ကျောက်မဲမြို့နယ် အတွင်း တိုက်ပွဲကြောင့် စစ်ရှောင် ၃၀၀နီးပါး တိမ်းရှောင်နေရ

0

သျှမ်းပြည် မြောက်ပိုင်း ကျောက်မဲမြို့နယ် အတွင်း တအာင်း(ပလောင်) အမျိုးသားလွတ်မြောက်ရေး တပ်မတော်(TNLA) နှင့် မြန်မာ့တပ်မတော် တို့ ယခုလအတွင်း တိုက်ပွဲများ ပြန်လည်ဖြစ်ပွါးရာ  ဒေသခံ ပြည်သူလူထု စစ်ဘေးတိမ်ရှောင်နေရသည်။

Photo by ခုံငင်း ကျေးရွာဒေသခံ၊ တိုက်ပွဲကြောင့် စစ်ဘေးရှောင်လာသည့် သူများ

တိုက်ပွဲများကြောင့် နိုဝင်ဘာ ၁၅ ရက်က  ကျောက်မဲမြို့နယ် ကွန်ကော်၊ တော့ဖယ်နှင့် အုံအွီးကျေးရွာ မှ ဒေသခံ ၃၀၀ နီးပါး စစ်ဘေးတိမ်းရှောင်နေရသည်ဟုသိရသည်။

စစ်ရှောင်များသည်  ခုံငင်းကျေးရွာ ရှိဘုန်းကြီးကျောင်းတွင်  ခိုလှုံနေခဲ့ရာမှ နေထိုင်စားသောက်မှုအခက်အခဲအကျပ်အတည်းကြောင့်  နိုဝင်ဘာလ ၁၇ ရက် ယမန်နေ့က နမ့်ဆန်မြို့နယ် ပန်နင်း ကျေးရွာသို့ ထပ်မံ  တိမ်းရှောင်ခဲ့ရကြောင်း ကျောက်မဲမြို့နယ် တအာင်း အမျိုးသားပါတီ တာဝန်ခံ မိုင်းရန်နိုင် က သျှမ်းသံတော်ဆင့် သို့ပြောသည်။

“ စစ်ရှောင် ၂၈၀ ကျော် က အစမှာ ကျောက်မဲမြို့နယ် ခုံငင်း ကျေးရွာ ထွက်ပြေးတိမ်းရှောင်တယ်။ အဲ့နေရာက ရေ အဆင်မပြေ ဘူး။ လူနေအိမ်ကလည်း သိပ်မရှိတော့ မနေ့က သူတို့ ထပ်ပြီး နမ့်ဆန်မြို့နယ် ပန်နင်းကျေးရွာ ကို ထပ်မံ ပြောင်းရတယ်” ဟု မိုင်းရန်နိုင် က ဆိုသည်။

Photo by ခုံငင်း ကျေးရွာဒေသခံ၊ တိုက်ပွဲကြောင့် စစ်ဘေးရှောင်လာသည့် သူများ

ကျောက်မဲမြို့နယ် ခုံငင်းကျေးရွာ နှင့် နမ့်ဆန်မြို့နယ် ပန်နင်းကျေးရွာသည်   ၆ မိုင် ခန့်ကွာဝေးကြောင်းသိရသည်။

စစ်ဘေးရှောင်အများစုသည် အမျိုးသမီး နှင့် ကလေးငယ်များဖြစ်ပြီး၊ လက်ရှိတောင်ပေါ်အေးစက်သောရာသီဥတုကြောင့် အနွေးထည်များနှင့် စားစရာများလိုအပ်နေကြောင်း စစ်ရှောင်များအား ကူညီမှုပေးနေသည့် အမျိုးသားတဦးက ပြောသည်။

“ အခုကစစ်ရေးတွေ တင်းမာနေတော့ သူတို့ပြန်ဖို့ ခက်မယ်။ တိုက်ပွဲက ဘယ်ချိန်ပြန်ဖြစ်မယ်မသိသေးဘူး။ ထွက်ပြေးလာတော့ ဘာမှ မပါလာဘူး။ အခုက အေးပြီဆိုတော့ အနွေးထည်တွေ တော့လိုမယ်” ဟု  ၎င်း အမျိုးသားက ဆိုသည်။

TNLA နှင့် မြန်မာ့တပ်မတော်သည့် အောက်တိုဘာ လမှ စတင်ကာ ယနေ့တိုင်ထိ စစ်ရေး တင်းမာနေပြီး တချို့ဒေသများတွင်တိုက်ပွဲအပြင်းအထန်ဖြစ်ပွားသဖြင့် နေအိမ်များ ဘုရားကျောင်းကန်များထိခိုက်ပျက်စီးကြောင်း ကျောက်မဲမြို့နယ် မန်ခေါက်ကျေးရွာ မှ ဒေသခံ ဦးသန်းအောင်က သျှမ်းသံတော်ဆင့် သို့ပြောသည်။

“ လောလောဆယ်တိုက်ပွဲတွေငြိမ်နေပေမယ့် တပ်တွေ ထပ်တက်လာတယ်လို့ ကြားတယ်။   မနေ့ ညက လက်နက်ကြီးတွေ ဆက်တိုက်ပစ်တယ်။ ကျနော်တို့ မန်ခေါက် ဘုရားလည်း လက်နက်ကြီးထိတယ်။ နေအိမ်တွေလည်း ထိတယ်။ လူတော့ ထိတာ မကြားသေဘူး” ဟု ဦးသန်းအောင် က ထပ်လောင်းပြောသည်။

လက်ရှိ  ကျောက်မဲမြို့နယ် နှင့် နမ့်ဆန်မြို့နယ် အတွင်း TNLA နှင့် မြန်မာ့တပ်မတော် စစ်ရေး တင်းမာမှုရှိနေရာ တိုက်ပွဲများအချိန်မရွေးဖြစ်လာနိုင်သဖြင့်  ဒေသခံများမှာစိုးရိမ် ထိတ်လန့်မှု များကြားနေထိုင်နေရကြောင်းသိရသည်။

 

Leave a Comments

SHARE