သျှမ်းပြည် မြောက်ပိုင်းတွင် ယခု ၂ လ အတွင်း တိုက်ပွဲများ ဆက်တိုက်ပြည်လည်ဖြစ်ပွါးလာမှုကြောင့် ဒေသခံလူထု ၅ ဦးသေဆုံးခဲ့ပြီး ၃၀ ထက်မနည်း ထိခိုက်ဒဏ်ရာရရှခဲ့ကြောင်း သျှမ်းမြောက် လူမှု အဖွဲ့အစည်း ကထုတ်ပြန်သည်။

ပြီးခဲ့သည့်အောက်တိုဘာ မှ ယနေ့ နိုဝင်ဘာ လထိ ဖြစ်ပွါးခဲ့သောတိုက်ပွဲများအတွင်း ကျည်ဆန်ထိမှန်မှုနှင့် မိုင်းနင်းမိမှုတို့ကြောင့် လူသူထိခိုက်ဒဏ်ရာရရှိခဲ့ကြ ခြင်းဖြစ်ကြောင်း လူမှု အဖွဲ့အစည်း ၁၃၃ ဖွဲ့ ပါ၀င်ထားသည့် သျှမ်းပြည် မြောက်ပိုင်း လူသားချင်စားနာထောက်ထားမှု ပူးပေါင်း ဆောင်ရွက် ရေး အဖွဲ့ (HST-NSS) က နိုဝင်ဘာ ၁၆ ရက်စွဲဖြင့် ထုတ်ပြန်ချက် ထုတ်ပြန်ခဲ့သည်။

လက်ရှိတွင် ကျောက်မဲ၊ နမ့်ဆန်၊ သီပေါ၊လားရှိုး ၊ ကွတ်ခိုင် မြို့နယ် များနှင့် ပြည်ထောင်စုလမ်းမ တလျှောက်တို့တွင် တအာင်း(ပလောင်) အမျိုးသားလွတ်မြောက်ရေး တပ်မတော်(TNLA) နှင့် မြန်မာ့တပ်မတော်တို့ကြား ပစ်ခတ်တိုက်ခိုက်မှုကြောင့် လက်နက်ကြီး ကျပြီး လူထိခိုက်မှု သေဆုံးခဲ့ကြောင်း ထုတ်ပြန်ချက်တွင် ရေးသားထားသည်။

“ အောက်တိုဘာလ နဲ့ ဒီ နိုဝင်ဘာ မှာတော့ သေတဲ့သူက ၅ ဦးရှိပြီ။ ကျနော်တို့ အနေနဲ့တိုက်ပွဲတွေ ချွင်းချက်မရှိ ရပ်တန့်ဖို့ပါ။ အရပ်သားပြည်သူတွေကို ပစ်မှတ်ထားပြီး ထိခိုက်နစ်နာတာတွေ လုံးဝ မဖြစ်ဖို့ပါ တောင်းဆိုချင်ပါတယ်” ဟု HST-NSS မှ ပြောရေးဆိုခွင့်ရှိသူ ဦးဟောင်းဒေါင် က သျှမ်းသံတော်ဆင့် သို့ပြောသည်။

အရပ်သားပြည်သူများကို ပစ်မှတ်ထားပြီး တိုက်ပွဲဖြစ်ပွားနေသည်ကို ရှောင်ကြဉ်ပေးရန် နှင့် တိုက်ပွဲကြောင့် ပြည်သူများနှင့် ကလေးငယ် ပညာရေး များ ထိခိုက်မှု များစွာ ရင်ဆိုင်နေရသည့်အတွက် တိုက်ပွဲ ရပ်ပေးရန် လည်း ဦးဟောင်းဒေါင် က ပြောသည်။

သျှမ်းပြည် မြောက်ပိုင်း လူ့အခွင့်အရေး တက်ကြွလှုပ်ရှားသည့်သူများ၊ လူမှု အဖွဲ့အစည်းများသည် မြန်မာ့တပ်မတော် နှင့် တိုင်းရင်းသား လက်နက်ကိုင်များ တိုက်ပွဲဖြစ်ပွားခြင်း ကို ရပ်တန့်ရန် ဆက်တိုက် တောင်းဆိုခဲ့သော်လည်း လက်နက်ကိုင် အဖွဲ့အစည်းများက နားထောင်ခြင်းမရှိပေ။

သျှမ်းပြည် မြောက်ပိုင်း တွင် ဖြစ်ပွားသည့် ပဋိပက္ခသည် နှစ်ရှည်ကြာလာပြီး စစ်ရှောင်များ၊ ပြည်သူအရပ်သားများ ထင်သာမြင်သာ ထိခိုက်သေဆုံးမှု များရှိလာသည်။

“ စစ်ပွဲ နောက်ဆက်တွဲ ဆိုရင် ပြည်ထောင်စု လမ်းကို အသုံးပြုပြီး အသက်မွေးဝမ်းကြောင်းဖို့ခက်ခဲတာ။ ကျောင်း ကလေး ပညာရေး ဆိုရင် ကျောင်းပိတ်ရတာ တွေရှိတယ်” ဦးဟောင်းဒေါင် က ဆိုသည်။

တိုက်ပွဲကြောင့် ကလေးငယ်များ၏ လုံခြုံရေး နှင့် ပညာရေးကို ထိခိုက်စေသဖြင့် စိတ်ပိုင်းဆိုင်ရာ ထိခိုက်မှုမျိုးဖြစ်စေသည့် လုပ်ရပ်များ ထပ်မံ မပြုလုပ်ရန် HST-NSS ထုတ်ပြန်ချက်တွင်ရေးသားထားသည်။

“ တိုက်ပွဲက အရင်လို ပုံစံ ပြန်ဖြစ်နေတာ။ ကျနော်တို့စိတ်ပူရတယ်။ ပြည်သူတွေကို ပစ်မှတ်ထားပြီး မလုပ်ဖို့။ အခု သေနတ်ထိမှန်တာ ပြည်သူတွေဖြစ်နေတယ်” ဟု မြန်မာနိုင်ငံလုံးဆိုင်ရာ သျှမ်းလူငယ်ကွန်ရက် (TYN) မှ စိုင်းနော်ဆိုင် က ပြောသည်။

သျှမ်းပြည် မြောက်ပိုင်း တွင် နေထိုင်သည့် အရပ်သားပြည်သူများ၏ လုံခြံုရေး အတွက် စိုးရိမ်ဖွယ်ရာ အခြေအနေ ဖြစ်နေသဖြင့် အရပ်သားများကို ပစ်မှတ်ထားပြီး တိုက်ခိုက်ခြင်း ကို အမြန်ဆုံး ရပ်တန့်ပေးရန်လည်း စိုင်းနော်ဆိုင်က ပြောသည်။

စစ်ရေးတင်းမာမှုသည် ယခုအခြေအနေအတိုင်း ရှေ့ဆက်သွားမည်ဆိုပါက သျှမ်းမြောက် တိုက်ပွဲ ပိုပြီး စိုးရိမ်လာနိုင်သည်ဟုလည်း သိရသည်။