သျှမ်းပြည် ပြန်လည်ထူထောင်ရေး ကောင်စီ၊ သျှမ်းပြည် တပ်မတော်( RCSS/SSA) သည် ကလေးသူငယ် ကာကွယ်စောင့်ရှောက်မှုဆိုင်ရာ သဘာတူညီချက် ကို လက်မှတ်ရေးထိုး လိုက်ကြောင်း သတင်းရရှိသည်။

“ သျှမ်းပြည် ဟာ လမ်းတွေပြတ်တောက် ပြီး ဒေသခံတွေ အနိုင်ကျင့်ခံရတာလည်းကြာပါပြီ။ သျှမ်းလူမျိုးတွေ လူ့အခွင့်အရေးချိုးဖောက်ခံရတာ နေရပ်ကနေ ထွက်ပြေးရတာ။ ဘယ်နေရာမှ ခိုလှုံလို့မရဘူး။ အခုတော့ တံခါးပိတ်ရမယ့် အချိန်မဟုတ်တော့ဘူး။ Geneva call နဲ့ပူးပေါင်းပြီး တံခါးဖွင့်လိုက်တာပါ” ဟု RCSS/SSA ခေါင်းဆောင် ဗိုလ်ချုပ်ကြီး ယွက်စစ် ပြောကြားသည်။

ယနေ့ခေတ်ရေစီးကြောင်း ပြောင်းလဲလာသည်နှင့်အမျှ သျှမ်းလူမျိုးများလည်း ခေတ်နှင့်အညီ ပြောင်းလဲဖို့ လိုအပ်ပြီး၊ လူငယ်များကို ပညာရေး ကောင်းမွန်စွာ သင်ကြားစေလိုသည့် စိတ်ကြောင့် လက်မှတ်ရေးထိုးခြင်းဖြစ်သည်ဟု ဗိုလ်ချုပ်ကြီး ယွက်စစ် က ပြောသည်။

ကလေးသူငယ်များသည် တိုင်းပြည်၏ အနာဂတ် များဖြစ်သည့် အတွက် အသက် ၁၈နှစ် မပြည့်ပါက RCSS/SSA ထဲသို့ ပေးမဝင်ရန် လည်း ဗိုလ်ချုပ်ကြီး ယွက်စစ် က ယမန်နေ့ အခမ်းအနားတွင် ပြောဆိုလိုက်သည်။

“ လူငယ်တွေ ၁၈နှစ် မပြည့်ရင် စစ်သားမလုပ်ဖို့။ မိမိဆန္ဒအလျောက်ကလေးတွေ စစ်မှုထမ်းဖို့ ဝင်လာရင်လည်း ဒါကိုသေချာရှင်းပြရမယ်။ မိဘ အိမ်ပြန်ဖို့ပြောရမယ်” ဗိုလ်ချုပ်ကြီး ယွက်စစ်က ပြောသည်။

စေတနာ၊ လူမျိုးချစ်စိတ်ဖြင့် တပ်ထဲဝင်လာမည့် အသက် ၁၈နှစ် မပြည့်သေးသည့်သူများ မိမိနေရပ် မပြန်လိုပါက လွိုင်တိုင်းလျန်းတွင် ဖွင့်လှစ်ထားသည့်ကျောင်းတွင် တက်ရောက်ပညာသင်ယူစေပြီး အသက် ၁၈ နှစ်ပြည့်မှသာ စစ်ပညာသင်စေလိုကြောင်းလည်း ဗိုလ်ချုပ်ကြီး ယွက်စစ် က ထပ်လောင်းပြောသည်။

လွန်ခဲ့သည့် နှစ်ကာလများစွာတွင် လူ့အခွင့်ချိုးဖောက်ခံရပါက တိုင်ကြားရန် ခက်ခဲ ခဲ့ပြီး မည်သည့်နေရာတွင် တိုင်ကြားရမည်ကိုလည်း မသိကြကြောင်း ဗိုလ်ချုပ်ကြီး ယွက်ဆစ် က ပြောသည်။

“ ပြည်သူတွေ အနေဖြင့် ကျနော်တို့ နဲ့ပူးပေါင်းပြီး လူ့အခွင့်အရေး ချိုးဖောက်ခံရရင် စာတင်ကြဖို့ သတင်းတွေ ပို့ကြဖို့ ပြောချင်ပါတယ်” ဟု လည်း ဗိုလ်ချုပ်ကြီး က ဆိုသည်။

Geneva Call အဖွဲ့ နှင့် ချုပ်ဆိုသည့် နားလည်မှု စာချွန်လွှာ သဘောတူညီချက်ကို မွန်ပြည်သစ်ပါတီ (NMSP) နှင့် ကရင်နီ အမျိုးသားတိုးတက်ရေးပါတီ (KNPP) တို့ က ၂၀၁၂ ခုနစ် သြဂုတ် ၂ရက်တွင် ဆွစ်ဇာလန်နိုင်ငံ ဂျီနီဗာမြို့ ၌ တရားဝင် သဘောတူ လက်မှတ်ရေးထိုးခဲ့ပြီးဖြစ်သည်။

ကရင်အမျိုးသားအစည်းအရုံး KNU ကမူ ၂၀၁၃ ခုနှစ် ဂျူလိုင်လ ၂၄ ရက်ကလည်းကောင်း ၊ ချင်းအမျိုးသားတပ်ဦး CNF က ၂၀၁၄ ခုနှစ် မတ်လ ၂၀ ရက်နေ့ကလည်းကောင်း၊ ပအိုဝ်းအမျိုးသားလွတ်မြောက်ရေးတပ်မတော် PNLO က ၂၀၁၄ ခုနှစ် နိုဝင်ဘာလ ၂၄ ရက် ကလည်းကောင်း အသီးသီး Geneva call စာချုပ်လက်မှတ်ရေးထိုးခဲ့ကြသည်။

ဂျီနီဗာ လုပ်ဆောင်ချက်များမှာ ကမ္ဘာ့အရပ်ရပ်တွင် ကလေး သူငယ်ကာကွယ်ရေး၊ အမျိုးသမီးဘဝလုံခြုံရေးနှင့် မြေမြုပ်မိုင်း အသုံးမပြုရေးစသည့် ကိစ္စရပ်များ ပါဝင်ကြောင်း သိရသည်။