ထိုင်းနိုင်ငံ ချင်းမိုင်ခရိုင် အတွင်းလာရောက် အလုပ်လုပ်သည့် သျှမ်းရွှေ့ပြောင်းအလုပ်သမား အောက်တိုဘာ လ အတွင်း ၅ဦး သေဆုံးခဲ့ကြောင်း သတင်းရရှိသည်။
အဆိုပါ သေဆုံးသွားသည့် သျှမ်းရွှေ့ပြောင်းအလုပ်သမား ၅ဦးတွင် ၃ဦးမှာ အသတ်ခံရပြီး တဦးမှာ ကားယာဉ်တိုက်မှု နှင့် ကျန်တဦးမှာ လုပ်ငန်းခွင် ထိခိုက်မှုဖြစ်ပွားကာ သေဆုံးခဲ့ကြောင်း ရွှေ့ပြောင်းအလုပ်သမားအရေးကူညီဆောင်ရွက်ပေးနေသည့် စိုင်းတိုင်း က သျှမ်းသံတော်ဆင့်သို့ ပြောသည်။
အသတ်ခံရသည့် မိသားစုဝင် ၃ဦးသည် သျှမ်းပြည် မှ ထိုင်းနိုင်ငံ ချင်းဒေါင်းဝ်(Chiang Dao) တွင် အလုပ်လုပ်ကြောင်း၊ ယာဉ်တိုက်မှု ဖြင့် သေဆုံးသည့် အမျိုးသားမှာ ချင်းမိုင်ခရိုင် လွိုင်လော်တွင် အလုပ်လုပ်ကြောင်း၊ လုပ်ငန်းခွင် အတွင်း ထိခိုက်သေဆုံးသည့် အမျိုးသားသည် ချင်းမိုင်မြို့ တွင် ဆောက်လုပ်ရေး လုပ်ကြောင်းသိရသည်။
“ အောက်တိုဘာမှာ ၅ဦးသေတယ်။ ၃ဦးကတော့ အသတ်ခံရတဲ့ မိသားစုတွေပါ။ ဒီအမှုကိုတော့ ထိုင်းရဲက စုံစမ်းစစ်ဆေးနေတုန်းပါ။ ယာဉ်တိုက်မှု နဲ့ လုပ်ငန်းခွင် ထိခိုက် သေဆုံးကတော့ လက်ရှိ အချိန်ထိ လျော်ကြေးငွေ တွေမရသေးဘူး” ဟု စိုင်းတိုင်း က ဆိုသည်။
လုပ်ငန်းခွင်တွင် ထိခိုက် ပြီးသေဆုံးသည့် အမျိုးသား လျော်ကြေး ငွေ ရရှိရန် အတွက် ကြိုးစားဆောင်ရွက်ပေးနေကြောင်း၊ တရားရုံးမှာ ဆွေးနွေးနေဆဲ ဟု စိုင်းတိုင်း က ပြောသည်။
ထို့ပြင် အသတ်ခံရသည့် မိသားစု ၃ဦး ကိစ္စကိုလည်း ထိုင်းရဲများ က စုံးစမ်းဖော်ထုတ်နေဆဲ ကာလဖြစ်ကြောင်း သိရသည်။
“ ဒီနှစ် အတွင်း လုပ်ငန်းခွင် ထိခိုက်သေဆုံးမှုက ၃၀ကျော်တယ်။ ထိခိုက်ဒဏ်ရာရတာကတော့ ၅ဦးလောက်ပဲရှိတယ်။ သေဆုံးမှု များတယ်” ဟု စိုင်းတိုင်းက ပြောသည်။
ထိုင်းနိုင်ငံ ချင်းမိုင်ခရိုင် အတွင်း သျှမ်းရွှေ့ပြောင်း အလုပ်သမားများသည် ယခုနှစ် ဇန်နဝါရီ မှ အောက်တိုဘာ လအတွင်း လုပ်ငန်းခွင်သေဆုံးသူ ၃၀ကျော် ရှိပြီး ယခင် ၂၀၁၈ ခုနစ်တွင် လုပ်ငန်ခွင် သေဆုံးသူ ၃၅ဦး ကျော် ရှိကြောင်း သိရသည်။
Leave a Comments