သျှမ်းပြည်မြောက်ပိုင်း သိန္နီမြို့တွင်ဗုံးတလုံးပေါက်ကွဲပြီးနောက် ရဲများသွားရောက်စစ်ဆေးရှာဖွေရာ မပေါက်ကွဲသေးသည့်ဗုံးတလုံးပါထပ်မံတွေ့ရှိကြောင်းသိရသည်။
မတ်လ ၆ ရက်နေ့က သိန္နီမြို့ ရပ်ကွက် ၂ ရဲစခန်းအနောက်ဘက်ရှိ သုသာန်ဟောင်းတွင် ဗုံးတလုံးပေါက်ကွဲပြီးနောက် ရဲများသွားရောက်ရှာဖွေစစ်ဆေးရာ မပေါက်ကွဲသေးသည့်ဗုံးတလုံးထပ်မံတွေ့ရှိခြင်းဖြစ်သည်။
သိန္နီမြို့နယ် ပြည်နယ်လွှတ်တော်အမတ် နန်းခင်ထားရီက – မှန်ပါတယ်။ လက်လုပ်ဗုံးပါ။ရဲစခန်းအနောက်ဘက်က ပေါက်ကွဲတာ။ လူတော့မထိဘူး။ သုသာန်ဟောင်းထဲပေါက်တယ်ဆိုတော့ လမ်းလည်းမပိတ်ပါဘူး။ လက်သည်လည်းမသိရဘူး။ရဲဘက်ကလည်းဘာမှမထုတ်ပြန်ဘူး။ – ဟု ပြောဆိုသည်။
ပြီးခဲ့သည့်ဖေဖော်ဝါရီလ ၂၂ ရက်နေ့ကလည်း သျှမ်းပြည်မြောက်ပိုင်းလားရှိုးမြို့ရှိ အမှတ် ၁ ရဲစခန်းနှင့်မျက်နှာချင်းဆိုင်ရှိ ရိုးမဘဏ်နှင့်ဧရာဝတီဘဏ်ကြား ဗုံးပေါက်ကွဲမှုကြောင့် ဘဏ်ဝန်ထမ်း ၂ ဦးသေဆုံးကာ ၁၀ ကျော်ဒဏ်ရာရရှိခဲ့ပါသည်။ ပေါက်ကွဲမှုလက်သည်အား ဖမ်းမိကြောင်း ထုတ်ပြန်သည်ကိုမတွေ့ရပေ။
