်” ဟု အဘမ်း က ဆိုသည်။
ကျောက်မဲမြို့နယ်အတွင်း မြန်မာ့တပ်မတော် နှင့် တအာင်း(ပလောင်) အမျိုးသားလွတ်မြောက်ရေး တပ်မတော် တို့သည့် နိုဝင်ဘာလ မှ စတင်ကာ တိုက်ပွဲ ဖြစ်ပွားခဲ့ပြီး၊ စစ်ရှောင် ၇၀၀ကျော် ထွက်ပြေး တိမ်းရှောင်နေရကြောင်းသိရသည်။
