သျှမ်းပြည်နယ် မြောက်ပိုင်း နမ္မတူမြို့ တွင် ယမန်နေ့ ည တွင် အမျိုးသား တဦး သေနတ်ပစ်ခံရကြောင်း သတင်း ရရှိသည်။
ဖြစ်စဉ်မှာ ယမန်နေ့ (နိုဝင်ဘာ ၇) ရက်နေ့ တွင် ည ၆နာရီကျော်တွင် အသက် ၂၇ နှစ် အရွယ် အမျိုးသား တဦး ကို အမည်မသိ လက်နက်ကိုင် အဖွဲ့ မှ လာရောက် ပစ်သတ်ခဲ့ကြောင်း နမ္မတူမြို့ မှ ဒေသခံ လုံးကျော်လှ က သျှမ်းသံတော်ဆင့် သို့ ပြောသည်။
“ သေနတ်ပစ်သတ်ခံရတဲ့သူက နမ္မတူမြို့ ဒေသခံ တော့မဟုတ်ဘူး။ နမ့်ဆန်ဘက်ကနေလာနေတဲ့သူပါ။ မနေ့ က လူ ၄ယောက်က ဆိုင်ကယ်နဲ့ လာပြီး ပစ်သတ်တာပါ။ သတ်ခံရတဲ့သူက မူးယစ်ဆေးသုံးတဲ့သူလို့ ပြောကြတယ်” ဟု လုံးကျော်လှ က ဆိုသည်။
လက်ရှိ မှာ အသက် ၂၇နှစ် အရွယ် အမျိုးသားအား သေနတ်ပစ်သည့် အဖွဲ့ကို စုံစမ်းနေဆဲဖြစ်ကြောင်း လုံးကျော်လှ က ပြောသည်။
သေနတ်ပစ်သတ်ခံရသည့် အမျိုးသားသည် မူးယစ်ဆေးဝါး သုံးစွဲသူ တဦးဖြစ်ပြီး၊ ရွာသားများထံ ငွေကြေးတောင်းလေ့ရှိသူတဦး ဖြစ်သည်ဟု ဒေသခံများပြောပြချက် အရ သိရသည်။
သျှမ်းပြည်နယ် မြောက်ပိုင်း နမ္မတူမြို့ နယ်တွင် တိုင်းရင်းသား လက်နက်ကိုင်တပ်ဖွဲ့ပေါင်းစုံနှင့် မြန်မာ့တပ်မတော် တို့လှုပ်ရှားသည့်နေရာ ဖြစ်ကြောင်း သိရသည်။
ယခုလ အတွင်း သျှမ်းပြည် မြောက်ပိုင်း ကျောက်မဲမြို့လည်ခေါင် စားသောက်ဆိုင် တွင် မိုင်းတင်း ကျေးရွာအုပ်ချုပ်ရေးမှူး၊ နားမွန်းကျေးရွာ အုပ်ချုပ်ရေးမှူး နှင့် အမျိုးသားတဦး သေနတ်ပစ်သတ်ခံရပြီး၊ ထိုနည်းတူ ကွတ်ခိုင်မြို့ နယ် ပန်လော့ကျေးရွာတွင်လည်း အမျိုးသား တဦး သေနတ်ခံရကာ ဆေးကုသနေရသည်။
Leave a Comments