သျှမ်းပြည် အရှေ့ပိုင်း တာချီလိတ်မြို့နယ် မိုင်းဖုန်းကျေးရွာအုပ်စု ရှိ ဘုန်းကြီးကျောင်းသို့ ဆွမ်းကပ်ပြီး အပြန် အမျိုးသမီး တဦး မောင်းလာသည့် ကားတစီး သေနတ်ပစ်ခံရကြောင်း သတင်းရရှိသည်။
ဖြစ်စဉ်မှာ ဒီဇင်ဘာလ ၄ ရက် မနက်(၁၀)နာရီ တွင် အသက် ၄၀ကျော် နန်းဝမ်းလီ သည် မိုင်းဖုန်းကျေးရွာ (က) တွင် အလှူအတန်းသွားလုပ်ပြီး အပြန်တွင် ဝမ်ပုံ ရဲစခန်း မှ ရဲသား များက ကားကို သေနတ်ပစ်ခဲ့ကြောင်း ဒေသခံများပြောကြားချက် အရ သိရသည်။
“ ဘုန်းကြီးကျောင်းဆွမ်း သွားကပ်ပြီး အပြန်မှာ ရဲ၁၀ယောက်စောင့်တယ်။ ကျမ ကား ရှေ့မှာ ကာ ၃စီးရှိတယ်။ ရဲတယောက်က လက်ပြတော့ ကျမ အထင် ရှေ့ ကားက ပြသာနာရှိနေလို့ လက်ပြ ပြန်ဆုတ်ခိုင်းတယ်။ ကျမလည်း ကားကို ဖြည်းဖြည်းပဲ လှည့်ပြီးဆုတ်နေချိန် ရဲတွေက ကျမကို လိုက်ပြီး ပစ်တော့တာပဲ။ ကျမလည်း ကြောက်ကြောက်နဲ့ သွားလှူခဲ့တဲ့ ဘုန်းကြီးကျောင်းကို ပြန်မောင်းသွားတယ်” ဟု သေနတ်ပစ်ခံရသည့် နန်းဝမ်းလီ က သျှမ်းသံတော်ဆင့် သို့ ပြောသည်။
ဆက်လက်ပြီး ရဲများ သေနတ်ပစ်ခတ်မှု ကို ကြောက်လန့်ကာ ဘုန်းကြီးကျောင်းသို့ ပြန်လည် မောင်းလာကြောင်း၊ ရဲများသည် လက်နက်များဖြင့် ဘုန်းကြီးကျောင်းအထိ လိုက်လာကြောင်း နန်းဝမ်းလီ ကပြောသည်။
“ ရဲကတော့ မူးယစ်ဆေး သယ်တဲ့ကားထင်လို့ပစ်တယ်ဆိုပြီး ပြောသွားတာပဲ။ ဒါပေမယ့် ရွာကလူတွေ၊ တရားထိုင်တဲ့သူတွေ က ထိတ်လန့်တယ်။ ကျမလည်း လန့်သွားတယ်။ မသေတာပဲ ကံကောင်းတယ်” ဟု နန်းဝမ်းလီ က ဆိုသည်။
တာချီလိတ်ခရိုင် ရဲတပ်ဖွဲ့ များ မင်းမဲ့ ဆန်စွာ ရမ်း ပစ်ခတ်နေသည့် ကိစ္စ နှင့် ပတ်သက်ပြီး တာချီလိတ်မြို့နယ် မိုင်းဖုန်းကျေးရွာ အုပ်စု နေထိုင်သူများက ရှုတ်ချကြောင်း ပြောဆိုလိုက်သည်။
“ မိုင်းဖုန်းကျေးရွာ ပတ်ဝန်းကျင် မှာနေထိုင်တဲ့ ကျနော်တို့ ရှမ်းတွေပဲ။နောက် ခွင့်ပြုမိန့်မရှိဘဲ ဒီလို ပစ်နေတဲ့အပေါ် ကျနော်တို့ အထက်ကို တင်ပြမယ်။ မနက် ၁၀နာရီ ချိန် မှာ ဒီလိုပစ်တာကိုတော့ လက်မခံနိုင်ဘူး။ ကျနော်တို့ ငြိမ်ခံမယ်ဆိုရင် သူတို့ ဆက်ပြီးတော့ အနိုင့်ကျင့်မယ်” ဟု ဒေသခံ စိုင်းသန်း က ပြောသည်။
ကားကို သေနတ်ပစ်ခတ်ခဲ့သည့် ဝမ်ပုံ ရဲစခန်းမှ ကားကို ပြန်လည်ပြင်ပါက လျော်ကြေးပေးမည်ဖြစ်ကြောင်း၊ ထို့ပြင် ကားကို ပြန်ရောင်းပြီး အသစ်ဝယ်မည်ဆိုပါကလည်း ပြန်လည် ဝယ်ပေးမည်ဟု ကားပိုင်ရှင်ကို ပြောဆိုခဲ့သည်။
“ ကျမကတော့ ကားလျော်ကြေးထက် ဒီလို ပစ်ခတ်တာကို လက်မခံဘူး။ ကျမတို့ကို သူတို့ ထပ်လုပ်မှာ ကြောက်တယ်” ဟု နန်းဝမ်းလီ က ပြောသည်။
ဒေသခံကားအား ရဲတပ်ဖွဲ့ ပစ်ခတ်သည့် ကိစ္စနှင့် ပတ်သက်ပြီး ရဲတပ်ဖွဲ့ များကို မြန်မာနိုင်ငံတော် သမ္မတ ထံ စာရေး တင်ပြသွားမည် ဟုလည်း ဒေသခံများက ပြောဆိုသည်။
