သျှမ်းပြည် မြောက်ပိုင်း လားရှိုးမြို့နယ် နားအိုက်ခန် ကျေးရွာ အနီးတွင် ယမန်နေ့ ည ၈နာရီ ၌ အမျိုးသားတဦး ဓားခုတ်ခံရကြောင်း သတင်းရရှိသည်။
ဖြစ်စဉ်မှာ နိုဝင်ဘာ ၂၆ရက် ည ၈နာရီတွင် လားရှိုးမြို့ နယ် နားအိုက်ခန် ကျေးရွာမှ ကစား စရာ အရုပ် ရောင်းပြီးဆိုင်ကယ်ဖြင့် ပြန်လာသည့် အသက် ၄၀ အရွယ် အမျိုးသားတဦး ကို လူငယ် (၃) ဦးက ဓားဖြင့်ခုတ်သွားကြောင်း သွားရောက်ကူညီပေးသည့် ကမ်းလင့်လက်များဆုံဆည်းရာ မှ ကိုကိုနိုင် က သျှမ်းသံတော်ဆင့် သို့ပြောသည်။
“ အဓိက လူငယ် ၃ ဦးက ဆိုင်ကယ်လုချင်လို့ ဓားခုတ်သွားတာပါ။ ဓားခုတ် ဒဏ်ရာတွေက နားဖူးနဲ့နားခေါင်းကြားမှာ တချက်၊ နောက် ကျောမှာ တချက်၊ ဘယ်ဖက်လက် တချက် ပါ။ ဒဏ်ရာကတော့များတယ်။ အခု လားရှိုး ပြည်သူ့ဆေးရုံ ခွဲစိတ်ဆောင်မှာပါ” ဟု ကိုကိုနိုင် က ပြောသည်။
အရုပ်ရောင်းသည့် အသက် ၄၀ အရွယ်ကို ဆိုင်ကယ်လုယူရန် ဓားဖြင့် ခုတ်သွားသည့် လူငယ် ၃ဦး သည် လက်ရှိအချိန်ထိ လွှတ်မြောက်နေကြောင်း၊ လားရှိုးရဲစခန်းမှ လိုက်လံ စုံစမ်းစစ်ဆေးနေကြောင်း လည်း သိရသည်။
သျှမ်းပြည်မြောက်ပိုင်း လားရှိုးမြို့တွင် မူးယစ်ဆေးဝါး ရောင်းဝယ်ဖောက်ကားမှု ယခင်က ထက် ပိုမိုများလာသဖြင့် ခိုး၊လုယက်မှုလည်း တနေ့ထက် တနေ့ ပိုပြီး များလာကြောင်းလည်း လားရှိုးဒေသခံများပြောပြချက် အရ သိရသည်။
“ ဒီမှာ က မှောင်တဲ့နေရာဆို သိပ်မသွားရဲဘူး။ ဆေးသမားတွေ က လုဖို့ ချောင်းနေတာ။ လုယက်မှုကတော့ နေ့တိုင်းလိုလို ရှိတယ်။ ကြောက်နေရတယ်” ဟု လားရှိုးမြို့ရပ်ကွက် (၂) နေထိုင်သည့် စိုင်းညွန့် က ပြောသည်။
Leave a Comments