သျှမ်းပြည် မြောက်ပိုင်း နမ္မတူမြို့နယ် မန်စံ ကျေးရွာ အနီးတွင် ယနေ့( နိုဝင်ဘာ ၂၈) ရက် မနက် ၈နာရီ မှစတင်က တိုက်ပွဲဖြစ်ပွားခဲ့ကြောင်း သတင်းရရှိသည်။
ဖြစ်စဉ်မှာ ယနေ့ မနက် ၈နာရီ တွင် မြန်မာ့တပ်မတော် နှင့် သျှမ်းပြည် ပြန်လည်ထူထောင်ရေး ကောင်စီ( RCSS/SSA) တို့တိုက်ပွဲဖြစ်ပွားခဲ့ကြောင်း မန်စံ ဒေသခံများ ပြောပြချက် အရသိရသည်။
“ ဒီနေ့ မနက် ၈နာရီ ကစ သေနတ်သံကြားရတယ်။ နေ့လည် ၁၁နာရီ ကျော်မှာတော့ အသံတိတ်သွားတယ်။ ကျနော်တို့ကြားတာကတော့ RCSS/SSA နဲ့ မြန်မာ့တပ် ဖြစ်တယ်လို့ ကြားတယ်” ဟု မန်စံ ဒေသခံ တဦးဖြစ်သည် စိုင်းစောလှ က ပြောသည်။
အဆိုပါ တိုက်ပွဲဖြစ်ပွားသည့် မန်ဝါကျေးရွာ နှင့် နားဟန်း ကျေးရွာ တွင် တအာင်း(ပလောင်) အမျိုးသားလွတ်မြောက်ရေး တပ်မတော်(TNLA)နှင့် ( RCSS/SSA) တို့ လှုပ်ရှားသည့်နေရာဖြစ်ပြီး၊ ထိုနေရာသည် မန်စံကျေးရွာနှင့် ၄မိုင်သာ ကွာဝေးကြောင်း စိုင်းစောလှ က ပြောသည်။
မြန်မာ့တပ်မတော် သည် RCSS/SSA တပ်စခန်း ရှိသည့် တောင်ကုန်း သို့ သွားစဉ် တပ်သားတဦး မိုင်းနင်းမိရာမှ တိုက်ပွဲဖြစ်ပွားခဲ့သည် ဟုလည်း သိရသည်။
“ ဒီနေ့က မန်စံဈေးနေ့လည်းဖြစ်တယ်လေ။ သေနတ်သံတွေကြားတော့ ဈေးသည်တွေလည်း လန့်နေကြတယ်။ နမ္မတူ တပ်ဘက်ကနေလည်း လက်နက်ကြီးတွေ ပစ်နေတယ်” ဟု စိုင်းစောလှ က ပြောသည်။
မြန်မာ့တပ်မတော် စစ်ယာဉ်တန်းများသည် ယခုလ ၂၆ ရက် မှစတင်ကာ လားရှိုးဘက်မှ နမ္မတူ မြို့ဘက်သို့ တက်ကာ စစ်အင်အား တိုးချဲ့နေကြောင်းလည်း မန်စံဒေသခံများပြောသည်။
လက်ရှိ အချိန်ထိ စစ်ဘေးရှောင်များထွက်လာခြင်းမရှိသေးကြောင်း သိရသည်။
ယနေ့ ဖြစ်ပွားသည့် တိုက်ပွဲ နှင့် ပတ်သက်ပြီး မြန်မာ့တပ်မတော် သတင်းမှန်ပြန်ကြားရေး နှင့် RCSS/SSA ပြောရေးဆိုခွင့် ရှိသူ ကို သျှမ်းသံတော်ဆင့် မှ ဆက်သွယ်မေးမြန်းရာ ပြန်လည်ဖြေကြားခြင်းမရှိပေ။
Leave a Comments